Owisa 11 - Iaai Bible 1901 (New Caledonia)

¹ ME haba Jefetha at Gileada me at ae hwege, ke e nokon momo hnyi gethen; ke Gileada ame hnöku Jefetha.

² Ke haba öiö Gileada ame hnokoâ lakon obaga; ke a gan dut obaga lakon âiân, me ödrin e obö Jefetha, me ha kâu, ka habe, U me ca he ka hnyi hu jekhoû hnyi hnyaban kamöhmun, anyin a u nokon ke momo.

³ Me Jefetha ame kec ge liamekeiny mē, me laba hnyi hnyei Tob: ke ame the he me Jefetha tavat ae monu, kʼ ödrin e tha he ehele mē.

⁴ Ke hnyi ke ûen bi, haba laku Amona, ödrin e vat me at Isaraela.

⁵ Ke haba hnyi ûen ame he laku Amona ka vat me at Isaraela, me ame he wahingatiny Gileada he ka hum Jefetha ûnyi hnyi hnyei Tob:

⁶ me ödrin e ha kö Jefetha, ka habe, He thö jem he ka ci ohmun, mʼ ate me he ka vat me laku Amona.

⁷ Me Jefetha ame ha ka wahingatiny Gileada, ka habe, Hawa, öbun e ca hûkötiö nya me obö nya ûnyi hnyi hnyaba cica? ke ieû gabun öbun e he jem könya walang ang, kʼ ame o but köbun ûnyi ae kong!

⁸ Me haba wahingatiny Gileada ödrin e thu kö Jefetha, ka habe, Waleling ohmun e o köu walang ang, mʼ u me he ka tha he möhmun me vat me laku Amona, mʼ u me he ka taben at Gileada hia.

⁹ Me haba Jefetha ame ha ka wahingatiny at Gileada, ka habe, Öbun e ne he ka hum nya ka hnyi ik he ka vat me laku Amona, kʼ ame ne he Iehova ka hnʼ ödrin könya, hawa, oge me he ka ban köbun!

¹⁰ Me haba wahingatiny Gileada ödrin e thu kö Jefetha, ka habe, Hamö Iehova ka wâ hnathu otin; a ohmun e he ka ânyâ helâ me hwâm hofuc.

¹¹ Me haba Jefetha ame tha he me wahingatiny Gileada, me haba tavat adre me otilâ me me taben me ban hudrin: ke haba Jefetha ame ha hwan ta je hofuc hia hnyi hnyimakö Iehova hnyi Mizepa.

¹² Ke haba Jefetha ame kunâ je metâ ka thaniny laku Amona, ka habe, Ieû gam könya, anyin a u je he jem ka vat me ik hnyei?

¹³ Haba thaniny laku Amona ame thu ka je metâ anyi Jefetha, ka habe, Anyin a at Isaraela ödrin e hûgûnâ ik hnyei, hnyi ûhedrin jem ûheny Aigupito, hwân hnyi Arerona ke ne o but Jaboka, me Joridano: ke walang ang ham hmetu thö e hnyi ûsoköu.

¹⁴ Ke haba Jefetha ame kunâ hmetu ke je metâ ka thaniny laku Amona:

¹⁵ me ha kâu, ka habe, Walang hofuc ho Jefetha, ka habe; A ca hom at Isaraela hnyei Moaba me hnyei iny laku Amona:

¹⁶ ke ame he jem at Isaraela ûheny Aigupito, me ödrin e vheno hnyebuba ke ne o but hnyi Köiö ae Dra, me o hnyi Kadesi;

¹⁷ me ame kunâ je metâ at Isaraela ka thaniny Edoma, ka habe, Ö u hnö nya but he ka vheno em hnyei: ke ame ca long bi than Edoma. Ke helâe minya adre me ûkhûnöng ka than Moaba: me e ame höcö bi: ke Isaraela ame laba hnyi Kadesi.

¹⁸ Ke e ame vheno hnyebuba, me igigilo hnyei Edoma, me hnyei Moaba, me he hnyi ke keihen e deiö hnyei Moaba, me hunuma hnyi ke keihen Arenona; ke ödrin e ca o hnyi hnyigöulen Moaba, anyin a Arenona hnyigot me Moaba ehac.

¹⁹ Ke haba Isaraela ame ûkhûnöng kö Sihona than Amora, than Hesebona; ke Isaraela ame ha kâu, ka habe, Ö u hnʼ ohmun he ka vheno hnyi em hnyei, me he ka hnyi ik.

²⁰ Ke haba Sihona ame ca kap ho Isaraela he ka vheno hnyi iny hnyei: ke Sihona ame ûkhacaköuâ lakeiny hia, me hunuma hnyi Jahaza, me vat me Isaraela.

²¹ Ke haba Iehova Khongu Isaraela ame hnö Sihona me lakeiny hia thithö ka hnyi hnyamö Isaraela, me adre me kuc ödrin: me Isaraela ame hom hnyei hia iny at Amora, tavat a idrin hnyei eling.

²² Ke adre me hom hnyigöulen hia at Amora hwân hnyi Arenona ke ne o but hnyi Jaboka, ke hwân hnyi hnyebuba, ke ne o but Joridano.

²³ Ke walang ang, haba Iehova Khongu Isaraela ame obâ at Amora hnyi hnyimakan lakeiny a at Isaraela, ke u me he biju u ka labā e?

²⁴ Hawa, u me ca he ka labā hnyei a ham köu he ka labā ga Kemosa a khongom? Me haba ohmun, me ohmun e he ka hom iny tavat hia waleji a obâ Iehova Khonguhmun hnyi hnyimaköhmun.

²⁵ Ke hawa, u beönua hu Balaka nöku Zipora than Moaba? hawa, ame tot at eling kö Isaraela me vat mödra?

²⁶ Ke ame tiga laba Isaraela ehac hnyi Hesebona me je tauniny, me Aroera me je tauniny, me ta je taun hia thithö hnyi hnyigöulen Arenona hnyi je huna a theri haded; me ieû gabun öbun e ca hûgûnâ e hnyi ûen eling?

²⁷ Anyin a wale oge me ca okongu u, ke u me ânyâ könya ûnyi ae kong he ka vat mönya: hamö Iehova, At Owisa, he ka owisa ka lakon Isaraela me laku Amona hnyi bong eang.

²⁸ Ke haba thaniny laku Amona ame ca long hofuc ho Jefetha wale e ame ûkhûnöng kâu.

²⁹ Me ame ta but hu Jefetha hanu Iehova, me e ame he hanyâûâ hnyei Gileada, me Manase, me vheno Mizepa hnyi Gileada, ke ûheny Mizepa hnyi Gileada me e ame he ka laku Amona.

³⁰ Ke haba Jefetha ame bi khöbi kö Iehova, ka habe, U je ne he ka hna laku Amona ka huyi hnyamök,

³¹ ke iny ka o hmetu hnyi hnahic ûheny unyin laku Amona, me haba ûnyi ame he ka didrut ûheny hnyi hwanumen umök uma he ka ûkhanö mönya, me wale hobi kö Iehova, me oge me he ka hudo e me hudiny leû.

³² Me haba Jefetha ame he ka laku Amona he ka vat mödrin; ke Iehova ame hnʼ ödrin ka hnyi hnyamen.

³³ Ke e ame kuc ödrin hwân Aroera ke ne o but hnyi Minith, a je taun a twente, ke ne o but Abela-ceramim, ke ti gan hna kuc ödrin. Ke adre me hom ûhnyûkongo laku Amona hnyi hnyimakan lakon Isaraela.

³⁴ Ke ame o thö Jefetha hnyi Mizepa ka hnyi hnyaban, me wâ bi, ame o thö nokon hlu he ka ukhanö mē, me je bwinybet me bibiâ: ke hake e thibi nokon, ke ba hmetu nokon baga me hlu.

³⁵ Ke e ame wâ e, me e ame kia anyin ûkhaû, me ha, ka habe, Ekölö ge nokuk! u je hia but ohmakâ hnyekuk, ke iny vec ut gam: anyin a oge hia but fuc kö Iehova, ke ca khanö nya bi he ka hmetu.

³⁶ Me e ame ha kâu, ka habe, Cica, u je hia but fuc ko Iehova; ânyâ thö könya helâ me hofuc ame o but ûnyi hnyi hnyimâm; anyin a Iehova ame bi hwaban ka je iwahnaihmiony möu, a laku Amona.

³⁷ Ke haingen ka kamen, ka habe, Ânyâ thö könya ûnyi eang, wale he ka hnö nya but hnyi lo li tehi, me inye he ka he monu hon je bucen tha e me je lahanök, me tenge can anyin a iny hlu baû but.

³⁸ Me haingen dö, He thö. Ke e ame hna e hnyi lo li tehi, me e ame tha he me je lahanen, me tenge hon je bucen can anyin a e hlu baû but.

³⁹ Ke hwaban lo li tehi e ame hmetu ka kamen, me e ame ânyâ kâu helâ me hnen hna bi khöbi: ke a ca hia but tha mwi me ke baga. Ke wale hwakecin hnyi Isaraela,

⁴⁰ a gʼ ame he je hlu lakon at Isaraela hnyi je huna he ka tengiâ hlu nöku Jefetha at Gileada vak ta bong hnyi je huna.