Roma 11 - Iaai Bible 1901 (New Caledonia)

¹ ANYIN a wale, inya oge me ha, ka habe, Hawa, a hia but Khong degec lakeiny? Ohe. Anyin a inya at Isaraela minya, ûnyi hnyi mâtrâni Aberahama, ke hanen tribu Beniamina.

² A ca degec bi Khong lakeiny waleji e ame wâhmakhmeto ehac. Ke ca khanʼ öbun hna ha hnen tusi ga Elia? waleji e ame khöû ka Khong ge at Isaraela, ka habe,

³ Than lö, adre hia but hlingâ ânyâm je perofeta, me thö degecâ ânyâm je taben hut: ke hake inya thiju kolon, ke adre me elöm nya be ka hlingö nya.

⁴ Ke ieû hna thu kâu hnen Khong? walang, Oge me ip biju hobi könya tavat a seven thauzan, waleji adre me ca hnyi cibouca kö Baala.

⁵ Ke helâe minya walang ang, e hu wan hoton hna ûca hnen ibetengiö baû.

⁶ Ke a ne hnen ibetengiö baû, awe, ca hnen bi huliwa: a ne ca helâe, me ca ibetengiö baû hmetu bi ibetengiö baû.

⁷ Ke ieû hmetu? E ca hu ge at Isaraela hnödra hna elâm: ke e hu bi ge tavat adre ûca, ke adre onâkâ keihen:

⁸ helâ me hna sihnalimen, ka habe, Khong ame ham kodra hnyok ae bemokut, me je ecmak ame ca bwela bi, me je hnyiköny adre me ca long, ke ne o but hnyi bong ang.

⁹ Ke haingö Davita, ka habe, E so ame wia anyidra laulau me hnân hnewe me ofific, Me hnân othöâ me hnân bi hwaban kodra:

¹⁰ E so adre me ölidrâ je emaködra, madre me ca bwela bi, Me onomâ bala ju je judra.

¹¹ Inya oge me ha, ka habe, Hawa, adre me thö me me û but? Ohe: ke haba hnyi ta a ödra me ame o but ûhomeli ka Aten ta je hnyei hnân oihunyinköu ödra.

¹² Ke a ne tang omjehen dut hmeledrany ta a ödra, me tang omjehen dut Aten ta je hnyei hna otheduoci ödra; hawa, ame ca he ka ti gan hmâ anyidra hnahic?

¹³ Ke oge me ha köbun Aten ta je hnyei. Ke anyin a inya ang aposetoloiny Aten ta je hnyei, me inya oge me ogânâ hanymök:

¹⁴ me heleû deny he ka oihu-nyinköuâ lahanök, me omelö keihen gadra a ne khana.

¹⁵ Ke a ne hu ge hmeledrany ûsoköu hnyi hna digic ödra, ame he ka hu ieû hnyi hna he ka kap hmetu? ca möt bi ûnyi hnyi hna mok?

¹⁶ Anyin a ne kap wan a bân, ame he ka helâe hia: ke a ne kap iwân ame he ka helâe minya je anginy.

¹⁷ Ke adre ne thu degecâ but ke je anginy, ke u elaioiny hnyot adre ûhûjâköuâ unyidra, ke u me tha hu mödrin iwân me dân elaio;

¹⁸ u ma ca bi gan bi ka ta je vheiny: ke u je ne bi gan, me ame ca möt iwân ûnyi gam, ke u bu u möt ûnyi ge iwân.

¹⁹ U je ne ha, ka habe, Adre me subâ degecâ je angin mʼ adre me ûhûjâköuö nya bi.

²⁰ Eke, adre subâ degeci ödra ûnyi hnyi ca labageju, ke u je tethmâ ûnyi hnyi ânyâm labageju. Ca bi gan, ke ot ju:

²¹ anyin a ne ca betenge Khong ge je hing vheiny, me ame ne ca he minya ka betenge gam.

²² Anyin a wale, wâ bi betenge me hmonyin anyin Khong: hmonyin ka tavat adre me kolu; ke betenge anyin Khong köu, u je ne tethmâ hnyi anyin ibetengiö: ke e ka ba, me adre me he ka subâ degeci u minya bi.

²³ Ke adre me he minya bi ka ûhûjaköu Ödra wale adre me ca tethmâ hnyi ca labageju: anyin ae khana Khong he ka ûhûjaköu ödra hmetu.

²⁴ Anyin adre ne subö u ûnyi hnyi elaio a kû hwege hnyi hnyot, ke adre me ûhûjâköuö u hnyi hing elaio ke ca bongon bi ûö: hawa, adre me ca he ka ûhûjâköu ödra hia ta je hing vheiny hnyi anyidra bi elaio?

²⁵ Hnyat me lakeiny lö, oge me wek e me khanʼ öbun ûnyi eang ae iyong, wâ öbun nye bemetâ hnen je ûnykûmenöbun, a gʼ adre hia but onâkâ keihen tavat Isaraela, ke ne o but ame o hnahic ka Aten ta je hnyei;

²⁶ mʼ adre me he ka omelö at Isaraela hia thithö; helâ me hna sihnalimen, ka habe, Ame he ka o At ûhomeli ûheny Ziona; Ke ame he ka ohia hwakecin ae kong unyi Jekob:

²⁷ Ke wale hnok hna ûhihinyköu mödra, Iny ka he ka hom degecâ anyidra hulo.

²⁸ Je iwahnaihmiony ödra me ûthumetu ae so, can öbun: ke haba hnyi hna ûca at, me adre me betenge kodra can lakamen.

²⁹ Anyin ame ca ietra Khong ge hnen hna ham, me hnen hna hawâ.

³⁰ Anyin a öbun e ca long hoton Khong ehac, ke walang ang adre me betenge gabun ûnyi hnyi hnödra hna ca long hoton,

³¹ haba ödra, me adre me ca long hoton walang ang, mʼ adre me he ka betenge gadra minya bi, helâ me hna betenge köbun.

³² Anyin a tha hna Khong tavat hia thithö ka hnyi hna ca long hoton, me me he bi ka betenge ge tavat hia thithö.

³³ Shaiba ge ûdiliny metâ ae nua me wâ ûnykûme anyin Khong! e iyong hmonyin anyin owisa, ke ca hnân wâ bi deny ta je gethen!

³⁴ Anyin a ia ame wâ ûnykûme weny Than? ke ie at ame tha ûhnenamö më?

³⁵ ke ia a bân ka ham ûnyi kâu, me e ame he ka bi hwaban hmetu kâu?

³⁶ Anyin a haba ta je ûnyi hia thithö, me ûnyi gan, me hnen e, me hnân hobi kâu, E so he ka ogânâ e nyiele balua. Amen.