Numera 9 - Iaai Bible 1901 (New Caledonia)

¹ KE Iehova ame ha kö Mose hnyi hnyebuba Sinai, hnyi tehi a bân hnyi huna a loiny, hwaban hnödra hna he but ûnyi hnyi hnyei Aigupito, ka habe,

² Hamen lakon Isaraela he ka ânyâ paseka hnyi ûen adre thu.

³ Hnyi bong a fortininy tehi eang, hnyi sahac, öbun e he ka tuö e hnyi ûen adre thu: hoton je hnanyibuiny hia me je bongon hia öbun e he ka ânyâ e.

⁴ Ke haba Mose ame ha ka lakon Isaraela, mʼ adre me he ka ânyâ paseka.

⁵ Me adre me ânyâ paseka hnyi tehi a bân, hnyi bong a fortininy hnyi sahac hnyi hnyebuba Sinai: haba lakon Isaraela adre me ânyâ hoton hna hûna hnö Iehova kö Mose.

⁶ Ke wale ke je hnyat ödrin e bo kong ûnyi ge komok, ke ca ûcû ködrin he ka hnyi hanen paseka hnyi bong eling: me ödrin e he kö Mose me Arona hnyi bong eling:

⁷ ke haba hnyat eling ödrin e ha kâu, ka habe, Öhmun e bo kong ut ûnyi ge komok: ieû gadra adre me ovheli ohmun, mʼ ohmun e ca he ka hnyi hudo hut kö Iehova hnyi ûen adre thu, tha ohmun me lakon Isaraela;

⁸ Ke haingö Mose ködrin, ka habe, Me tot u öbun, mʼ inye he ka löng hofuc ho Iehova gabun.

⁹ Me haba Iehova ame ha kö Mose, ka habe,

¹⁰ Ha thö ka lakon Isaraela, ka habe, Ame ne he ke at gabun, me je mâtrânibun nyiele, ame bo kong ûnyi ge komok, kʼ ame ne he but ka hnyi ke dok ae sâkâû, me, hamen he ka hnyi ânyâ paseka kö Iehova:

¹¹ adre me he ka tuö e hnyi tehi a loiny hnyi bong a fortininy hnyi sahac; kʼ adre me he ka tha han e me areto adre ca levenâ, me je khölak ae hiny:

¹² ke adre me ca he ka ip hanen ke ne o but hnyi hnyomakatu, kʼ adre me ca he ka thu jeien: adre me he ka ânyâ paseka hoton je hnanyibuiny hia.

¹³ Ke haba at ae bo so, kʼ ame ca hnyi he but, kʼ ame ca hnyi hanen paseka, me adre me he ka subâ degecâ at eling ûnyi hnyi iny hnyei: anyin a e ame ca hom hut kö Iehova hnyi ûen adre thu, kʼ ame he ka takoû at eling hnen anyin hulö.

¹⁴ Ke ame ne tha laba möbun ke atkanyua, kʼ ame hnyi behanen paseka kö Iehova; me e ame he ka ânyâ hoton hnanyibuiny paseka me hwakecin: khaca thibi hnanyibu köbun ge atkanyua me aten hnyei.

¹⁵ Ke haba hnyi bong adre me otilâ uma mano hnyin, me ame tube uma mano hnen ûlâ, wale uma ohnatho: ke haba hnyi sahac e ame mokut hon uma mano helâ me meic ke ne o but hnyomakatu.

¹⁶ Kʼ ame helâe bala: haba ûlâ ame tube e hnyi lany, ke helâ me meic hnyi lit.

¹⁷ Ke adre me ne kap goranyai ûlâ ûnyi hnyi hon uma, me hwaban e haba lakon Isaraela adre me he: ke haba dok ame tot hnyin ûlâ, wale dok ame hunuma hnyin lakon Isaraela.

¹⁸ Haba lakon Isaraela adre me he hnyi ûen Iehova ame hûna, kʼ adre me hunuma hnyi ûen e ame hûna: haba hnyi ta je bong hia wale ûlâ ame laba hon uma mano, me adre me laba.

¹⁹ Ke ame ne laba ûlâ hon uma mano hnyi je bong ae se, me haba lakon Isaraela adre me tuö hna otilâ hnö Iehova, kʼ adre me ca he bi.

²⁰ Ke haba hnyi ke je ûen, me ame laba ûlâ hon uma mano hnyi je bong ae wakhalet; me ödra adre me hunuma bala hoton hna hûna hnö Iehova, ke adre me he hoton hna hûna hnö Iehova.

²¹ Ke haba hnyi ke je bong me ame laba ûlâ hwân hnyi sahac ke ne o but hnyomakatu; ke ödra ka kap goranyai ûlâ hnyi hnyomakatu, me adre me he: kʼ ame ne lany, kʼ ame ne lit, hnyi ûen adre me hom goranyai ûlâ, me adre me he.

²² Ame ne lo thibi li bong, ame ne khaca tehi, ame ne khaca huna, kʼ ame ne e bi ûlâ hon uma mano, me labö e, me haba lakon Isaraela adre me laba, me ca he bi: ke hnyi ûen adre me kap goranyai e, me adre me he.

²³ Hnyi musi anyi Iehova adre me laba, ke hnyi musi anyi Iehova adre me he: kʼ adre me tuö hna otilâ hnö Iehova, hoton musi anyi Iehova a deny Mose.