Owisa 14 - Iaai Bible 1901 (New Caledonia)

¹ KE Samasona ame he Timenatha ai, me ame wâ hnyi Timenatha ke hlu nokon at Filisiti.

² Ke a ame o me thumeto kamen me hinyen, ka habe, Oge wâ hnyi Timenatha ke hlu nokon at Filisiti: ke walang ang he thö ka hom me öiök.

³ Haba kamen me hinyen ödru me ha kâu, ka habe, Hawa, e ba momo nokon je liamekeiny mou, me ik hnyei hia, mʼ u me he ka hok âiâm unyin at Filisiti adre ca peritomonâ bi? Ke haingö Samasona ka kamen, ka habe, He thö ka hom e hobi könya anyin ae so e könya.

⁴ Ke ca khana kamen me hinyen a ûnyi ga Iehova e; anyin a e ame heleû can unyin at Filisiti. Ke haba at Filisiti ame muso at Isaraela hnyi ûen eling.

⁵ Ke ame tha he Samasona me kamen me hinyen Timenatha ai, me o but hnyi je hnyei vine hnyi Timenatha: ke wâ bi ame kuku kâu nokon liona.

⁶ Me ame o hwegiâ kâu hanu Iehova, me e ame wahai e helâ me hna wahai nokon got, ke ba ûnyi hnyi hnyamen: ke e ame ca thumeto kamen me hinyen ge hnen hna ânyâ.

⁷ Ke e ame o me ûhnenamö me hlu, ke e so hmonyin kö Samasona.

⁸ Ke hnyi ke ûen e ame hmetu he ka hom e, me e ame saû he ka wâ unyin liona: ke wâ bi, e hu je bi me hani hnyi unyin liona.

⁹ Ke e ame hom hanen hnyi li hnyamen me han tot me o unyin kamen me hinyen, me ha ödru, me ödru me hnyi han, ke e ame ca thumetu ödru a gʼ ame hom hani ûnyi hnyi unyin liona.

¹⁰ Ke ame he but kamen ka momo; ke haba Samasona ame ânyâ ke bijeû eling; anyin ame labö ânyâ helâe ta je hidröu.

¹¹ Ke ödrin e wâ but e, me ödrin e hom laûen a ödrin thote mödrin e tha e mē.

¹² Ke haba Samasona ame ha ködrin, ka habe, oge me he ka ha walang ang anyik hûkehmuen köbun: ke öbun e ne omanenâ bongon könya hnyi je bong a seveniny bijeû, me wâ e, me oge me he ka ham köbun thote je ûkhaû lino, me thöte je ûkot:

¹³ ke ame ne ca khanʼ öbun bi he ka omanenâ könya bongon, awe, öbun e he bi ka ham könya thöte je ûkhaû lino ke thöte je ûkot. Ke haingödrin, ka habe, Omanenâ thö ânyâm hûkehmuen, mʼ ohmun e long.

¹⁴ Me e ame ha ködrin, ka habe, Ame o but jeû ûnyi hnyi hnyin at ame han, Kʼ ame o but ûnyi a hnebwia ûnyi hnyi hnyin at ae hwege. Ke ca khanʼ ödrin he ka omanenâ hukehmuen hnyi kun ta bong.

¹⁵ Ke haba hnyi bong a seveniny, me ödrin e ha ka öiö Samasona, ka habe, U ma he ka ûjengö âiâm me me he ka omanenâ kohmun hûkehmuen, wâ adre nye he ka thung u me uma omen kâmâm ge meic: hawa, öbun e haw? ohmun me me hom anyihmun ta ûnyi? e ba?

¹⁶ Me öiö Samasona ame tenge kâu me ha, ka habe, U me hûkötiö nya, me ca betenge gak: u je ha hûkehmuen ta tavat aten ik hnyei, ke u je ca omanenâ könya bongon. Ke haingen kâu, ka habe, Wâ bi oge me ca omanenâ bongon kö cica me bai, me oge ma hawa ka omanenâ köu?

¹⁷ Me e ame tenge kâu hnyi je bong a seven hnyi anyidrin bijeû: ke haba hnyi bong a seveniny, me e ame omanenâ kâu bongon, anyin a e ame ûjengoâ: me e ame be bi me omanenâ bongon hûkehmuen ka aten iny hnyei.

¹⁸ Ke haba hnyi bong a seveniny me ame ha kâu aten taun, ke tiga ca dit seûno, ka habe, Ieû ûnyi ae hnebwia hon hani? ke ieû ae hwege hon liona? Me e ame ha ködrin, ka habe, Öbun e ne ca wia kânâ ge halek kau, Me ca khanʼ öbun he ka wâ bongon anyik hûkehmuen,

¹⁹ Me ame ut hwege hanu Iehova ka hnyi hon, me e ame he Asekelona ai, me kot eling hnyat a thöte me sei ödrin, me ham ka hnyat ödrin e omanenâ hûkehmuen je bwiny khaû. Ke ame ubâhlâ thö anyin hmönyin me e ame he ka hnyi hnyaban kamen.

²⁰ Ke adre ham bi âiân ka hanen, wale at a lihum mē.