Owisa 7 - Iaai Bible 1901 (New Caledonia)

¹ KE haba Jerubaala, wale Gideona ame vesâ hnyi hnyomakatu, me tavat hia thithö unyin me laba hnyi an ame pupua anyi Harod: ke e hnyi hwadro vat anyin at Midiana hnyi baten ong bucen More hnyi hnyigöulen bucen.

² Ke haba Iehova ame ha kö Gideona, ka habe, E se hia hmonyin tavat unyâm, me oge me ca he ka ham at Midiana ka hnyi hnyamödra, wâ e nye bi gan at Isaraela könya, me ba, ka habe, Iny möt ge hing hnyamök.

³ Ke walang ang, ha thö ka tavat, ka habe, Haba tavat ae ot me öbubuny, e so ödrin e he hmetu, me ie he ûheny hnyi bucen Gileada. Me haba tavat a twente tu thauzan adre me hmetu hmetu, ke ten biju thauzan.

⁴ Ke Iehova ame ha kö Gideona, ka habe, E tiga se hia hmonyin tavat; hum ödrin dö ka hnyi an, me oge me he ka cubic ödrin eling hobi köu: ke haba at oge me he ka ha köu a gʼ ame he ka tha he mou, me wale at ame he ka tha he mou; ke haba at oge me he ka ha köu, a gʼ ame ca he ka tha he mou, me ame ca he ka he.

⁵ Me e ame hom tavat ka hnyi an: ke haba Iehova ame ha kö Gideona, ka habe. Haba hnyat hia ödrin e drem an helâ me uicin kuli, me u me he ka hake ip ödrin; ke helâe minya hnyat hia ödrin e cibouca me ic.

⁶ Ke haba ûseiny tavat adre me drem, wale hnyat ödrin e kap hnyamödrin ka hnyi je hnyimödrin, me ödrin theri haded: ke haba ke keihen tavat bi ae ae hia, me ödrin e cibouca me ic.

⁷ Ke Iehova ame ha kö Gideona, ka habe, Oge me he ka omeli öbun ge tavat a theri haded, a hnyat ödrin e drem, me hna at; Midiana ka hnyi hnyamâm: ke he thö tavat hia thithö ka hnyi je hnyabadrin bi.

⁸ Haba tavat ödrin e hok kamec ge je hnyamödrin me anyidrin je trutru: ke e ame kunâ at Isaraela hia ka hnyi umödrin je uma mano; ke e ame hom behânâ bi tavat a theri haded: ke e hnyi hmelen e, hnyi hnyigöulen bucen, vat anyin at Midiana.

⁹ Ke haba hnyi lit eling, Iehova ame ha kâu, ka habe, Todrö, me utut ka hnyi hna hunuma; anyin a oge hia but hna e ka hnyi hnyamâm.

¹⁰ Ke u je ne ot ka ut, me u ma tha he me Fura athnyabaem ka hnyi hna hunuma:

¹¹ ke u me he ka long ûfucidrin; ke hwaban e adre me he ka ha hwegien li hnyamâm he ka utut ka hnyi hna hunuma. Me e ame tha he me Fura athnyabainy, ke ne o but ka hnyi hoton tavat adre me hom omjehen vat hnyi hna hunuma.

¹² Ke haba at Midiana, me Amaleka, me aten e deiö, adre me laba hnyi hnyigöuleny bucen helâ me ûseiny hamon; ke haba ûseiny haledrin je kamela helâ ûnyin köiö, ca hnân bi aû.

¹³ Ke ame o but Gideona, me wâ bi, ke at ame thumeto hanen ge bwi, haingen, ka habe, Wâ bi, oge bwi, ke e hu ke areto bali adre me khûâ ka hnyi hna hunuma anyin at Midiana, me ame āt ka hnyi uma mano, me kot e, me ame kolu but me hwiö hnyimen hnyikânâi, me ame ta but uma mano.

¹⁴ Me ame thu hnen hanen, ka habe, Wale hele vat anyi Gideona, nöku Joasa, a at Isaraela: a hia but Khong hna at Midiana, me anyidrin utbavat hia ka hnyi hnyamen.

¹⁵ Ke a long ut Gideona hna ha bwi ke bongon e, me ame khudrung; me e ame hmetu ka hnyi hna hunuma anyin at Isaraela, me ha, ka habe, Todrö, anyin a hia but Iehova hna vat anyin at Midiana ka hnyi hnyamöbun.

¹⁶ Me e ame khenâ kun ta haded me me kun ta bunyen me ve ham ka hnyi je hnyamödrin hia je trutru, me je kaia ae ba onyen me je okûnû eû hnyi hnyin je kaia.

¹⁷ Ke e ame ha ködrin, ka habe, Wâ hwakecik, me ânyâ helâe: ke wâ bi, iny ka o but ka hnyi hoton hna hunuma, me öbun e he ka ânyâ helâ me oge me ânyâ.

¹⁸ Ke iny ka he ka tûö trutru, a inya me tavat hia a tha laba unyik, awe, öbun e be minya ka tha tûö trutru igigilo hna hunuma hia, me ha hwegiâ, ka habe, Hobi kö Iehova me Gideona.

¹⁹ Me haba Gideona me haded unyin, ödrin e o ka hnyi hoton hna hunuma hnyi hwân hmak a wanben, kʼ adre hap ibi hmak: me ödrin e tûâ je trutru, me ohmouca je kaia hnyi je hnyamödrin.

²⁰ Ke ame tûö trutru je bunyen a kun, me thu je kaia, me ve kât je okûnû ge je hnyamödrin a me, me je trutru ge je hnyamödrin a metâ me me tûâ; ke ödrin e hongot hwege, ka habe, Hele vat anyi Iehova me Gideona.

²¹ Ke ödrin e ve tot hnyi je hnödrin bi igigilo hna hunuma; me ame wadring je vat hia thithö; ke ödrin e hongot me obʼ ödra.

²² Ke ödrin e tûâ je trutru a kun ta haded, ke Iehova ama iwiaköuâ hele vat anyin ke at me ke at ka ke at a hanen, ke ûcon vat hia thithö: ke ame kec vat ke ne o but hnyi Bethe-sita hnyi ke keihen Zererath, ke ne o but hnyi bnyigöulen Abela-mehola hnyi Tahath.

²³ Me ame ûkhacaköu at Isaraela ûheny Nafatali, me Asera, me Manase hia, me hnu at Midiana.

²⁴ Me haba Gideona ame kunâ je metâ ka hnyi hnyei ae hut hnyi Eferaima hia, me ha, ka habe, Utut öbun ûcon at Midiana me hûgûnâ bânâ wagewe ke ne o but hnyi Bethe-bara, wale Joridano. Me ame ûkhacaköu at Eferaima hia me hûgûnâ wagewe ke ne o but ka hnyi Bethe-bara, wale Joridano.

²⁵ Ke adre me kât li tuhan at Midiana jia Oreba me Zeba; me adre me hlingö Oreba hnyi hon kic Oreba, ke adre me hlingö Zeba hnyi hna hlec vine anyi Zeba, me hnu at Midiana: ke ödrin e hom li bö Oreba me Zeba ko Gideona hoton Joridano.