Owisa 18 - Iaai Bible 1901 (New Caledonia)

¹ KE hnyi ûen eling me ba than hnyi Isaraela: ke hnyi je bong eling haba tribu Dana ödrin e eleû idrin he ka labā; anyin adre tiga ca khenâ ködrin idrin unyin at Isaraela ke ne o but bong eling.

² Ke haba laku Dana, ödrin e kunâ je hnyat ûnyi hnyi anyidrin lap a ödrin faiv, ûnyi hnyi ûseidrin hia, a je hnyat ae hwege, ûheny Zorea, me Esetaol, he ka ecmâkâ hnyei, me elâm e; ke ödrin e ba ködrin, ka habe, He thö ka elâm hnyei: ke ödrin e o but ka hnyi hnyei ae hut hnyi Eferaima, hnyi uma umo Mika, me ödrin e mokut eling.

³ Ke tiga ödrin hnyi baten uma umo Mika, ödrin e lönghmakhmetoâ ifucin hidröu at Levi; me ödrin e saû kâ e, me ha kâu, ka habe, Ia hum u jem? ke ieû hûdrâm eang? ke ieû ânyâm eang?

⁴ Ke haingen, ka habe, Helâng me helâe ame ânyâ könya Mika, ke e ame he ka bi hwa-bök, ke inya ang anyin at bihut.

⁵ Me ödrin e ha kâu, ka habe, Ö u elâm dö unyin Khong me me khanʼ ohmun dö ame ne he ka hnahic ûhehmun.

⁶ Ke ame ha ködrin at bihut, ka habe, He thö me hnahic: e hnyi hnyimakö Iehova debun gethen öbun e he ka vheno.

⁷ Me ame he but hnyat a ödrin faiv, me o hnyi Laisi, me wâ tavat hnyin e a ödrin e laba so helâ me at Zidona, a hnahic ut me khötkic; anyin ae ba at musi hnyi hnyei me me thawâ ta je ûnyi, he ka oh-mehmʼ ödrin hnyi ta je ûnyi; ke ödrin e ûsâkâûö me at Zidona, ke ba ûnyi anyin ke at ka ke at.

⁸ Ke ödrin e o but ka je liamekeiny mödrin hnyi Zorea me Esetaol; me ame ha ködrin je liamekeiny mödrin, ka habe, Hawa gabun?

⁹ Ke haingödrin, ka habe, Todrö, me otin e he ködrin, anyin a ohmun e wâ hnyei, ke wâ bi, e ti so; ke ieû gabun öhun e laba ju? ca bec bi he ka he, me he thö ka hu hnyei.

¹⁰ Öbun ka he, öbun e he ka o ka tavat adre laba khötkic, ke lau but hnyei; anyin a Khong ame ham e köbun; hnyei ae ba ke ûnyi ae hia hnyin eang hmeledrany.

¹¹ Ke ame he ûheny e ûnyi hnyi lap anyi Dana, a ûheny Zorea, me Esetaol, ödrin hnyat a siks haded ae ve hu omjehen vat.

¹² Ke ödrin e be me hunuma hnyi Kiriatha-jarim hnyi Juda: anyin a wale adre me hwenyi ien dok eling me Mahane-dana ke ne o but hnyi bong ang: wâ bi e hnyi hoton Kiriatha-jarim.

¹³ Ke ödrin e be ûheny e ka hnyi hnyei ae hut hnyi Eferaima, me o hnyi uma umo Mika.

¹⁴ Me ame fuc tavat a thabûng hnyat ödrin e ecmâkâ hnyei Laisi, me ha ka je liamekeiny mödrin, ka habe, Hawa, e khanʼ öbun a gʼ ame hu iefoda hnyi je uma eang, me je idola, me hnatheat adre tretrao, me hnatheat adre oköiâ? Ke walang ang wâhmakhmeto ju öbun ûnyi he ka ânyâ.

¹⁵ Me ödrin e saû thö kâ e, me o ka hnyi uma umen hidröu a at Levi, wale uma umo Mika, me iouny mē.

¹⁶ Ke haba tavat a siks haded ae ve hu omjehen vat, a laku Dana, ödrin e tot hnyi homagöule.

¹⁷ Me ame he hnyat a thabûng a hnyat ecmâkâ hnyei, me didro, me hom hnatheat adre tretrao, me iefoda, me je idola, me hnatheat adre oköiâ: ke ame tha tot at bihut hnyi homagöule me tavat a siks haded ae hu omjehen vat.

¹⁸ Ke ame didro hnyat eling ka hnyi uma umö Mika, me hom hnatheat adre tretrao, me iefoda, me je idola, me hnatheat adre oköiâ, me haingen at bihut ködrin, ka habe, Ieû öbun e ânyâ?

¹⁹ Me haingödrin kâu, ka habe, Ca mede, ip ju hnyamâm ka hnyi hon hnyimâm, me tha he möhmun, me u ma he ka bi kamöhmun me ânyâ hanymen at bihut unyihmun: hawa, e so köu he ka ânyâ hanymen at bihut hnyi lap anyin at a khaca, ke hawa, he ka bi hut ka tribu me lap anyi Isaraela?

²⁰ Me ame senyin hnyekon at bihut, me e ame hom iefoda, me je idola, me hnatheat adre tretrao, me he hnyi wanben tavat.

²¹ Me ödrin e hwio me he, me ip tavat ae ûhnyûkong, me je meno, me ta je ûnyi hnyi hnyimaködrin.

²² Ke ödrin e sâkâû but ûheny hnyi uma umo Mika, haba tavat hnyi je uma hakekenyâ uma umo Mika, ödrin e ûkhacaköu, me khöû laku Dana.

²³ Ke ödrin e hongot ka laku Dana. Ke ödrin e hwio me ha kö Mika, ka habe, Ieû gam u me tha he me bunyen helâe?

²⁴ Ke haingen, ka habe, Öbun e hia but hom anyik je khong wale oge ânyâ, me anyik at bihut, me öbun e he, ke ieû biju könya? ke ieû e öbun e ha könya, ka habe, Ieû gam?

²⁵ Me ame ha kâu laku Dana, ka habe, E so adre me ca long hwâm hofuc unyihmun wâ e nye kuc u thö tavat ae hmönyin, me u me he ka mok me ânyâm lap.

²⁶ Me ame he balua bi laku Dana: ke a wâ but Mika a ödrin hwege hon, me e ame hwio thö me hmetu ka hnyi hnyaban.

²⁷ Ke ödrin e hom je ûnyi a ânyâ Mika, me anyin at bihut, me o but Laisi, ka tavat adre me laba so me khötkic, me kuc ödrin ge hele vat; ke ödrin e thong taun ge meic.

²⁸ Ke ba at ûhomeli, anyin ae ûsâkâûö e me Zidona, ke ba hna iouny me ke at; ke e hnyi hnyigöulen bucen e. Bethe-rehob. Ke ödrin e otilâ taun me labā e.

²⁹ Ke ödrin e hwenyi ien taun Dana, hoton ien kamödrin Dana, wale a hnöku nöku Isaraela: ke so bi Laisi ien taun ehac.

³⁰ Ke haba laku Dana ödrin e otilâ hobi ködrin hnatheat adre tretrao: ke haba Jonathana, nöku Geresoma, nöku Mose, e me lakon a hnyat bihut anyin tribu Dana ke ne o but bong adre hom hwenbâ hnyei.

³¹ Ke ödrin e otilâ hobi ködrin hnatheat adre tretrao anyi Mika, wale e ame ânyâ, hnyi ta je bong hia wale a e bi hnyi Silo uma umen Khong.