Obadia 1 - Iaai Bible 1901 (New Caledonia)

¹ HNA omanenâ ko Obadia. Walang hna ha hnen Than Iehova ge Edoma. Ate me long ut je uthumetu ûnyi ga Iehova, ke adre ûkhûnöng ka hnyi je hnyei, me ha, ka habe, Todrʼ öbun, ke so ate me tot ûcon me vat më.

² Wâ bi, oge hia but hom ûhnyûkongu u unyin je hnyei: e gan hmâ hna hûkötiö u.

³ A hia but omenu u bi hnen hnyekom ae bi gan, u at ame laba hnyi je op hnyi kic, ethö hnyabam; at ame ha hnyi hnyekon, ka habe, Ie at ame he ka ohnyikânö nya hnyikânâi?

⁴ Eja ke ne u je ne ölö bi goranyai helâ me aeto, ke eja ke ne u je ne ip hâûâm unyin je okhû, oge me he bi nya ka ohnyikânâi u ûheny e, haingo Iehova.

⁵ Ame ne o köu tavat venöu me tavat sei hnyi lit, (ekölö ge hna subâ degeci u!) hawa, adre me ca he ka venöu ke ne ka ûcû ödra thö? ame ne o köu tavat töu wan vine, hawa, adre me ca he ka hnen bi ju ke je wan?

⁶ Ekölö ge hna ûhnei ga Esau! ekölö ge hna elâm omjehen adre oiyongâ!

⁷ Adre hia but hum u hnyi gethen hnen lahiâm hia, wale ka hnyi hnyigot: adre hia but iyawo u, me hwege hom, tavat adre ûsoköu möu; adre lau hnewe hobi köu hnen tavat adre me an âm jeû: e ba bi metâ gan.

⁸ Haingö Iehova, ka habe, Hawa oge me ca he ka ohia hnyi bong eling tavat ae metâ hnyi Edoma, me wâ ûnykûme ûnyi hnyi bucen anyi Esau?

⁹ Temana lö, ame he ânyâm tavat hwege ka öbubuny, mʼadre me hlingâ degecâ tavat hia hnyi bucen anyi Esau.

¹⁰ Ame he ka takû u hmehma can ûokonguny ka kem a Jekob, ke adre me he ka subâ degeci u nyiele balua.

¹¹ Hnyi bong u je tot sâkâû hnyin, wale hnyi bong adre me hûgûnâ anyin ta je ûnyi hnen je atkanyua, kʼ ame didro ke je hnyat ka hnyi je homagouleny, kʼ adre me ugleköbâ Jerusalema, me helâke u me tha hien mʼ ödra.

¹² Ca he ju ka wâ hnyi bonginy kem, hnyi bonginy vec a e, ke ca hobâ lakon Juda hnyi bonginy bâ; ke ca fuc bi gan hnyi bonginy hloûhloû.

¹³ Ca he ju ka delec homagouleny lakeik hnyi bonginy vec a ödra; eke, ca he ka wâ hna oveci ödra hnyi bonginy vec a ödra, ke ca he öbun ka hinöbeny ka hnyi anyidra ta je ûnyi hnyi bonginy hlöuhlöu a ödra.

¹⁴ Ke u me ca he ka tot hnyi hna saû he ka hlingâ tavat adre me kec gan; ke ca hna but kâu je koluidra hnyi bonginy hlöuhlöa a ödra.

¹⁵ Anyin ae hakekeny jut bong bongu Iehova hnyi ta je hnyei hia: me ame he ka ânyâ bi köu, helâji me hnâm hna ânyâ; kʼ ame he ka hmetu bi ka hnyi hon bâm ânyâm huliwa.

¹⁶ Anyin a öbun e hia but ic hon anyik bucen ae kap, me ame he bala bi ta je hnyei ka ic helâe, eke, adre me he ka ic me utâ, kʼ adre me he ka helâ me at adre ca hnokoâ.

¹⁷ Kʼ ame he ka ku hon bucen Ziona tavat adre me kec mot, kʼ adre me he ka okabâ, kʼ ame he lap anyi Jekob ka hu je idra.

¹⁸ Ke ame he lap anyi Jekob ka meic bi, ke lap anyi Josefa ka bâhlân, ke lap anyin Esau helâ me thatûnyin hwit, me adre me he ka vhök ödrin me thong degeci ödrin: ke ame he ka ba kolon lap anyi Esau, anyin a hia but ha Iehova.

¹⁹ Ke ame he aten Hwaiöu ka hu bucen anyi Esau; kʼ ame he tavat aten dok ae tha hon ka hu hnyei iny at Filisiti: kʼ adre me he ka hu utkânâ hnyi Eferaima, ke utkânâ hnyi Samaria; ke haba Gileada, me ame he ka iny Beniamina.

²⁰ Ke haba je bâ a je utbavat eang a lakon Isaraela unyin at Kanana, me adre me be ka hu ke ne o but hnyi Sarepeta; ke haba je bâ a at Jerusalema hnyi Sefaradi, me adre me he ka hu je taun hnyi Hwaiöu.

²¹ Ke ame he tavat ûhomeli ka o ka hnyi bucen Ziona he ka owisa ka bucen anyi Esau; ke ka anyi Iehova bi dokhu.