Owisa 13 - Iaai Bible 1901 (New Caledonia)

¹ KE haba lakon Isaraela adre me ânyâ hmetu hwakecin ae kong hnyi hnyimakö Iehova; me Iehova ame hnʼ ödra ka hnyi hnyamen at Filisiti hnyi je huna a fâte.

² Ke wale ke at at Zorea hanen lap anyin at Dana, Manoa ien; ke toûnyi âiân, kʼ ame ca hnokoâ bi.

³ Ke ame manen dut angela anyi Iehova ka momo, me ha kâu, ka habe, Wâ bi, u toûnyi walang ang, me ca hnokoâ bi; ke so bi u me he ka erkin, me hnokoâ da.

⁴ Ke walang ang, e so u me wâ wia bi, u me ca he ka ic waina me grâg, ke u me ca he bi ka han ûnyi ae kap:

⁵ ke wâ bi, u me he ka erkin, me hnokoâ da, ke adre me ca he ka ip heleûgi hon ban, anyin ame he ka Nazeri ka Khong wanakat ûnyi hnyi hnyok: ke e ame he ka hwân he ka omelö at Isaraela ûnyi ge at Filisiti.

⁶ Ke ame he but momo me thumeto âiân, ka habe, A o könya ka aten Khong, ke helâ hnyimakan me hnyimakan angela anyin Khong hnân outen; ke oge ca hnö dok a mwi hnyin, ke e ame ca ha minya könya ien:

⁷ ke e ame ha könya, ka habe, Wâ bi, u me he ka erkin, me hnokoâ da; ke walang ang u me ca he ka ic waina me grâg, ke ca he bi ka han ûnyi ae kap: anyin ame he ka Nazeri ka Khong wanakat ûnyi hnyi hnyok, ke ne o but bong e ame mokcu.

⁸ Ke haba Manoa ame sumatö Iehova, ka habe, Tuhok lö, ö e o hmetu köhmu aten Khong u je kunâ, me me nʼ öhmu ge ûnyi ohmu me he ka ânyâ ka wanakat ame he ka hnokoâ.

⁹ Ke Khong ame long hofuc ho Manoa; me ame o hmetu angela anyin Khong ka âiân ame laba hnyi hnyei: ke hiö Manoa a âiân unyin.

¹⁰ Me ame ie wadring momo, me thumeto âiân, me ha kâu, ka habe, Wâ bi, ame manen hmetu könya ateji ame o könya hnyi ke bong.

¹¹ Me ame todrö Manoa me he hoton âiân, me o unyin at, me ha kâu, ka habe, U at waleji u je ûhnenamö me momo? Haingen, Inya e.

¹² Ke haingö Manoa, ka habe, E na āt ju hwâm hofuc: ke ame he ka helâ ua wanakat? ke ieû hûdrân.

¹³ Me ame ha angela anyi Iehova kö Manoa, ka habe, Haba hnok hna ha hia ka momo, hamen he ka wâ wia.

¹⁴ E ame ca he ka an ke ûnyi ûnyi hnyi vine, ke e ame ca he ka ic waina me grâg, me han ke ûnyi ae kap; ke e ame he ka tuö ta je ûnyi hia oge me ha kâu.

¹⁵ Me haba Manoa ame ha ka angela anyi Iehova, ka habe, Me laba ju unyihmu mʼ ohmu me he ka penapena hobi köu nokon got.

¹⁶ Me angela anyi Iehova ame ha kö Manoa, ka habe, Eja ke ne u je ne thawo nya, me oge me ca he ka han ânyâm areto: ke u je ne be ka penapena hudiny leû, me u me he ka hudo e kö Iehova. Anyin ame ca wâ Manoa a e angela anyi Iehova.

¹⁷ Me Manoa ame ha kö angela anyi Iehova, ka habe, Ia iâm, mʼ ohmun e he ka oganö u e ka āt dö hwâm hofuc?

¹⁸ Me ame ha angela anyi Iehova, ka habe, Anyin a ieû u me hnö iök, anyin a e me hnân lâiâ gan?

¹⁹ Ke Manoa ame hom nokon got me hudiny han, me hudo kö Iehova hon kic: ke hnân lâiâ bi hna ânyâ ge angela, ke Manoa me âiân ödru me tot ka wâ.

²⁰ Ke ame o thö bâhlân ka hnyidranyai ûheny hon tap, me ame ölö thö angela anyi Iehova hnyi bâhlân taben hut: ke a wâ but Manoa me âiân; me ödru me ta ju hnyikânâi.

²¹ Ke ca manen hmetu bi angela anyi Iehova kö Manoa me âiân. Me Manoa ame wâhmakhmetoâ a e angela anyi Iehova.

²² Me Manoa ame ha ka; âiân, ka habe, Otu me he but ka mok anyin a öte hia but wâ Khong.

²³ Ke haingen âiân kâu, ka habe, Ame ne behlingʼ otu Iehova, me ame ca he ka kap hudiny leû me hudiny han ûnyi gatu, ke e ame ca he minya ka omanenâ kötu ta je ûnyi hia eling, me thumetu ötu ge ta je ûnyi a helâng hnyi ûen eang.

²⁴ Ke haba momo ame hnokoâ da me hwenyi ien Samasona: ke ame gan tot wanakat, ke haba Iehova ame ohnahicâ e.

²⁵ Ke ame hwân hanu Iehova he ka huliwan hnyekon hnyi lap anyi Dana, hnyi wanben Zorea me Esetaol.