Owisa 6 - Iaai Bible 1901 (New Caledonia)

¹ KE haba lakon Isaraela adre me ânyâ ûnyi ae kong hnyi hnyimakö Iehova: me Iehova ame hnʼ ödra ka hnyi hnyamen at Midiana hnyi je huna a seven.

² Ke hwege at Midiana hon at Isaraela: ke can at Midiana, haba lakon Isaraela adre me ânyâ hobi ködra bi je thop hnyi bucen, me je op, me je hnabâ.

³ Ke a hia but belökâ hnyei at Isaraela, me ame o at Midiana, me Amaleka, me tavat e deiö; adre meʼ o but he ka vat mödra;

⁴ me adre me hunuma cici ödra, me okongoâ jeûiny kânâ ke ne o but Gaza, ke ba hmetu omelen at Isaraela, ame ne mamoe, me kau, me asina.

⁵ Anyin a adre me tha o me haledrin omeno, me umödra je uma mano, ke adre me o helâ me ûseiny hamon; ke ca hnân öû ödra me haledra je kamela: ke adre me o ka hnyi hnyei he ka ohiâ e.

⁶ Ke gan hmâ ba ta ûnyi anyin at Isaraela can at Midiana; me haba lakon Isaraela adre me tenge kö Iehova.

⁷ Ke ame tenge kö Iehova lakon Isaraela can at Midiana,

⁸ me Iehova ame kunâ perofeta ka lakon Isaraela; me e ame ha ködra, ka habe, Walang hofuc ho Iehova Khongon at Isaraela, ka habe, Oge me lili öbun ûheny Aigupito, me hum öbun ûnyi hnyi hnyaba ae Uthaluo;

⁹ ke oge me omeli öbun ûnyi hnyi hnyamen at Aigupito, me ûnyi hnyi hnyamen tavat hia adre me hom ûhnyûkongu öbun, me obʼ ödrin hnyi hnyimaköbun me ham bi köbun idrin hnyei;

¹⁰ ke oge me ha köbun, ka habe, Inya Iehova Khongubun; ca he öbun ka outen je khong khongon at Amora, wale hnyei öbun e labā: ke öbun e ca long hok hofuc.

¹¹ Ke ame o but angela anyi Iehova, me laba hmelen iwajo anyi Joasa at Ahiezera hnyi Ofera: ke haba Gideona a nokon ame kokot hwit hnyi hna hlec vine, he ka ikhâlâ e ge at Midiana.

¹² Ke ame manen dut kâu angela anyi Iehova, me ha kâu, ka habe, E bi unyâm Iehova, u baga ae hwege.

¹³ Ke haba Gideona ame ha kâu, ka habe, Tuhok lö, ame ne e but Iehova unyihmun, ieû can ame o kohmun ta je ûnyi hia eang? ke ewa anyin je ûöman hia wale a thumetu ohmun hnen lakamöhmun, ka habe, A ca hum ohmun Iehova ûheny Aigupito! ke walang ang a hia but Iehova digic ohmun bi, me hnʼ ohmun ka hnyi hnyamen at Midiana.

¹⁴ Ke haba Iehova ame wâ e, me ha, ka habe, He thö me tang hwegiâm eang me omelö at Isaraela ûnyi hnyi hnyamö Midiana: hawa, oge me ca kunö u?

¹⁵ Ke e ame ha kâu, ka habe, Tuhok lö, oge me he ka omelö at Isaraela hnen ieû? wâ bi, haba anyik lap wale ae ûnyi baû hmönyin hnyi Manase, ke iny ûhnyûkong hmönyin hnyi hnyaba cica.

¹⁶ Haba Iehova ame ha kâu ka habe, Oge me he ka tha e möu, ke u me he ka kot at Midiana helâ me at a khaca.

¹⁷ Ke haingen kâu, ka habe, Oge ne hia but kap betenge baû hnyi hnyimâkâm, u me he ka ânyâ könya haten, a u at ame ûhnenamö mönya.

¹⁸ Ö u ca he ka he ûhem ang, iny me o hmetu but köu, me hom anyik bwihlany, me ip e hnyi hnyimâkâm. Me e ame ha, ka habe, Oge me he ka laba ûhalubahing ke ne o but u me hmetu.

¹⁹ Ke Gideona ame didro, me penapena nokon got, me areto adre ca levenâ ge tap falawa a khaca efa: ke e ame ip utiö hnyi tangen, me hingâlâ dân meno ka hnyi öt, me hom kâu eû hnyi hmelen iwajo, me ham.

²⁰ Me angela anyin Khong ame ha kâu, ka habe, Hom dö utiö me areto adre ca levenâ, me ip hon kic ang, ke hingâlâ but tap meno. Me e ame ânyâ helâe.

²¹ Me haba angela anyi Iehova ame inâ but hnyiban uci hnyi hnyamen, me kâlâ meno me areto adre ca levenâ; me ame o thö meic ûnyi hnyi kic me thong degecâ meno me areto adre ca levenâ; me ame he but angela anyi Iehova, kʼ ame ca wâ bi.

²² Ke Gideona ame wâ a angela anyi Iehova; me haingö Gideona, ka habe, Ekölö Iehova Khong! anyin oge iohnyimak me angela anyi Iehova.

²³ Me Iehova ame ha kâu, ka habe, E so e hu gam hnahic; ca ot bi: u me ca he ka mok.

²⁴ Me haba Gideona ame otilâ taben hut eling kö Iehova, me hwenyi ien e Iehova-salom: ke ka e bi hnyi Ofera anyin at Ahiezera, ke ne o but hnyi bong ang.

²⁵ Ke haba hnyi lit eling Iehova ame ha kâu, ka habe, Hom dö bolok haleny kâmâm, a bolok a loiny wale at a seven hunainy, me kia but taben hut kö Baala anyin kâmâm, me subâ degecâ but Aseira walethö hon e:

²⁶ ke u me he ka otilâ taben hut kö Iehova Khongom hnyi hon ban hnabâ ae hwege eling, ge huliwa ae ûcû, me hom dö bolok a loiny me me hudo hudiny leû hon ûtoiny Aseira u me he ka sö degecâ.

²⁷ Ke Gideona ame hom hnyat a ten ûnyi hnyi lathnyabainy, me ânyâ helâ me Iehova ame ha kâu: ke e ame outen lap anyin kamen, me tavat a aten taun, me me ca khana he ka ânyâ e hnyi lany, ke e ame ânyâ bi hnyi lit.

²⁸ Ke a hmak dö tavat aten taun hnyi hnyomakatu, me wâ bi, adre hia but kia taben hut kö Baala, me sö degecâ Aseira walethö bon, me hudo bolok a loiny hon taben hut adre otilâ.

²⁹ Ke ame ûhnenamoköuâ tavat, ka habe, Ia ame ânyâ e? Ke ödrin e hia but ûhnö, me bnö, me haingödrin, ka habe, Gideona nöku Joasa ame ânyâ ûnyi ang.

³⁰ Ke haingen aten taun kö Joasa, ka habe, Hom but nokom mʼ adre me hlingâ: anyin a e ame kia taben hut kö Baala, me sö degecâ Aseira walethö hon.

³¹ Haba Joasa ame ha ködrin hia tavat ödrin e tot kâu, ka habe, Öbun e he ka tengiö Baala? Öbun e he ka omelö e? Haba at ame he ka tengiö Baala me adre me he ka hlingâ ke tiga hnyomakatu bi: ame ne ke khong bi e, hamen he ka tengiâ e bi, can ame hia but kia taben hut kâu.

³² Anyin a wale e ame hwenyi ien e hnyi bong eling Jerubaala, ame ha, ka habe, Hamö Baala he ka tengiâ e bi, can hna kia taben hut kâu.

³³ Me ame ûkhacaköu at Midiana hia me at Amaleka, me aten e deiö; me ödrin e he me laba hnyi hnyigöulen bucen anyin Jezerela.

³⁴ Ke ame ta hu Gideona hanu Iehova; me e ame tûâ trutru; me ame ûkhacaköu hoton e at Ahiezera

³⁵ Me e ame ûkhûnöng ka at Manase hia; me ödrin e ûkhacaköu hoton e: ke e ame ûkhûnöng ka at Asera hia, me Zebulona, me Nafatali; me ödrin e be he ka ûkhanö mödrin.

³⁶ Ke Gideona ame ha ka Khong, ka habe, U je ne he ka omelö at Isaraela ge hnyamok helâ me hna ba gam,

³⁷ wâ bi, o ge me he ka ip leûnen mamoe hnyi hna huje hwit; ke ame ne hu khubet hon leûnen mamoe thibi, ke mada bi kânâ, awe, oge me he ka wâhmakhmeto a u me he ka omelö at Isaraela ge hnyamök helâ me hna ha gam.

³⁸ Ke ame helâe: anyin a e ame vesâ hnyi hnyomakatu, me hlec leûnen mamoe, me owa khubet ûnyi hnyi leûnen mamoe, ke ame unöngötö kaia ge köiö.

³⁹ Ke haba Gideona ame ha ka Khong, ka habe, ca he ka ubâhlâ ânyâm hmonyin könya, ke oge me be ka okhaca biju fuc: ö iny me he ka okhaca hmetu cubec ge leûnen mamoe; e so e he bi leûnen mamoe ka mada, ke ame he ka hu khubet bi hnyi kânâ hia.

⁴⁰ Me haba Khong ame ânyâ helâe hnyi lit eling: anyin ame mada thibi leûnen mamoe, ke khubet bi kânâ hia.