Owisa 5 - Iaai Bible 1901 (New Caledonia)

¹ ME haba Debora me Baraka nöku Abinoam, ödru me khumöng hnyi bong eling, ka habe,

² Anyin ame homakan je taben hnyi Isaraela, Ke haba tavat adre ka ve ham ödra bi me ca höcö Awe, Oganö Iehova.

³ Long ju öbun je than; tivehlöng ju öbun je taben; Me oge me he bi nya ka khumöng kö Iehova; Oge me he ka khumongö olungâ ko Iehova, Khongon at Isaraela.

⁴ Iehova lö, u me he ûheny Seira, U me he ûheny hnyi utkânâiny Edoma, Me ame öbubuny hmeledrany, kʼ ame ta but drany, Me ta but köiö ûnyi hnyi je ûlâ.

⁵ Ame o Iehova me ame bahihingölö je bucen, Wale Sinai, ke ame o Iehova Khongu Isaraela.

⁶ Hnyi ûö Samegara nöku Anath, Hnyi ûö Jaela, ke ba at hnyi je hna cit gethen, Ke ame he tavat hnyi je ong gethen.

⁷ Ame ba but je at musi hnyi Isaraela, e hiʼ ödrin, Ke ne o but oge me tot, a inya Debora, Me oge me tot, a ke hinyen hnyi Isaraela.

⁸ Ke adre me ûca je khong kanyua; Me ame o vat ka hnyi je homagöule: Hawa, e hu bec ame ne ö adre wâ Unyin je fâte thauzan hnyi Isaraela?

⁹ E bi hnyekuk unyin je taben hnyi hnyei Isaraela, Hnyat ödrin e ham ödrin bi me ca höcö: Oganö Iehova thö.

¹⁰ Ha manenâ e, öbun tavat tabâ je asina ae hau, Öbun tavat a laba hon je kubö ae mec, Me öbun tavat vheno gethen.

¹¹ Hnyi dok adre ca long medien tavat fana, hnyi je hna seköiö, Adre me he ka aû gaga eling je huliwa ae wisa anyi Iehova, A ta je huliwa ae wisa hnyi hnen hna musi hnyi Isaraela, Me ame he je aten Khong ka hnyi je homagöule,

¹² Debora lö, hmak dö, hmak dö; Hmak dö, hmak dö, hai thö khumöng: Baraka lö, nöku Abinoam todrö, me lelö bâ ânyâm je bâ.

¹³ Me ame ok ke kolon je taben, me tavat; Ke ame o könya Iehova, ûcon tavat ae hwege.

¹⁴ Ûhedrin hnyi Eferaima ke anyidra wân ûheny Amaleka; Kʼ ame he hotom Beniamina, aten em hnyei; Ke ame ok je taben ûheny Makir, Ke ûheny Zebulona tavat hok uciny at muso vat,

¹⁵ Ke e bi unyi Debora je than Isakara; Haba Isakara, me tha ûcû e me Baraka; Ödrin e wadring ka hnyi hnyigöulen bucen hnyi li can. Ke haba hnyi je deny je wagewe anyi Reubena, Me adre me ve sihwegiâ je hnyekudrin eling.

¹⁶ Ieû gam u me laba hnyi je haginy mamoe, He ka long hwan at ame hawâ je hnahat meno! Haba hnyi je deny wagewe anyi Reubena, Me waleling adre ti elâm je hnyok.

¹⁷ Gileada ame laba hnyi hoton Joridano: Ke ieû ga Dana, me e ame laba bala hon je hu? Ke ame laba baû Asera hnyi hobat köiö Me laba hnyi anyin je bwedua

¹⁸ Haba Zebulona me wale at ame hna anyin möt ka hnyi deny mok. Me Nafatali, hnyi je dok ae görany hnyi vat.

¹⁹ Ame o but je than me vat; Me ame vat je thaniny Kanana, Hnyi Tanaka hnyi je an hnyi Megido: Ödrin e ca hok mone me hwaban.

²⁰ Ödrin e vat ûheny hnyi drany A vat me Sisera je okhû hnyi je deny.

²¹ A hom degeci ödrin hnen wagewe Kisona, Hnen wagewe ehac, wale wagewe Kisona. Hanuk lö u je hia but uto ju at ae hwege.

²² Me ame uto but boûjimen can je hors Anyin a bibiâ hwege, a hwege bibiâ hnyat ae hwege gadrin

²³ Haingen angela anyi Iehova, ka habe, Hangö Meroza but, Hangâ hwegiâ but tavat adre me labā e; Anyin ödrin e ca o he ka hadruo Iehova, He ka hadruo Iehova unyin tavat ae hwege.

²⁴ Hnahic ut Jaela hon ta je momo, Wale öiö Heberu at Keni, E ame he ka hnahic hon ta je momo hnyi uma mano.

²⁵ E ame sumâtâ köiö, me e ame ham bi dân basin; E ame hom dân basin ae wahma hnyi kaia anyin than,

²⁶ E ame inâ hnyamen ka hnyi fao, Me hnyamen a metân ka hnyi hama anyin at huliwa; E ame kuc Sisera ge hama, e ame kot dâ oâ ban, E ame dâ me kot dâ oâ halelöûiny.

²⁷ Hnyi li can e ame nom, me ta, me mokut; Hnyi li can e ame nom, me ta, Hnyi hnen hna nom, wale e ame ta a mokcu.

²⁸ Ke ame selat momo hnyi mamalama me hongot, Wale hinyö Sisera, hnyi hnu pewanâ mamalama, ka habe, Ieû a bec gan he ka o anyin kariota? Ieû a bec gan je wil anyin anyin ta je kariota?

²⁹ Me ame thu kâu anyin je momo ae metâ, Ke e ame thu bi kâu, ka habe,

³⁰ Hawa, e ba wâhnodrin, adre tiga ca khenâ je hna hûgûnâ? Ame ne ûsa khaca hlu ka ke at me ke at, ame ne ûsa lo li hlu; Ke hnân hobi kö Sisera je khauen adre sei ae ve makan, Ae ve makan hna tibet omecin hnyi li hwenöiny, ûnyi hnyi nyin je hna sei?

³¹ Iehova lö, e so e he ka mok je iwahnaihmiöny mou hia helâe: Ke ame he tavat adre me hnyok kâu ka helâ me seûno ame he hnyi hwegien. Me ame menâ but hnyei ke ne o but fâte je huna.