Owisa 4 - Iaai Bible 1901 (New Caledonia)

¹ KE haba lakon Isaraela adre me ânyâ hmetoâ ûnyi ae kong hnyi hnyimakö Iehova, ke a mokcu Ehuda.

² Ke haba Iehova ame ûcû ödrin ka hnyi hnyamö Jabin than Kanana, at ame musi hnyi Hazora; ke Sisera taben anyin vat, at ame! laba hnyi Haroseth hnyi je hnyei.

³ Haba lakon Isaraela ödrin e tenge kö Iehova: anyin ae hu gan nain haded je kariota fao; ke twente je huna e ame hom ûhnyûkongo hwegiâ lakon Isaraela.

⁴ Ke haba Debora perofeta momo, öiö Lapidoth, e at owisa ka at Isaraela hnyi ûen e.

⁵ Ke e ame laba hmelen pama anyi Debora wanben Rama me Beth-ela hnyi hnyei ae hut hnyi Eferaima: ke lakon Isaraela adre me he kâu ka owisa.

⁶ Ke e ame ûkhûnöng ka hawo Baraka nöku Abinoam ûheny Kadesi-nafatali, me ha kâu, ka habe, Hawa, a ca ha Iehova Khongu Isaraela, ka habe, He thö, hok do ka hnyi bucen Tabora, ke tha hom mou ten thauzan laku Nafatali, me laku Zekulona?

⁷ Ke oge me he ka lelö köu ka hnyi wagewe Kisona, Sisera, taben vat anyi Jabin, me anyin je kariota, me anyin je utbavat; me oge me he ka hna e ka hnyi hnyamân.

⁸ Ke haingö Baraka, ka habe, U je ne he ka tha he mönya oge me he ka he; ke u je ne ca he ka tha he mönya, me oge me ca he ka he.

⁹ Haingen, ka habe, Oge ma hnyi he mou: ke so bi, ca hnân oganö u ûhem; anyin ame he Iehova ka hnö Sisera ka hnyi hnyamen momo. Ke ame todrö Debora me tha he me Baraka Kadesi ai.

¹⁰ Ke haba Baraka ame hawâ at Zebulona me Nafatali Kadesi ai; ke ödrin ten thauzan tavat adre tha he mē: ke Debora ame tha he mē.

¹¹ Ke haba Heberu at Keni ame ûsâkâûö me at Keni ehac, wale laku Hobaba ûngu Mose, ke e ame otilâ umen uma mano hnyi iwajo hnyi Zananim, hnyi baten Kadesi.

¹² Ke ödrin e thumetu Sisera, ka habe, E but Baraka nöku Abinoam ka hnyi bucen Tabora.

¹³ Me haba Sisera ame ûkhacaköuâ anyin ta je kariota hia, nain haded je kariota fao, me tavat hia unyin, ûheny Haroseth hnyi je hnyei, ka hnyi wagewe Kisona.

¹⁴ Ke Debora ame ha kö Baraka, ka habe, Todrö, anyin a walang bong ame he Iehova ka hnö Sisera ka hnyi hnyamâm: hawa, ame ca bö Iehova hnyi hnyimâkâm? Ke Baraka ame utut ûheny hnyi bucen Tabora ke ten thauzan tavat adre me hnu hoton.

¹⁵ Ke haba Iehova ame ohmöiöngi Sisera, me anyin ta je kariota hia, me anyin ta je utbavat hia, ge hele vat hnyi hnyimakö Baraka; ke Sisera ame utut ûheny hon anyin kariota, me kec hon kânâ.

¹⁶ Ke Baraka ame hnu je kariota me je utbavat, ke ne o but Haroseth hnyi je hnyei: ke ame ta but je utbavat hia thithö anyi Sisera ge hele vat, ke ba but kolon.

¹⁷ Ke so bi haba Sisera ame kec hon kânâ ka hnyi uma mano umo Jaela öiö Heberu at Keni: anyin ame laba so Jabin than Hazora, me lap anyi Heberu at Keni.

¹⁸ Ke haba Jaela ame he me ûkbanö me Sisera, me ha kâu, ka habe, Than lö saû ju, saû ju könya, ca ot bi. Me e ame saû kâu ka hnyi uma mano, ke e ame tube e ge kubö.

¹⁹ Ke haingen kâu, ka habe, Ö u habelik ge köiö; anyin a iny beic. Ke e ame oc hlinginy kaia a dân basin, me habelen e, me tube e.

²⁰ Ke haingen kâu, ka habe, U me he ka tot hnyi hwanuma, ke ame ne o thö ke at me hnei u, ka habe, E hu at ethö î u me he ka ha ka habe, E ba.

²¹ Ke haba Jaela öiö Heberu ame hom faoiny uma mano, me hom hama hnyi hnyamen, me he hmecik kâu, me thö fao hnyi halelöûiny, me ame dâ oâ ka hnyi kânâ; anyin a e ame mokut hnying me sënyin; me e ame mokcu.

²² Ke wâ bi, Baraka ame tiga hnu Sisera, me ame didrut Jaela he ka ûkhanö mē, me ha kâu, ka habe, He thö jem, me oge me he ka omanenâ köu at u me elâm. Ke e ame o but kâu, me wâ bi, ame mokut Sisera a mokcu, ke ka e faoiny uma mano hnyi li halelöûiny.

²³ Ke Khong ame oûhnyûkongu Jabin than Kanana hnyi bong eling hnyi hnyimakan lakon Isaraela.

²⁴ Ke haba hnyamen lakon Isaraela ame musi hmetu hu Jabin than Kanana, ke ne o but adre ohiö Jabin than Kanana.