Owisa 12 - Iaai Bible 1901 (New Caledonia)

¹ KE haba at Eferaima adre me ûkhacaköu me he ka hnyi hwadro: me ödrin e ha kö Jefetha, ka habe, Ieû gam u je he ka vat me laku Amona, ke u je ca hawʼ ohmun he ka tha he mou? ohmun e he ka thong umâm uma ka hom ge meic.

² Haba Jefetha ame ha ködrin, ka habe, haba inya me atök ohmun e ûö hwege me laku Amona; ke o ge hawʼ öbun, ke öbun e ca omeli nya ûnyi hnyi hnyamödrin.

³ Ke o ge me wâ a öbun e ca omeli nya, me oge me oûnyibâûâ anyik möt, me he ka vat me laku Amona, ke Iehova ame hnʼ ödrin ka hnyi hnyamok: can ieû öbun e he jem könya hnyi bong ang he ka vat mönya?

⁴ Ke haba Jefetha ame ûkhacaköuâ tavat hia hnyi Gileada, me vat me Eferaima; ke haba at Gileada ödrin e kot at Eferaima, anyin a ödrin e ha, ka hâbe, Je bâ öbun at Gileada ûheny Eferaima hnyi wanben at Eferaima me Manase.

⁵ Ke haba at Gileada ödrin e khaletâ je dok ae cöcö hnyi Joridano, ke tiga bec at Eferaima: ke ame ne ha at Eferaima, tavat adre me kec, ka habe, Hne dek dö he ka hanyâûâ, me haba at Gileada ödrin e ha kâu, ka habe, U at Eferaima? Ke ame ne ha, e ba,

⁶ me haingödrin kâu, ka habe, Bethe ha, ka habe, Shiboleth; me haingen bi, ka habe Siboleth; ke ca khana he ka ha wisa, me ödrin e kât me hlingâ hnyi je dok ae cöcö hnyi Joridano: ke ame ta hnyi ûen eling fâte tu thauzan at Eferaima.

⁷ Ke Jefetha ame owisa ka at Isaraela hnyi je huna a siks. Me ame mokcu Jefetha at Gileada, me adre me konâm e hnyi ke taun hnyi Gileada.

⁸ Ke hwaban e me ame owisa ka at Isaraela Ibezan at Bethe-leema.

⁹ Ke thote lakon obaga, ke thote lakon wahlu e ame ve hna hââng, ke e ame hom wahlu a thote ûheny hele hobi kâu lakon obaga. Ke e ame owisa ka at Isaraela hnyi je huna a seven.

¹⁰ Ke ame mokcu Ibezan, me adre me konâm e hnyi Bethe-leema.

¹¹ Ke hwaban e me ame owisa ka at Isaraela Elona at Zebulona; ke e ame owisa ka at Isaraela hnyi je huna a ten.

¹² Ke ame mokcu Elona at Zebulona, me adre me konâm e hnyi Ajalona hnyi Zebulona.

¹³ Ke hwaban e, me, Abedon nöku Hilel, at Pirathon, ame owisa ka at Isaraela.

¹⁴ Ke e hu lakon obaga a fâte, ke thote laöbiny, ödrin e tabâ je asina a sevente; ke a ame owisa ka at Isaraela hnyi je huna a eit.

¹⁵ Ke ame mokcu Abedon nöku Hilel, at Pirathon, me adre me konâm e hnyi Pirathon hnyi hnyei Eferaima, hnyi hnyei ae hut anyin at Amaleka.