Owisa 16 - Iaai Bible 1901 (New Caledonia)

¹ KE Samasona ame he Gaza ai, me e ame wâ eling momo hnyi gethen, ke e ame didro kâu.

² Ke adre me thumeto at Gaza, ka habe, E but ang Samasona. Me ödrin e igigilöâ, me mokulic e hnyi lit hia hnyi homagouleny taun, me ca mede hnyi lit hia, ke haingödrin, ka habe, Otin e he ka hlingâ e hnyi haolany.

³ Ke haba Samasona ame mokut ke ne o but wanbenset, me ame todrö hnyi wanbenset, me kât li hlinginy homagouleny taun, me li utho-magöulen me tha hom e me li venyainy, me vadren e bon li bajebenyin, me öliâ ka hnyi bucen cicö Heberona.

⁴ Ke hwaban e e ame betenge ge ke momo hnyi hnyigöulen bucen Sorek, Delila ien.

⁵ Me ame he ka momo je thaniny at Filisiti, me ha kâu, ka habe, U me he ka ûjengö e, me me khanʼ otin can anyin hwege ae gan, me ohmun e be ka kâmâu he ka hwege hon, me me khanʼ ohmun he ka ca e me hom ûhnyûkongoâ: ke ohmun e he ka ve ham köu je silva a eleven haded.

⁶ Me haba Delila ame ha kö Samasona, ka habe, Ö u me ha thö könya ewa dok ame laba hnyin ânyâm hwege ae gan, me adre me he ka cö u hnen ieû mʼ adre me hom ûhnyûkongu u.

⁷ Ke haingö Samasona kâu, ka habe, Ödrin e ne he ka cö nya ge je tö a seven ae hat a ga ca mok bi, me oge me he ka sënyin me helâ me ke at.

⁸ Haba je thaniny at Filisiti ödrin e hom ka momo je tö a seven ae hat a ga ca mok bi, ke e ame ca e ge je tö.

⁹ Ke e hu tavat mokulec e ûnyi hnyi ke hnyeule. Ke e ame ha kâu ka habe, Samasona, at Filisiti but ang. Me e ame thamuâ je tö, helâ me hna thamuâ wakunenu ame kâlâ meic. Ke ca khanʼ ödrin anyin hwege.

¹⁰ Ke haingö Delila kö Samasona, ka habe, Wâ bi, u je iyawö nya, me thoi kônya: ö u ha thö könya ûnyi hnân cö u.

¹¹ Ke e ame ha kâu, ka habe, Ödrin e ne cö nya ge je tö ae teb ûnyi, ke ödra tiga ca huliwan, me oge me he ka sënyin me helâ me ke at.

¹² Haba Delila ame hom je tö ae teb ûnyi, me ca e, me ha kâu, ka habe, Samasona at Filisiti but ang. Ke wale je at mokulec, ödrin e laba eû hnyi hnyeule. Me e ame thamuâ je tö ûnyi hnyi li benyin, helâ me ûtö.

¹³ Ke haba Delila ame ha kö Samasona, ka habe, U je iyawö nya ke ne o but walang ang, ke u je thoi könya: ha thö könya ûnyi hnân cö u. Me e ame ha kâu, ka habe, U je ne he ka tha hwâmâ je obmuök a seven me je tö ame tot.

¹⁴ Me e ame ohmâ e ge ong fao, me ha kâu, ka habe, Samasona, at Filisiti but ang. Ke e ame hmak dö ûheny hnyi hna mokut, me oc ut ûnyi hnân hwâwâ mano me je tö ame tot.

¹⁵ Me e ame ha kâu, ka habe. Ieû gam u me ha, ka habe, Oge me betenge gam, ke ca tha hnyekom bi mönya? u je okun dut iyawö nya me ca ha könya can ânyâm hwege.

¹⁶ Ke e ame labö ûjengö hnyi je bong ge hwan hofuc, me huliwa gan, me e ame mok ge hna ûjengö.

¹⁷ Me e ame ha ka momo hnyekon hia, me ha kâu, ka habe, Adre tiga ca ip heleûge ka hnyi hon bök; anyin adre Onazeri nya ka Khong ûnyi hnyi hnyeku bai: ke adre ne giâ bök me ame he ka hia unyik tang hwegiök, me oge me he ka sënyin, helâ me ke at bi.

¹⁸ Ke a wâ but Delila a ga hia but ha kâu hnyekon hia, me e ame ûkhûnöng he ka hom je thaniny Filisiti, me ha ködrin, ka habe, Ai öbun walang ang, anyin a e ame ha könya hnyekon hia. Me ame o kâu je than Filisiti, ke ödrin e hom mone hnyi je hnyamödrin.

¹⁹ Me momo ame hawâ e ka mokut me ban hon jevan; me e ame hawâ ke at he ka subâ je ohmuen ban a seven, me e ame hwân he ka hom ûhnyûkongoâ, me ame he but tang hwegien ûnyi gan.

²⁰ Ke e ame ha, ka habe, Samasona at Filisiti but ang. Me e ame hmak dö ûheny hnyi hna mokut, me ha, ka habe, Oge me he ka didrut helâ me je ûen ehac, me inye lilöhlöu but, Ke ca khana a ga hiö Iehova but unyin.

²¹ Me ame kât e at Filisiti me ûâ li emakan; me ödrin e hom a Gaza ai, me ca e ge je tö a bras; ke haba hanymen hnyi kalebus me he ka khenyo ta je ûnyi.

²² Ke ame hwân he ka kû hmetu leûnen ban hwaban hna subâ.

²³ Ke haba je tuhan at Filisiti ödrin e ûkhacaköu he ka hudo hut ae gan kö Dagona a khongudrin, me he ka senyin: anyin a haingödrin, ka habe, a hia but khongutin hnö Samasona a iwahnaihmiony mötin ka hnyi hnyamötin.

²⁴ Ke ame wâ hnen tavat me ödrin e ogânâ khongudrin: anyin a haingödrin, ka habe, Hnen khongutin hna hna iwahnaihmiony mötin ka hnyi hnyamötin a at ame okongo itin hnyei, me hlingâ tavat ae se hia gatin.

²⁵ Ke ame senyin dut je hnyekudrin, me ödrin e ha, ka habe, Hawo Samasona me me ûhiö kötin. Me ödrin e hum Samasona ûnyi hnyi kalebus; me e ame ûhiö ködrin: ke ödrin e otilâ e hnyi wanben je hmolom.

²⁶ Haba Samasona ame ha ka hidröu at ame kât hnyamen, ka habe, Me hnö nya but he ka kâlâ je hmolominy uma, me inye he ka tot inyifâlâ.

²⁷ Ke unöngötö uma ge obaga me omomo; ke wale je tuhan at Filisiti hia; ke theri thauzan obaga me omomo ethö hnyi hon uma, ödrin e ö Samasona ame ûhiö.

²⁸ Haba Samasona ame haö Iehova, ka habe, Iehova Khong lö, ö u ûnykûme könya, me okhaca hmetu bi owhegiö nya, Khong lö, me inye he ka bi hwaban li emakök ka at Filisiti.

²⁹ Ke haba Samasona ame kât li hmolom eû hnyi wanben uma, wale ame kap uma, me tot inyifâlâ, khaca ge benyin a metâ, ke khaca ge benyin a me.

³⁰ Ke haingö Samasona, ka habe, Oge me he ka tha mok me at Filisiti. Ke e ame nom hnyikânâi me hwegien hia; me ame û but uma, me takoû je than me tavat hia. Ke haba je komok e ame hlingâ hnyi anyin mok me beönua hon je hna hlingâ ke tiga möt.

³¹ Me ame he je liamekeiny mê me lap anyin kamen hia, me hom e, me vadren, me konâm wanben Zorea me Esetaol hnyi hu Manoa a kamen. Ke e ame owisa ka at Isaraela twente je huna.