Owisa 19 - Iaai Bible 1901 (New Caledonia)

¹ KE haba hnyi je bong eling ae ba than hnyi Isaraela, me hu ke at Levi ame laba kanyua hnyi ke keihen hoton hnyei ae hut hnyi Eferaima, at ame hom anyin momo ûnyi hnyi Bethe-leema-juda.

² Ke ame bi unyi monu anyin momo, me kec gan ka hnyi hnyaban kamen hnyi Bethe-leema-juda, me e ame laba eling vak ta tehi.

³ Me ame todrö âiân baga me he hoton he ka ûhnenamö wia mē me hom hmetu bi, ke e unyin athnyabainy me li asina: ke haba momo ame hom e ka hnyi uma umen kamen: ke a wâ e kamen momo, me e ame senyin he ka iouny mē.

⁴ Me ûngon ame thawâ e, wale kamen momo; me e ame tha laba mē hnyi kun ta bong: me ödrin e tha han, me ic, me mokut eling.

⁵ Ke haba hnyi bong a vakiny ödrin e vesâkong, me e ame todrö he ka he: ke ame ha kâu ûngon a kamen momo, ka habe, Me okahwa hnyekom ge jeu, ke hwaban thö e he thʼ öbun.

⁶ Me ödru me laba me tha han me tha ic: ke haba kamen momo ame ha ka at, ka habe, Ö u me laba ju me mokut, me me he ka senyin hnyekom.

⁷ Ke haba at ame todrö he ka he, me ûngon ame ûjengöâ, me e ame mokut hmetu eling.

⁸ Ke e ame vesâ hnyi hnyomakatu hnyi bong a thabûnginy he ka he: me ame ha kamen momo, ka habe, Ö u me okahwa thö hnyekom, me laba ju ke ne o but sahac; me ödru me tha han.

⁹ Me ame todrö at he ka he me anyin momo me athnyabainy, me ame ha kâu ûngon a kamen momo, ka habe, Wâ bi ame he but ang ka dit seûno, ö u mokut hmetu ju: wâ bi a he but ka lit ut, mokut ju eang, me me he hnyekom ka senyin; ke öbun e he ka vesâkong me he me o ka hnyi hnyabam.

¹⁰ Ke höcö bi baga he ka mokut hmetu, me e ame tot me he, me e ame o hnyi hnyei cicö Jebusi (wale Jerusalema): ke e unyin li asina adre hûkâlâ li taben hudru; me anyin minya momo.

¹¹ Ke ödrin e o hnyi Jebusi hnyi hauhaotreng; ke haingen athnyaba ka tuhan, ka habe, Ö otin saû ka hnyi taun ang anyin at Jebusi me mokut eling.

¹² Me ame ha kâu tuhan, ka habe, Otin e ca he ka saû ka hnyi taun kanyua, a ca hanen laku Isaraela, ke otin e he ka he Gibea ai.

¹³ Ke haingen ka athnyabainy, ka habe, Ötin e he ka saû ka hnyi ke dok eang; ke ötin e he ka mokut hnyi Gibea, ame ne Rama.

¹⁴ Ke ödrin e he bala bi; ke ame dit ködrin seûno hnyi Gibea hnyi Beniamina.

¹⁵ Ke ödrin e saû kâ e, he ka mokut hnyi Gibea: ke e ame didro me laba hnyi getheniny taun: anyin ae ba at ame haw ödrin ka hnyi umen uma he ka mokut.

¹⁶ Ke wâ bi, wale ke hingat ame o ûheny hnyi anyin huliwa hnyi ta hnyei hnyi sahac; haba at eling aten hnyei ae hut hnyi Eferaima, ke ame laba kanyua hnyi Gibea: ke so bi at Beniamina, je aten taun.

¹⁷ Ke e ame bwele me wâ hnyi getheniny taun at ûheny hnyi hna he; ke haingen hingat, ka habe, u me he kâ? ke ûhem ua?

¹⁸ Ke haingen kâu, ka habe, Ûhehmun Bethe-leema-juda, ke ohmun e he ka hnyi ke keihen hnyei ae hut hnyi Eferaima; ûhek e, me oge me he Bethe-leema-juda ai: ke oge me he but ka hnyi uma umo Iehova; ke ba at ame hawo nya ka hnyi umen uma.

¹⁹ Ke so bi e hu thatûnyin hwit me an asina minya, ke hu areto me waina hobi könya, me athnyabaem a momo, me hidröu unyihmu a li athnyabaem: e ba ûnyi ae hia.

²⁰ Ke ame ha hingat, ka habe, E so u me hnahic; ke ha-mök he ka ô u; ke so bi ca mokut bi eû hnyi gethen.

²¹ Ke e ame hom e ka hnyi umen uma, me bân li asina: ke ödrin e hneû je li cadrin, me han, me ic.

²² Ke ödrin e tiga osenyinâ je hnyekudrin, wâ bi, je aten taun, a je atö Belial, ödrin e tot igigilo uma, me kot hwanuma; me ha ka at ae tren uma, wale hingat, ka habe, Hom but jem at a he ka hnyi umâm uma, me me ûkhanöhmumköu thö.

²³ Ke ame didrut ködrin at, wale ae tren uma, me ha ködrin, ka habe, Ohe, je liamekeiny mönya, ö öbun ca ânyâ bi ûnyi ae kong eling; anyin a o but at ang ka hnyi umök uma, ca he ka ânyâ ûnyi eang ae kong.

²⁴ Walang nokuk ae tiga hlu, me momo anyin baga oge me he ka hum ödru köbun, mʼ öbun e okongu ödru, me ânyâ ködru webun: ke ca ânyâ bi ka at ang ûnyi e ae ikiki.

²⁵ Ke höcö bi tavat he ka long kâu: ke haba at, me e ame kât anyin momo, me hom e ködrin eû; ke ödrin e tha mē, me okongoâ hnyi lit ke ne o but hnyomakatu; me ödrin e hna but hnyi haolany.

²⁶ Ke ame o thö momo hnyi haolany, me ta ju hnyi hwanuma umen at a e hnyin âiân, ke ne o but ame lany dö.

²⁷ Ke ame todrö âiân hnyi hnyomakatu, me khong ut je hlinginy hwanumen, me didrut he ka he; ke wâ bi a ta but momo, a anyin momo, eû hnyi hwanuma, me li hnyamen hon hwanuma.

²⁸ Ke haingen kâu, ka habe, Todrö, mʼ otin e he; me ame ca thu bi: me e ame kât momo me ip hon asina; ke ame todrö at me he ka hnyi hnyaban.

²⁹ Ke e ame o but ka hnyi umen uma, me e ame hom hele, me kât anyin momo, me susuba e me je jeien, me me twelv je uthat, me kunâ ka hnyi je ke keihen Isaraela hia.

³⁰ Me haingödra hia thithö tavat adre me wâ, ka habe, E ba ûnyi helâe adre ânyâ me wâ, hwân hnyi bong ame he jem lakon Isaraela ûheny Aigupito ke ne o but hnyi bong ang: ûnykûme ju, me ûbanyinyâ ju, me ba ju.