Owisa 15 - Iaai Bible 1901 (New Caledonia)

¹ KE haba hnyi ke bong, hnyi ûen meno hwit, haba Samasona ame o ka âiân me nokon got: ke haingen, ka habe, Oge me he ka he ka äiök eû hnyi hnyeule, ke ame ca hna e kamen he ka didrö.

² Ke haingen kamen, ka habe, Oge me ûnykûme a u me ikiki gan; me oge me ham e ka hânâm: hawa e ca so hmainy keiny hon! ö u hom dö e me hwaban.

³ Ke haba Samasona ame ha ködrin, ka habe, E ba kongik walang ang, iny ka he ka okongoâ at Filisiti.

⁴ Ke Samasona ame he me kât kun ta haded je alope, me hom je okûnû, me ûobinyâköuâ ûsa lo, me ve ip je okûnû wanben li obiny.

⁵ Ke ame hia but vâc je okûnû ge meic, me e ame hnʼ ödrin ka hnyi hwit ame tot anyin at Filisiti, me ame hiâ hwit adre khon, me hwit ame tot, me je hnyei elaio minya.

⁶ Ke haingen at Filisiti, ka habe, Ia ame ânyâ e? Me ödrin e thu, ka habe, Hnö Samasona ûngon at Timinatha, anyin a e ame hom âiân, me ham ka hanen. Haba at Filisiti ödrin e he me thong hlu me kamen ge meic.

⁷ Ke haingö Samasona ködrin, ka habe, öbun e ne ânyâ helâe, e hnathu oge me he ka bi hwaban, ke ka um dö e soju.

⁸ Me e ame kuc ödrin je can me jevan, e gan hmâ hna kuc ödrin, me e ame he me laba hnyi khekheiny kic hnyi Etama.

⁹ Me ame ölö thö at Filisiti me hunuma hnyi Juda, me avâ Lehi.

¹⁰ Ke ame ha at Juda, ka habe, Öbun e o but kohmun eang geû? Haingödrin, ka habe, Ohmun e o he ka co Samasona, he ka ânyâ kâu helâ me hnen hna ânyâ kohmun.

¹¹ Me ame he at Juda a ödrin theri thauzan ka hnyi khekheiny kic hnyi Etama, me ha kö Samasona, ka habe, U ma ca wâ a at Filisiti ödrin e musi otin? ieû e u je ânyâ kohmun? Ke haingen, ka habe, Ogo ânyâ ködrin helâ me hnödrin hna ânyâ könya.

¹² Ke haingödrin kâu, ka habe, Ohmun e o he ka cö u me me hnö u ka at Filisiti. Me Samasona ame ha ködrin, ka habe, Khemanyin dö könya a öbun e ca he ka okongu nya bi.

¹³ Ke haingödrin, ka habe, E ba; ke ohmun e he thibi ka cö u, me hnö u ka hnyi hnyamödrin: ke so bi e hnathu a ohmun e ca he ka hlingö u. Me ödrin e ca e ge li tö ae teb ûnyi, me hom e ûnyi hnyi kic.

¹⁴ Ke e ame o ka hnyi Lehi, me haba at Filisiti ödrin e iouny mē me kuku kâu: ke ame utut ka hnyi hon hanu Iehova, ke haba li tö hnyi li benyin me helâ me wakunenu adre le ge meic, ke ame ok ut hna ca hnyi li benyin.

¹⁵ Me e ame wâ jeien wainy asina a teb ûnyi, me e ame inâ benyin me hom, me kot tavat a khaca thauzan.

¹⁶ Ke haingö Samasona, ka habe, Hnen jeien wainy asina, je hna khon hon je hna khon, Oge hlingâ tavat a khaca thauzan ge jeien wainy asina.

¹⁷ E ame ha hofuc eling me khûâ jeien wainy ûnyi hnyi hnyamen, me adre me hwenyi ien hnyei eling me Rama-lehi.

¹⁸ Ke gan hmâ beic kâu me e ame tenge Iehova, me ha, ka habe, U je hna ka athnyabaem hna omelö eang ae gan, ke walang any oge me he but ka mok ge beic, me ta ka hnyi hnyamen tavat adre ca peritomonâ bi.

¹⁹ Me haba Khong ame kia thop a e hnyi Lehi, me ame o köiö ûnyi hnyin: ke e ame ic me ame o hmetu hanon me me möt bi: anyin a wale adre hwenyi ien e me Eni-hakore, ke e hnyi Lehi ke ne o but hnyi bong ang.

²⁰ Ke e ame owisa ka at Isaraela hnyi ûen at Filisiti twente je huna.