Owisa 3 - Iaai Bible 1901 (New Caledonia)

¹ KE walang je hnyei Iehova ame onuâ mʼ ödrin e he ka cubic at Isaraela, a tavat adre ca hnyi wâ je vat hia hnyi Kanana:

² waleling me me khana je dö anyin lakon Isaraela he ka ûne vat ködrin, a tavat ödrin e ca hnyi wâ ehac:

³ walang faiv ta than Filisiti, me at Kanana hia, me at Sidona, me at Hivi adre me labā bucen î Lebanona, hwân hnyi bucen Baala-heremona ke ne o but hnyi gethen ame didro ka hnyi Hamath.

⁴ Ke haba tavat eling me hnân cubic at Isaraela me me he ka wâ hawa, ödrin e ne he ka hnu hoton je hnanyibu anyi Iehova, waleji a hûna ka lakamödra a deny Mose.

⁵ Me ame laba lakon Isaraela unyin at Kanana, me at Heth, me at Amora, me at Perizi, me at Hivi, me at Jebusi:

⁶ ke adre me hom lakudrin je hlu me me laöiödra, me ham lakudra bi je hlu ka lakudra obaga, me bi athnyabainy je khongudrin.

⁷ Ke haba lakon Isaraela adre me ânyâ hulö hnyi hnyimakö Iehova, me hnying Iehova Khongudrin, me bi athnyabainy je Baala me je Aseira.

⁸ Anyin a wale ame ubâhlâ hmonyin anyi Iehova ka at Isaraela, me e ame ûcû ödrin ko Kusani-risathaima than Mesopotamia: me lakon Isaraela adre me bi athnyabai Kusani-risathaima eit ta huna.

⁹ Ke ame tenge lakon Isaraela kö Iehova, me Iehova ame oâ ka lakon Isaraela at hnân omelö, ke e ame omeli ödrin, jia Otheniela nöku Kenaza kei Kaleba.

¹⁰ Ke ame mokut hon at e hanu Iehova, ke e ame owisa ka at Isaraela; ke e ame he ka vat, me haba Iehova ame hnö Kusani-risathaima than Mesopotamia ka hnyi hnyamen: ke e hwege hnyamen hu Kusani-risathaima.

¹¹ Ke ame menâ hnyei hnyi fâte je huna. Ke ame mokcu Otheniela nöku Kenaza.

¹² Ke ame ânyâ hmetu bi ûnyi ae kong hnyi huyimakö Iehova lakon Isaraela: ke Iehova ame siwhegiö Egelona than Moaba ka at Isaraela, can ödrin e ânyâ ûnyi ae kong hnyi hnyimakö Iehova.

¹³ Me e ame ûkhacaköuâ bi kâu laku Amona me Amabeka; me e ame he me kot Isaraela, me hûgûnâ tauniny je ûö pama.

¹⁴ Ke lakon Isaraela ödrin e athnyabai Egelona eitin je huna.

¹⁵ Ke ame tenge kö Iehova lakon Isaraela, me Iehova ame oâ ködrin at hnân omelö, jia Ehuda nöku Gera, at Beniamina, e at ae me benyin: ke haba lakon Isaraela ödrin e kunâ e me bwihlany kö Egelona than Moaba.

¹⁶ Ke Ehuda ame tibet hobi kâu e bi hele vat a lo li homakan, khaca kubit ibeûen; me e ame weikâ e eû hmelen anyin ûkhaû hnyi jevan a metân.

¹⁷ Ke e ame hom bwihlany kö Egelona than Moaba: ke at ae ti pipikhenya Egelona.

¹⁸ Ke a hia but ham bwihlany e ame kunâ hmetu tavat adre vadren bwihlany.

¹⁹ Ke habe e bi, e ame hmetu hmetu cicö je hnatheat hnyi Gilegala, me ha, ka habe, Than lö, e hu gak hofuc ae iyong köu. Ke haingen, ka habe, Laba hnyibû ju. Me ame he but hnyou ai tavat ödrin e tot unyin.

²⁰ Ke ame hok dö Ehuda kâu: ke e ame laba hnyi hnyeule ethö dok ae hu ang, ke e ame hake lap. Me haba Ehuda ame ha, ka habe, E hu gak hofuc hwan Khong köu. Me e ame todrö ûheny bon taben lap.

²¹ Me Ehuda ame inâ but hnyamen a me me oc ut hele vat ûnyi hnyi jevan a metân, me dâ hnyekon bi:

²² kʼ ame dit hele vat ke ne o but hnyi can; me ame khot ju pipikhenya hon hele vat, anyin a e ame ca oc hmeto hele vat ûnyi hnyi hnyekon; kʼ ame o but ka hnyi hoton.

²³ Me ame didrut Ehuda ka hnyi poretiko, me hlöng li hwanumen hnyeule ethö kâu, me kiâ.

²⁴ Ke e ame he but, me ame o lathnyabainy; me ödrin e wâ, ke wâ bi, adre hia but kiâ li hwanumen hnyeule ethö; ke baingödrin, ka habe, Ame ne tube li can la hnyi anyin hnyeule ethö.

²⁵ Ke ödrin e halubahingen ke ne o but ödrin e hmehma but: ke wâ bi e ame ca khong li hlinginy hwanumen hnyeule ethö; me ödrin e hom ki me khong: me wâ bi, a ta but anyidrin than kâû a ga mokcu.

²⁶ Ke ödrin e tiga halubahingen, me haba Ehuda ame kec, me he but hnyi hoton je hnatheat, me kec Seirath ai.

²⁷ Ke e ame he but me tûâ trutru hnyi hnyei ae hut hnyi Eferaima, me ame tha utut lakon Isaraela mē ûheny hon hnyei ae hut, ke e ame bân.

²⁸ Me e ame ha ködrin, ka habe, Hnu hotuk: anyin Iehova ame hna at Moaba je iwahnaihmiony ka hnyi hnyamöbun. Ke ödrin e utut mē, me tuö je dok ae cöcö hnyi Joridano ûcon at Moaba, ke adre me ca hna ke at a khaca ame he hanyâûâ.

²⁹ Ke ödrin e kot at Moaba hnyi ûen eling helâke ten thauzan tavat, tavat hia ae hunyin, ke tavat hia ae hwege; e ba at ame kec möt.

³⁰ Ke adre hom ûhnyûkongu Moab hnyi bong eling hmelen hnyamen at Isaraela. Ke ame i menâ hnyei eite je huna.

³¹ Ke hwaban e bi, me Samegara nöku Anath, haba at eling ame kot at Filisiti a! siks haded ge osö hnân alin bolok: me e ame omelö minya at Isaraela.