Owisa 21 - Iaai Bible 1901 (New Caledonia)

¹ KE haba at Isaraela ödrin e hia but khemanyin hnyi Mizepa, me ha, ka habe, Ame ca he ke at gatin ka ham nokon hlu ka at Beniamina me âiân.

² Ke ame o but tavat hnyi Beth-ela, me laba eling ke ne o but sahac hnyi hnyimakan Khong, ke ödrin e tenge thungaû gan hmâ.

³ Ke ödrin e ha, ka habe, Iehova lö, Khongu Isaraela, anyin a ieû ame o ûnyi eang hnyi Isaraela, a gʼ ame hia but hnyi Isaraela ke tribu hnyi bongʼ ang!

⁴ Ke nyi hnyomakatu, ame vesâkong tavat, me otilâ eling taben hut, me hudo je hudiny leû, me hudiny ûsoköu.

⁵ Ke haingen lakon Isaraela, ka habe, Ia hnyi je tribu anyi Isaraela hia ae tiga ca hnyi he ka hnyi ûkhacaköu kö Iehova, anyin a ödrin e hia but khemanyin hwege gan ae tiga ca hnyi he Mizepa ai kö Iehova, ka habe, Adre me he ka hlingâ e.

⁶ Ke haba lakon Isaraela ödrin e ietra ga Beniamina liamekeiny mödrin, me ha, ka habe, Khaca tribu adre subâ degecâ hnyi bong ang unyi Isaraela.

⁷ Ieû otin e he ka ânyâ hobi ködrin je kolon, me me hu laöiödrin, anyin otin e hia but khemanyin hnyi iö Iehova a otin e ca he ka ham ködrin lakutin je hlu me me laöiödrin?

⁸ Ke haingödrin ka habe, Ie tribu unyin je tribu Isaraela a ca hnyi he Mizepa ai kö Iehova? Ke wâ bi, ame ca o ke at ka hnyi hna hunuma ûheny Jabese-gileada ka hnyi ûkhacaköu.

⁹ Anyin adre aû tavat, me wâ bi, e ba at eling aten Jabese-gileada.

¹⁰ Ke haba ûkhacaköu ödrin e kunâ kâ e twelv thauzan tavat ae ti hwege, me hûna ködrin, ka habe, He thʼ öbun, me kot at Jabese-gileada tha e me je momo me wanakat ge hele vat.

¹¹ Ke walang ûnyi öbun e he ka ânyâ; öbun e he ka ohia obaga hia, me omomo hia a tha mwi me baga.

¹² Ke ödrin e wâ unyin at Jabese-gileada foa haded je hlu a ödrin tiga ca tha mwi me baga: ke ödrin e hum ödrin Silo ai ka hnyi hna hunuma hnyi hnyei Kanana.

¹³ Ke haba ûkhacaköu hia ödrin e ûkhûnöng he ka ûhnenamö me laku Beniamina, hnyi kic Rimona, me ha ûsoköu mödrin.

¹⁴ Ke ame hmetu Beniamina hnyi ûen eling; ke adre me ham ködrin je momo wale ödrin e omelö ûnyi ge omomoiny Jabese-gileada: ke ca ûcû ûseidrin bi.

¹⁵ Ke ame ietra tavat ga Beniamina, anyin a Iehova ame kia je tribu Isaraela.

¹⁶ Ke ame ha wahingatiny ûkhacaköu, ka habe, Otin e he ka hö me me hu laâiân je kolon, anyi adre ohia omomo ûnyi hnyi Beniamina?

¹⁷ Ke haingödra, ka habe, E so e hu jekhoû hobi kâu tavat kec möt hnyi Beniamina, me me ca he bi ke tribu ka hia hnyi Isaraela.

¹⁸ Ke ca khanʼ ohmun he ka ham ködrin lakuhmun je hlu me laöiödrin: anyin a hia but khemanyin lakon Isaraela, ka habe, Hnaûhango at ame he ka ham momo kö Beniamina.

¹⁹ Me Ödrin e ha, ka habe, Wâ bi, e hu bijeû anyi Iehova hnyi Silo hnyi je huna wale hnyi ke keihen Beth-ela, ke keihen e deiö gethen ame he Sekema ai ûheny Beth-ela, ke keihen Lebona ka hnyi hwai-öuiny.

²⁰ Ke adre me ha ka laku Beniamina, ka habe, He thʼ öbun, me mokut hnyi je hnyei vine:

²¹ ke wâ bi, ame ne didrut je hluiny Silo he ka bibiâ, me öbun e he ka o ûnyi hnyi je hnyei vine, me ve khot âiân je hluiny Silo, me he ka hnyi hnyei Beniamina.

²² Ke ame ne o je kamen me je hanidrin he ka haiʼ öbun kohmun, me ohmun e he ka ha ködrin, ka habe, Me betenge kohmun gadrin; anyin a ohmun e ca ve hok âiân hobi ködrin hnyi vat: ke haba khaca öbun e ca ham bi ködrin; anyin a wale e ba jönibun.

²³ Me haba laku Beniamina ödrin e ânyâ helâe me hom je momo hoton ûseidrin ûnyi ge tavat adre bibiâ, ke ödrin e hum ödrin: me ödrin e he me hmetu ka hnyi idrin, me op taun, me labā e.

²⁴ Ke ame vese ûheny e lakon Isaraela hnyi ûen eling ka hnyi je tribu me je hnyabadrin; ke ödrin e vese ûheny e ka hnyi je idrin.

²⁵ Ke haba hnyi ûen eling me ba than hnyi Isaraela: ke a ve ânyâ tavat hia ûnyi ae wisa ködrin bi.