Owisa 8 - Iaai Bible 1901 (New Caledonia)

¹ KE haingen at Eferaima kâu, ka habe, Ieû e u je ânyâ kohmun, a u je ca hum öhmun minya wale mʼ u he ka vat me at Midiana? Me ödrin e ti oû e.

² Ke e ame ha ködrin, ka habe, Ieû oge ânyâ walang ae nua hon hnobun hna ânyâ? Hawa, e ca beönua bi hna hlo je wan vine anyi Eferaima hon je wan vine adre ip anyi Ahiezera?

³ Haba Khong ame hna ka hnyi je hnyamöbun li thaniny Midiana, jia Oreba me Zeba: ke ieû ae khanö nya he ka ânyâ helâ möbun? Me ame hia anyidrin hmönyin kâu, hnyi ûen e ame ha e.

⁴ Ke ame o but Gideona hnyi Joridano, me he hanyâûâ, e me tavat a kun ta haded unyin, a sënyin dut, kʼ ame tiga hnuhnu bala bi.

⁵ Ke e ame ha ka at Sukotha, ka habe, Ö öbun ham je falawa ka tavat adre me he hotuk; anyin a ödrin sënyin, ke inya oge me hnu Zeba me Zalemuna, li thaniny at Midiana.

⁶ Ke haingen je thaniny Sukotha, ka kabe, Hawa, e bi hnyi li hnyamâm li hnyamö Zeba me Zalemuna, mʼ ohmun e he ka ham areto ka je lahiâm?

⁷ Haba Gideona ame ha, ka habe, Awe, e ka hia but Iehova hnö Zeba me Zalemuna ka hnyi hnyamok, oge me he ka kia je unyibun ge je ûnyi ae ûdö hnyi hnyebuba me je iwatetaföcö.

⁸ Ke e ame he ûheny e Penuela ai, me ha helâe hodrin: me ame thu kâu at Penuela helâ me hna thu ge at Sukotha.

⁹ Ke e ame ha minya ka at Penuela, ka habe, Iny ka hmetu me hnahic, oge me he ka kia hnabâ eang.

¹⁰ Ke e hnyi Karekora Zeba me Zalemuna, tha e mödru anyidru je utbavat helâ me fitin thauzan, je kolon je utbavat hia aten e deiö: anyin a kolu but khaca haded me twente thauzan tavat hok hele vat.

¹¹ Ke haba Gideona ame ölö thö hnyi gethen deny tavat adre me laba hnyi je uma mano hnyi ke keihen e deiö Noba me Jogeba, me hlingâ je utbavat; anyin ame laba hmâ vat eling.

¹² Ke ame kec ut Zeba me Zalemuna; me e ame hnu ödru; me e ame kât li thaniny at Midiana, Zeba me Zalemuna, me ohmöiöngâ utbavat hia.

¹³ Ke haba Gideona nöku Joasa ame hmetu ûheny hnyi hna vat hnyi gethen ûheny thö Heres.

¹⁴ Ke e ame kât ke hidröu at Sukotha me hnö e: me e ame ha bongon je than Sukotha, me je hingat a; sevente seven.

¹⁵ Me e ame o but ka at; Sukotha me ha, ka habe, Wâ hmʼ öbun ju Zeba me Zalemuna, wale öbun e û nya cadru, me ha, ka habe, Hawa, e bi hnyi hnyamâm li hnyamö Zeba me Zalemuna, mʼ ohmun e he ka ham areto ka tavat unyâm ae sënyin!

¹⁶ Me e ame hom wahingatiny taun, me je ûnyi ae ûdö ûnyi hnyi hnyebuba me watetaföcö me osoâ kâu.

¹⁷ Ke e ame kiâ hnabâ hnyi Penuela, me hlingâ aten taun.

¹⁸ Ke e ame ha kö Zeba me Zalemuna, ka habe, Ehö tavat obe hlingâ hnyi Tabora! Me haingödru, ka habe, Ödrin e tha ûcû mou; haba ödrin hia me ve ûcû me lakon than.

¹⁹ Me e ame ha, ka habe, Je liamekeiny mönya ödrin, a tha hinyöhmun; kia inya Iehova, öbe ne omeli ödrin, me oge me ca he bi ngâ ka hlingʼ öbu.

²⁰ Me e ame ha kö Jethrö a nokon a atö, ka habe, Todrö, hlingʼ ödru but. Ke haba hidröu ame ca oc hele vat, anyin ae ot, kʼ ame tiga thoth.

²¹ Ke haba Zeba me Zalemuna ödru me ha, ka habe, Todrö me kuc ohmu: anyin ae ûcû at me tang hwegien. Me ame todrö Gideona me hlingö Zeba me Zalemuna, me hom je hmanenanginy nyin haledru li kamela.

²² Ke haba at Isaraela adre me ha kö Gideona, ka habe, U me he ka musi ohmun, a u, me nokom, me öbem: anyin a u je hia but omeli ohmun ûnyi hnyi hnyamen at Midiana.

²³ Ke haingö Gideona ködra, ka habe, Oge me ca he ka musi öbun, kʼ ame ca he bi nokuk ka musi öbun: hainö Iehova he ka musi öbun bi.

²⁴ Ke haba Gideona ame ha ködra, ka habe, Inya oge me sumat öbun, mʼ öbun e he ka ve ham bi könya je anen hnyikonyen a gol öbun e hûgûnâ. (Anyin ae hu gadrin je anen hnyikonyen a gol, anyin a at Isamaela ödrin.)

²⁵ Ke haingödrin, ka habe, Ohmun e he ka ham senyinâ e. Me ödrin e ulolo imano me ve khûâ ka hnyin je anen hnyikonyen, ödrin e hûgûnâ.

²⁶ Ke haba ihmakiny je anen hnyikonyen a gol, wale e ame sumâtâ, me wan thauzan ke seven haded je sekel gol; ke ca ha bi je hmanenanginy, me je sawakiny, me je ûkhaû ae udrudrâ a khaûen li than Midiana, ke ca ha bi je sacein hon nyin je kamela.

²⁷ Ke haba Gideona ame ânyâ iefoda ûnyi hnyi je ûnyi e, me ip e hnyi anyin taun wale Ofera: ke haba at Isaraela hia thithö ödrin e bi ûnyi monu me ûnyi eling: ke wale hnewe kö Gideona me anyin lap.

²⁸ Ke ame ngâ at Midiana hnyi hnyimakan lakon Isaraela, ke ca görany hmetu bi je bodrin. Ke ame menâ ju hnyei ke ne o but fâte je huna hnyi je bong bongu Gideona.

²⁹ Me ame he Jerubaala nöku Joasa, me laba hnyi umen uma bi.

³⁰ Ke sevente je baga laku Gideona, a je hing lakon: anyin ae se hia laâiân.

³¹ Ke haba anyin momo hnyi Sekema, me ame hnokoâ nokon baga me e ame hwenyi ien Abimelek.

³² Ke ame mokcu Gideona, nöku Joasa ke ti hingat ut, me adre me konâm e hnyi hu Joasa a kamen hnyi Ofera iny at Abiezera.

³³ Ke ame mokcu Gideona, me ame hmetu lakon Isaraela, me bi ûnyi monu me je Baala, me wiö Baala-berith me me khongudrin.

³⁴ Ke haba lakon Isaraela ödrin e ca ûnykûme Iehova Khongudrin, at ame omeli ödrin ûnyi ge je iwahnaihmiony mödrin hia thithö igigilo:

³⁵ ke khaca ödrin e ca betenge ge hnyaba Jerubaala, wale Gideona, hoton ta je so hia e ame ânyâ hobi kâu at Isaraela.