Numera 6 - Iaai Bible 1901 (New Caledonia)

¹ KE Iehova ame ha kö Mose, ka habe,

² Ha thö ka lakon Isaraela me ha ködra, ka habe, Ame ne he ke baga ame ne momo ka hûkâlâ khöbi ae ûnyi hnathu, wale khöbi anyin at Nazeri, he ka okâbâ e bi kö Iehova:

³ me e ame be ka ûsâkâûö me waina me grâg; kʼ ame ca he ka ic vinegainy waina, me vinegainy grâg; kʼ ame ca he ka ijem dân je wan vine, kʼ ame ca he ka han je wan vine ae lup me meleca.

⁴ Haba hnyi je bong hia adre okabâ e hnyin, me e ame ca he ka han ke ûnyi adre ânyâ ge vine, hwân ge önyen ke ne o but ka hnyi unen.

⁵ Hnyi je bong hia adre okabâ e ge khöbi, adre me ca he ka kâlâ ban ge heleûgi: ke e ame he ka kap ke ne o but ame bekhöt ut je bong e ame okabâ e kö Iehova hnyin, kʼ ame he ka hna ban.

⁶ E ame ca he ka hakekenyâ komok hnyi je bong hia e ame okabâ e kö Iehova.

⁷ E ame ca he ka obokono e bi ge kamen, me hinyen, me liamekeiny mē, me haniny, ödrin ka mokcu: ʼ anyin a e bi hon ban hanen hna okabâ e bi ka Khong.

⁸ E kap kö Iehova hnyi je bong hia adre okabâ e hnyin.

⁹ Ke ame ne ie mok hwege ke at unyin, me me bo kong ut ban e ame okabâ; me e ame he ka giâ ban hnyi bong adre obosoâ e hnyin, kʼ ame he ka giâ hnyi bong a seven.

¹⁰ Ke haba hnyi bong a eitiny, me e ame ke ka hom li biny, ame ne li nokon meköta, ka at bihut, ka hnyi hwanumen uma ûkhacaköu:

¹¹ kʼ ame he at bihut ka hudo khaca hnân hudiny hulö, ke khaca hnân hudiny leû, me me bi hwaban anyin möt, anyin a kong ut ge ûnyi ae mok, kʼ adre me he ka okabâ hmeto ban hnyi bong eling.

¹² Ke e ame he ka okabâ kö Iehova je bong e ame okabâ e hnyin, me hom nokon mamoe baga a khaca hunainy hnân hudiny monu: ke ame he ka ûnyi baû je bong a bân anyin ae kong ut hnen hna okabâ e.

¹³ Ke walang hnanyibuiny at Nazari, e ka bekhöt ut je bong e ame okabâ e hnyin; adre me he ka hom e ka hnyi hwanumen uma ûkhacaköu:

¹⁴ ke e ame he ka hudo anyin hut kö Iehova, a nokon mamoe baga a khaca ae ba hnyikongon, a khaca hunainy, me hnân hudiny leû, ke khaca nokon mamoe momo ae ba hnyikongon, a khaca hunainy, me hnân hudiny hulö, ke khaca mamoe baga ae ba hnyikongon hnân hudiny ole,

¹⁵ me tang areto adre ca levenâ, je ong areto adre ûthûeniken me wakaco, me je areto ae halelöu adre ca levenâ kʼ adre khino wakacoiny, me hudiny han, me hudiny ic.

¹⁶ Ke ame he at bihut ha hom ta je ûnyi e ka hnyi hnyimakö Iehova, me hudo hudiny anyin hulö, me hudiny leû:

¹⁷ ke e ame he ka hudo mamoe baga hnân hudiny ole kö Iehova, tha e me tang areto adre ca levenâ: kʼ ame he at bihut ka hudo hudiny han, me hudiny ic.

¹⁸ Ke ame he at Nazeri ka giâ bâniny hna okabâ e hnyi hwanumen uma ûkhacaköu, me hom leûnen bâniny han okabâ e, me khûâ ka hnyi meic eû hmelen hudiny ole.

¹⁹ Ke ame he at bihut ka hom benyin mamoe baga ae mesök, me khaca ong areto adre ca levenâ ûnyi hnyi tangen, me khaca areto ae halelöû adre ca levenâ, me ip ta je ûnyi e hon li hnyamen at Nazeri e ka hia but giâ ge hna okabâ:

²⁰ ke ame he at bihut ka hajijingâ je ûnyi e hnân hudiny hajijing hnyi hnyimakö Iehova; wale ûnyi ae kap hobi kâu at bihut, tha e me ûlainy hajijing, me benyin hnân kap goranyai: ke hwaban e, e khana at Nazeri he ka ic waina.

²¹ Wale hnanyibuiny at Nazeri at ame ip khöbi, me anyin hut kö Iehova hnyi hnen hna okabâ e, me ke je ûnyi ame ne hu gan: e ame he ka ânyâ hoton hnanyibuiny hnen hna okabâ, helâ me anyin khöbi wale hnyi hnen hna bi khöbi.

²² Ke Iehova ame ha kö Mose, ka habe,

²³ Ha thö kö Arona me lakon, ka habe, Walang hwakecin he ka hahnahicâ lakon Isaraela: öbun e he ka ha ködra, ka habe,

²⁴ Ame he Iehova ka ohnahici u, me tuö u:

²⁵ Ame he Iehova ka omelamâ hnyimakan hom, me betenge gam:

²⁶ Ame he Iehova ka ogöranyâ hnyimakan hom, me ham köu ûsoköu.

²⁷ Ke adre me he ka ip iök hon lakon Isaraela helâe; ke oge me he ka ohnahici ödra bi.