Owisa 20 - Iaai Bible 1901 (New Caledonia)

¹ ME haba lakon Isaraela hia thithö adre me he, me ame ûkhacaköu tavat helâ me at a khaca, hwân hnyi Dana ke ne o but hnyi Bere-seba, a tha ödra me hnyei Gileada, unyi Iehova hnyi Mizepa.

² Ke e manen hnyi ûkhacaköu anyin aten Khong je taben tavat hia thithö wale hnyi je tribuiny lakon Isaraela hia, a foa haded thauzan tavat adre me he hon kânâ me hok hele vat.

³ (Ke haba laku Beniamina ödrin e long a gʼ ame he Mizepa ai lakon Isaraela.) Me haba lakon Isaraela adre me ûhaköuâ, ka habe, Më thumetu ohmun, adre me kâmâu ûnyi eang ae kong.

⁴ Me ame thu at Levi, a âiân momo adre hlingâ, ka habe, Oge o but hnyi Gibea anyi Beniamina he ka mokut, inya me anyik momo.

⁵ Ke ame todrö könya obagainy Gibea, me tot igigili nya hnyi uma hnyi hnyinghet; ke ödrin e ûnykûme he ka hlingö nya, me ödrin e okongo anyik momo, me ame mokcu.

⁶ Me oge me hom anyik momo, me susubâ, me kunâ e ka hnyi je hnyei hia iny at Isaraela: anyin a ödrin e ânyâ ûnyi ae ikiki me monu hnyi Isaraela.

⁷ Wâ bi, öbun hia lakon Isaraela, ûhanyinyâ ju me oâ but hobun hofuc.

⁸ Ke haba tavat hia thithö ödrin e tha tot helâ me at a khaca, me ha, ka habe, Ame ca he ke at gatin ka hnyi umen uma mano, ke ame ca he ke at gatin ka hmetu ka hnyi hnyaban.

⁹ Ke walang ûnyi otin e he ka ânyâ ka Gibea; adre me he ka he ûcon hoton leköp;

¹⁰ ke otin e he ka hom tavat a ten ûnyi hnyi haded hnyi je tribu hia anyin at Isaraela, me khaca haded ûnyi hnyi thauzan, ke khaca thauzan ûnyi hnyi je ten thauzan, he ka hok kamejin tavat, me adre me he ka ânyâ helâ meʼ anyidrin monu ödrin e ânyâ hnyi Isaraela, ödrin ka o but hnyi Gibea hnyi Beniamina.

¹¹ Me ame ûkhacaköu at Isaraela hia cicö taun, kʼ adre tha hnyok helâ me at a khaca.

¹² Ke haba je tribu anyin at Isaraela ödrin e kunâ tavat ka hnyi wanben tribu anyi Beniamina hia, he ka ha, ka habe, le unyi e ae kong adre ânyâ unyibun?

¹³ Ke walang ang, hom but jem je atö Belial hnyi Gibea, mʼ ohmun e he ka hlingʼ ödrin, me ohia hulö hnyi Isaraela. Ke höcö laku Beniamina he ka long hofuc hwan je liamekeiny mödrin a lakon Isaraela.

¹⁴ Ke haba laku Beniamina ödrin e ûkhacaköu hnyi Gibea ûnyi hnyi je taun, he ka vat me lakon Isaraela.

¹⁵ Ke adre aû laku Beniaminâ hnyi bong eling ûnyi hnyi je taun, ödrin twente siks thauzan tavat adre me hok hele vat, ke ca ha bi at Gibea haba ûseidrin ödrin seven haded tavat adre ûca.

¹⁶ Ke e unyin tavat hia eling me hu tavat a seven haded adre ûca, a hnyat ae me benyidrin; ke khanʼ ödrin he ka kûlûâ je veto ka hnyi leûnen ban me ca onua bi.

¹⁷ Ke adre aû at Isaraela, ke ca ha bi at Beniamina, me, foa haded thauzan tavat hok hele vat, a tavat vat hia.

¹⁸ Ke ame todrö lakon Isaraela, me he Beth-ela ai, me elâm unyin Khong, me ha, ka habe, Hamö ia he ka bân me vat me laku Beniamina? Me Iehova ame ha, ka habe. Bân at Juda.

¹⁹ Me ame vesâkong lakon Isaraela me hunuma cicö Gibea.

²⁰ Me ame he lakon Isaraela me vat me at Beniamina; ke ame tot metâ ködrin at Isaraela hnyi Gibea.

²¹ Me ame didrut laku Beniamina ûheny hnyi Gibea, me kot hnyikânâi hnyi bong eling twente tu thauzan at Isaraela.

²² Ke haba tavat a lakon Isaraela ödrin e sihwegiödrinköuödrin, me tot metâ hmetu he ka vat hnyi dok ödrin e tot metâ hnyin hnyi bong a bân.

²³ (Ke ame he lakon Isaraela me tenge hnyi hnyi-makö Iehova ke ne o but hnyi sahac; ke ödrin e hnei Iehova me ha, ka habe, Hawa, oge me he hmetu he ka vat me laku Beniamina je liamekeiny mönya? Ke Iehova ame ha, ka habe, He thö ködrin.)

²⁴ Me haba lakon Isaraela ödrin e hakekenyâ laku Beniamina hnyi bong a loiny.

²⁵ Me ame he Beniamina ködrin ûheny Gibea hnyi bong eling a loiny, me kot hnyikânâi eitin thauzan minya lakon Isaraela, a hnyat hok hele vat hia.

²⁶ Me ame he lakon Isaraela hia me tavat hia, me o hnyi Beth-ela, me tenge, me laba e hnyi hnyimakö Iehova, me ca han hnyi bong e ke ne o but sahac; me ödrin e hudo je hudiny leû, me je hudiny ûsoköu hnyi hnyimakö Iehova.

²⁷ Ke haba lakon Isaraela ödrin e elâm unyi Iehova (anyin a eling tangen ûhihinyköu anyin Khong hnyi je bong eling,

²⁸ ke haba Fineasa nöku Eleazara, nöku Arona at ame tot hnyi hnyimakan hnyi ûen e,) me ha, ka habe, Hawa, oge me he ka he hmetu he ka vat me laku Beniamina je liamekeiny mönya, hawa, ame ne hna ju? Ke haingö Iehova, ka habe, He thö, anyin oge me he ka hnʼ ödrin nyi ka hnyi hnyamâm.

²⁹ Ke haba at Isaraela ödrin e kunâ tavat he ka mokulec igigilo Gibea.

³⁰ Ke haba lakon Isaraela ödrin e he ka ûcon laku Beniamina hnyi bong a kuniny, me tot metâ me at Gibea, helâ me li ûen a bân.

³¹ Ke ame didrut laku Beniamina ka tavat, ke adre lili ödrin ûheny hnyi taun; me ödrin e hwân he ka kot tavat, me hlingâ helâ me li bong a bân, hnyi li gethen, khaca ûheny Beth-ela, ke khaca ûheny Gibea, hnyi hnyei, helâ me thöte at Isaraela.

³² Ke haingen laku Beniamina, ka habe, adre kuc ödrin hnyi hnyimakötin helâ me a bân. Ke haingen lakon Isaraela, ka habe, Otin e he ka kec me köc ödrin ûnyi hnyi taun, ka hnyi je gethen.

³³ Ke ame todrö at Isaraela hia thithö, ûnyi hnyi je hnödrin, me tot metâ hnyi Baala-tamara: ke ame utut tavat mokut anyin at Isaraela ûnyi hnyi je hnödrin, wale hnyi Maare-gibea.

³⁴ Ke i ame he ka tet metâ me Gibea ödrin ten thauzan je hna ûca a lahanen at Isaraela hia, ke gan hmâ hna vat, ke ca khanʼ Ödrin ae hakekenyi ödrin dut ûnyi ae kong.

³⁵ Ke haba Iehova ame kot at Beniamina hnyi hnyimakan at Isaraela; ke haba lakon Isaraela ödrin e ota hnyi bong eling at Beniamina, ödrin twente faiv thauzan ke wan haded: tavat hok hele vat hia.

³⁶ Ke a wâ but laku Beniamina a gʼ adre kuc ödrin dut: anyin a at Isaraela ödrin e kâcâ vat anyin at Beniamina, anyin a ödrin e labageju ka je mokut, wale adre ip cicö Gibea.

³⁷ Ke logot je mokut, me utut Gibea ai; ke haba je mokut ödrin e iyâwâ hon kânâ, me kot hia taun ge hele vat

³⁸ Ke e hu haten ka at Isaraela, me je mokut, a ödrin e he ka oâ hainy mec helâ me ûlâ ae gan ûnyi hnyi taun.

³⁹ Ke haba at Isaraela ödrin e kâcâ vat, me ame hwân at Beniamina ka kot me hlingâ at Isaraela helâke thöte je hnyat: anyin a haingödrin, ka habe, E hnathu adre kuc ödrin huyi hnyimakötin helâ me vat a bân.

⁴⁰ Ke ame hwân he ka ölö ûlâ ûnyi hnyi taun, wale hai ame tot, haba at Beniamina ödrin e hngele hotudrin ai, ke wâ bi, haba taun hia ame ölö hnyidranyai ge han

⁴¹ Ke haba at Isaraela ödrin e hwio me ame gâ on at Beniamina: anyin ödrin e wâ a ga o but ködrin ûnyi ae kong.

⁴² Anyin a wale ödrin e kec ge at Isaraela hnyi gethen ûheny hnyebuba; kʼ ame hnu ödrin bi vat; ke haba tavat ûheny hnyi taun, me adre me hlingʼ ödrin hnyi wanben.

⁴³ Me adre me thelöng at Beniamina, me hnu ödrin, me uti ödrin ju hnyi anyidrin dok hnân menâ, ke ne o but cicö Gibea cicö hna o hnen seûno.

⁴⁴ Ke ame ta but at Beniamina a ödra eitin thauzan tavat; a je hnyat ae hwege hia.

⁴⁵ Ke ödrin e saû me kec hnyebuba ai ka hnyi kic Rimona: ke adre me hlu ödrin eû hnyi je gethen a ödrin faiv thauzan; ke ödrin e hnu ödrin ke ne o but Gidom, me kot lo li thauzan gadrin.

⁴⁶ Ke a ta hnyi bong eling a at Beniamina hia, ödrin twente faiv thauzan tavat hok hele vat; ödrin hia tavat ae hwege.

⁴⁷ Ke ame saû me kec hnyebuba ai ka hnyi kic Rimona tavat a siks haded, me laba hnyi kic Rimona vak ta tehi.

⁴⁸ Me ame hmetu at Isaraela ka laku Beniamina, me kuc ödrin ge hele vat, wale taun hia thithö, me omeno, me ta je ûnyi hia ödrin e wâ: ke ödrin e thong minya ge meic je taun hia ödrin e wâ.