Numera 4 - Iaai Bible 1901 (New Caledonia)

¹ KE haba Iehova ame ha kö Mose me Arona, ka habe,

² Aû ûseiny laku Kohatha unyin laku Levi, hoton anyidra je lap, me je hnyaban lakamödra,

³ hwân ge tavat a thöte huna me gan hon e ke ne o but fifte huna, tavat hia adre me hnyi vat, he ka ânyâ huliwa hnyi uma ûkhacaköu.

⁴ Walang huliwa anyin laku Kohatha hnyi uma ûkhacaköu, hnyi ta je ûnyi ae ti kap:

⁵ e ka hwân tavat ka he but, me hamö Arona me lakon he ka didro, me âi mano a singiny, me tube tang ohnatho hnen e:

⁶ kʼ ame he ka ip hon e tubwiny unen takasa, me ulolo hon e imano ae udrudrâ hia, me inâ li venyâiny.

⁷ Ke adre me he ka ulolo imano ae udrudrâ hon laulau areto hnân omanenâ, me ip hon e je mini, me je spun, me je utkaia, me je kaia hnân hingâlâ: ke ame he ka hnen hon e areto ae bala bi:

⁸ ke adre me he ka ulolo hon je ûnyi e imano ae dra vec, me tube je ûnyi e ge tubwiny a unen takasa, me inâ li venyâiny.

⁹ Ke adre me he ka hom mano ae udrudrâ me tube taben lamepa hnân umumelam, me ta je lamepainy, me uthesiûniny, me je taben wahleûhleûiny, me je kaia wakaco hia, wale adre me huliwa kâu:

¹⁰ ke adre me he ka ip e me je omjehen hia hnyi hnyin tubwiny a unen takasa, me bi venyâiny.

¹¹ Ke adre me he ka ulolo mano ae udrudrâ hon taben hut a gol, me tube e hnen tubwiny a unen takasa, me inâ li venyâiny:

¹² ke adre me he ka hom je utkaia hia adre huliwa kâu, waleadre me huliwa kâu hnyi dok ae kap, me ip hnyi hnyin mano ae udrudrâ, me tube je ûnyi e hnen tubwiny a unen takasa, me bi venyâiny.

¹³ Ke adre me he ka aoc degecâ hnabadröu ûnyi hnyi taben hut, me ulolo hon e imano ae udrudrâ hlit:

¹⁴ ke adre me he ka ip hon e je utkaia hia, wale adre me huliwa kâu, a je taben meic, me ie bâletiny hnân sēû utiö, me je soi, me je kaia, a je omjehen taben but hia; ke adre me he ka ulolo hon e tubwiny a unen takasa, me inâ li venyâiny.

¹⁵ Ke e ka hia but tube dok ae kap hnö Arona me lakon, me omjehen dok ae kap hia, anyin ame he ka he but tavat; haba hnyi ûen e me ame he ka o je laku Kohatha he ka sukhöûnâ: ke ca he ödra ka kâlâ ta je ûnyi ae kap, wâ ödra nye mokcu. Wale hanymen laku Kohatha hnyi uma ûkhacaköu.

¹⁶ Ke haba Eleazara nöku Arona at bihut ame he ka tuö wakaco hnân umumelam, me je unyi ae be so hnân le, me hudiny han a e bala bi, me wakaco hnân hû, me hanymen uma mano hia, me ta je ûnyi hia hnyin, me dok ae kap, me omjehen hia.

¹⁷ Ke Iehova ame ha kö Mose me Arona, ka habe,

¹⁸ Ca he öbu ka hna subâ tribuiny lap anyi Kohatha unyin at Levi:

¹⁹ ke walang ûnyi he ka ûnyâ ködra mʼ adre me möt, me ca mok hnyi ûen adre me hakekenyâ je ûnyi ae ti kap: haba Arona me lakon ödrin e he ka didro, me ve kû ködrin ta je hanymodrin, me hon ödrin je hok:

²⁰ ke ödrin e ca he ka didro he ka hama dok ae kap, hnyi thuthubademak wâ ödrin nye mokcu.

²¹ Ke Iehova ame ha kö Mose, ka habe,

²² U me he ka aû minya laku Geresoma, hoton je hnyaban lakamödra, ke hoton anyidra je lap;

²³ hwân ge tavat a thöte huna me gan hon e ke ne o but fifte huna u ma he ka öû ödrin; a ödra hia adre me didro he ka hnyi huliwa me bi hanymen hnyi uma ûkhacaköu.

²⁴ Walang je hanymen je lap anyi Geresoma he ka bi huliwa me hije hok:

²⁵ adre me he ka sukhöûnâ je singiny uma mano, me uma ûkhacaköu, me ban ethö, me tubwiny a unen takasa a e hon, me singiny hwanumen uma ûkhacaköu;

²⁶ me mano adre uhno hnyi hak, me tubwiny a hlinginy homagöuleny hak, wale hnyi uma mano me hnyi taben hut igigilö, me je wen e, me ta je omjehen huliwa hia, me ta je ûnyi hia adre ânyâ hobi kâu ta je ûnyi e, adre me he ka bi hanymen hnyin.

²⁷ Hamö Arona me lakon he ka musö ta je huliwa hia anyin laku Geresoma hnyi je banymödra hia, me anyidra ta je huliwa hia: ke öbun e he ka ve khenâ ködra he ka ve tuö je hanymödra.

²⁸ Walang hanymen je lap anyin laku Geresoma hnyi uma ûkhacaköu: ke ame he ka musö hanymödra hnö Ithamara nöku Arona at bihut he ka ânyâ.

²⁹ Ke haba laku Merari u me he ka öû ödra hoton anyidra je lap, hoton je hnyaban je lakamödra;

³⁰ hwân ge tavat a thöte huna, u me he ka öû ödra, a ödrin hia adre me hnyi dit he ka hnyi huliwa, me ânyâ hanymen hnyi uma ûkhacaköu.

³¹ Walang je ûnyi hamödra he ka sukhöûnâ hnyi anyidra je huliwa hia hnyi uma ûkhacaköu; je esöiny uma mano, me je venyâiny, me je ûtoiny ame tot, me je taben e;

³² me je khetepiny hak igigilö, me je taben e, me je faoiny, me je wen e, tha e me je omjehen hia, me je huliwainy hia: ke öbun e he ka aû ien ta je ûnyi wale hanymödra he ka sukhöûnâ.

³³ Wale hanymen je lap anyin je laku Merari, hoton anyidra je huliwa hnyi uma ûkhacaköu, ame musö ga Ithamara nöku Arona at bihut.

³⁴ Ke haba Mose me Arona me je taben ûkhacaköu, ödrin e aû je laku Kohatha hoton anyidra je lap, me je hnyaban lakamödra,

³⁵ hwân ge tavat a thöte huna me gan hon e ke ne o but tavat a fifte huna, ödra hia adre me hnyi huliwa me ânyâ hanymen hnyi uma ûkhacaköu:

³⁶ ke haba tavat adre me aû hoton anyidra je lap, me ödra tu thauzan ke seven haded ke fifte.

³⁷ Wale tavat adre aû ûnyi hnyi lap anyin at Kohatha, ödra hia adre me huliwa hnyi uma ûkhacaköu, wale hnö Mose me Arona hna aû hoton hna hûna hnö Iehova a deny Mose.

³⁸ Ke haba tavat adre aû ûnyi hnyi laku Geresoma hoton anyidra je lap, me je hnyaban lakamödru,

³⁹ hwân ge tavat a thöte huna me gan hon e ke ne o but tavat a fifte huna, ödra hia adre me hnyi huliwa, me ânyâ hanymen hnyi uma ûkhacaköu,

⁴⁰ wale tavat adre aû hoton anyidra je lap, me je hnyaban lakamödra, me ödra tu thauzan ke siks haded ke thöte.

⁴¹ Wale tavat adre aû ûnyi hnyi je lap anyin laku Geresoma, ödra hia adre me hnyi huliwa hnyi uma ûkhacaköu, wale hnö Mose me Arona hna aû hoton hna hûna hnö Iehova.

⁴² Ke haba tavat adre me aû ûnyi hnyi je lap anyin je laku Merari hoton anyidra je lap me je hnyaban lakamödra,

⁴³ hwân ge tavat a thöte huna me gan hon e ke ne o but tavat a fifte huna, ödra hia adre me hnyi huliwa me ânyâ hanymen hnyi uma ûkhacaköu,

⁴⁴ wale tavat adre me aû hoton anyidra je lap, me ödra theri thauzan ke tu haded.

⁴⁵ Wale tavat adre aû ûnyi hnyi je lap anyin laku Merari, wale hnö Mose me Arona hna aû hoton hna hûna hnö Iehova a deny Mose.

⁴⁶ Ke haba tavat hia adre aû a at Levi, wale hnö Mose me Arona me je taben at Isaraela hna aû, hoton anyidra je lap, me je hnyaban lakamödra,

⁴⁷ hwân ge tavat a thöte huna me gan hon e ke ne o but tavat a fifte huna, ödra hia adre me didro he ka hnyi huliwa, me hijen je hok hnyi uma ûkhacaköu;

⁴⁸ wale tavat adre me aû, me ödra eit thauzan ke faiv haded ke eite.

⁴⁹ Adre me öû ödra hoton hna hûna hnö Iehova a deny Mose, a ke at me ke at hoton anyin huliwa, me hok: adre öû ödra helâe hoton hna hûna hnö Iehova kö Mose.