Owisa 1 - Iaai Bible 1901 (New Caledonia)

¹ HWABAN imeki Josua haba lakon Isaraela adre me hnö unyi Iehova, ka habe, Ia ame he ka bân ka he hobi kohmun ka at Kanana me vat mödrin?

² Ke haingö Iehova, ka habe, Bân at Juda: wâ bi oge hia but hna ködrin hnyei.

³ Ke Juda ame ha kö Simeona liamekeiny mē, ka habe, Aiö u ka hnyi jekhöûk me otu me tha be ka vat me at Kanana; ke oge me he ka tha he mou ka hnyi jekhom. Ke haba Simeona ame tha he mē.

⁴ Me Juda ame he; me Iehova ame hna at Kanana me Perizi ködrin: ke hnyi Bezek odrin e kot ten thauzan tavat.

⁵ Ke odrin e ō Adoni-bezek hnyi Bezek, me odrin e vat mē, me odrin e kot at Kanana, me at Perizi.

⁶ Ke ame kec dö Adoni-bezek; me odrin e hnu e, me kât e, me odrin e subâ but li bahnyökveto me li bacan ae gan.

⁷ Ke Adoni-bezek ame ha, ka habe, Odrin sevente je than adre subâ je bahnyökveto me li bacan ae gan gadrin, odrin e hlo je atmen hmelen anyik laulau: ke haba Khong ame bi hwaban könya helâ me hnok hna ânyâ. Ke odrin e hom e Jerusalema ai, me e ame mokcu eling.

⁸ Ke haba laku Juda odrin e vat me Jerusalema, me hûgûnâ e, me kot ge hele vat, me thong taun ge meic.

⁹ Ke hwaban e laku Juda odrin e he me vat me at Kanana tavat adre me laba hnyi hnyei ae hut, me hnyi Whaiöu, me hnyi hnyei ae ca hut.

¹⁰ Ke Juda ame he ka at Kanana adre me laba hnyi Heberona: (ke haba ien Heberona ehac me Kiriath-areba:) me odrin e kot Sesai, me Ahiman, me Talemai.

¹¹ Ke ûheny e odrin e he ka tavat adre me labā Debira. (Ke haba ien Debira ehac me Kiriatha-sefer.)

¹² Ke haba Kaleba ame ha, ka habe, Haba at ame be ka kot Kiriatha-sefer, me hûgûnâ e, me oge me he ka ham kâu nokuk hlu jia Akesa.

¹³ Ke ame hûgûnâ e Otheniela, nöku Kenaza kei Kaleba: me e ame ham Akesa a nokon kâu me me âiân.

¹⁴ Ke ame o but kâu hlu eling, me ha ka âiân he ka sumâtâ utkânâ ge kamen: he ame utut hlu ûheny hon asina; me Kaleba ame ha kâu, ka habe, Ieû ae wem?

¹⁵ Ke haingen, ka habe, Ham but könya hnahic; u je hia but ham könya hnyei ka hnyi Hwaiöu, anyin a wale ö u ham könya je an ame pupua. Me Kaleba ame ham kâu je an ame pupua walethö me eû.

¹⁶ Ke haba lakon at Keni a ûngû Mose, odrin e tha he me laku Juda ûheny hnyi tauniny je ûö pama ka hnyi hnyebuba anyi Juda, hnyi ke keihen Arada ka hnyi hwaiöu; ke odrin e he me tha laba me tavat.

¹⁷ Ke Juda ame tha he me Simeona a liamekeiny mē, me odrin e kot at Kanana hnyat adre me labā Zefath me ohia e. Ke haba ien taun, me, Horema.

¹⁸ Ke Juda ame hûgûnâ minya Gaza me baten e, me Asekelona me baten e, me Ekerona me baten e.

¹⁹ Ke o bi Iehova unyi Juda; me e ame obâ tavat odrin e laba hnyi hnyei ae hut; ke ca khana bi he ka obâ tavat odrin e laba hnyi hnyigöulen bucen, anyin ae hu gadrin je kariota fao.

²⁰ Ke adre me ham Heberona kö Kaleba, helâji me Mose ame ha: ke e ame obâ ûheny e laku Anaka a kun.

²¹ Ke haba laku Beniamina, odrin o ca obâ at Jebusi, wale tavat adre me labā Jerusalema: ke haba at Jebusi odrin e tha laba me laku Beniamina hnyi Jerusalema ke ne o but hnyi bong ang.

²² Ke haba lap anyi Josefa, me odrin e he ka vat me tavat Beth-ela: ke e bi Iehova unyidrin.

²³ Ke haba lap anyi Josefa odrin e ûkhûnöng ka ecmâkâ Beth-ela. (Ke Luza ien taun ehac.)

²⁴ Ke tavat ecmak odrin e wâ et ame dit ûheny hnyi taun, me odrin e ha kâu, ka habe, Ö u omanenâ thö kohmun homagouleny taun, ke ohmun e he ka betenge gam.

²⁵ Me e ame omanenâ ködrin homagöuleny taun, me odrin e kot taun ge hele vat; ke odrin e hna but at me anyin lap hia.

²⁶ Me ame he at ka hnyi hnyei iny at Heth, me otilâ taun me hwenyi ien Luza, wale ien ke ne o but hnyi bong ang.

²⁷ Ke haba at Manase odrin e ca obâ tavat adre me laba hnyi Bethe-seana me je tauniny, me Tanaka me je tauniny, me tavat adre me labā Dora me je tauniny, me tavat adre me labā Ibeleama me je tauniny, me tavat adre me labā Megido me je tauniny: ke hwege at Kanana he ka laba bala bi hnyi hnyei eling.

²⁸ Ke ame hwege bi at Isaraela, me odrin e kunâ at Kanana he ka bi athnyaba, kʼ adre ca ti obʼ ödrin.

²⁹ Ke haba at Eferaima odrin e ca obâ at Kanana tavat adre me laba hnyi Gezera; ke at Kanana ame laba hnyi Gezera unyi drin.

³⁰ Ke haba at Zebulona, odrin e ca obâ tavat adre me laba hnyi Kiterona, me tavat adre me laba hnyi Nahalol; ke ame tha laba mödrin at Kanana, me bi fat ködrin.

³¹ Ke haba at Asera, odrin e ca obâ tavat adre me laba hnyi Ako, me tavat adre me laba hnyi Zidona, me Alab, me Akeziba, me Heleba, me Afeka, me Rehoba:

³² ke haba at Asera odrin e tha laba me at Kanana, wale tavat a aten hnyei: anyin a odrin e ca obʼ ödrin.

³³ Ke haba at Nafatali, odrin e ca obâ tavat adre me laba hnyi Bethe-semes, me tavat adre me laba hnyi Beth-anath: ke odrin e tha laba me tavat Kanana, tavat adre me labā hnyei: ke so bi haba tavat adre me laba hnyi Bethe-semes, me Beth-anath odrin e bi fat ködrin.

³⁴ Ke haba at Amora, odrin e khöbwe at Dana ka hnyi hnyei ae hut: kʼ adre ca hnʼ odrin he ka utut ka hnyi hnyigöulen bucen:

³⁵ ke hwege at Amora he ka laba bala bi hnyi bucen Heres, hnyi Ajalona, me Salebim: ke hwege bi hnyamen lap anyi Josefa, me odrin e bi fat bi.

³⁶ Ke haba hnyigöulen at Amora, me, hwân hnyi gethen ame ölö Akerabima ai, hwân hnyi kic me ethö görany.