Numera 36 - Iaai Bible 1901 (New Caledonia)

¹ KE ame he je taben ae beönua ûnyi hnyi lap anyin laku Gileada, nöku Makir, nöku Manase, ûnyi hnyi je lap anyin laku Josefa, me fuc kö Mose, me je than, a je taben ae beönua unyin lakon Isaraela;

² me ödrin e ha, ka habe, Hnö Iehova hna hûna köu than he ka ham hnyei me me iny lakon Isaraela, ûnyi ge ugleköb: ke Iehova ame hûna köu than he ka ha i Zelofeada liamekeiny möhmun ka lakon je hlu.

³ Ke ödrin e ne lâiân je bagainy ke tribuiny lakon Isaraela, me adre me he ka hom hmetu idrin ûnyi hnyi iny lakamöhmun, me me tha e bi me iny tribu wale ödrin e lâiân hnyin: me adre me he ka hom but e ûnyi hnyi ihmun, wale a hwajekhöûhmun.

⁴ Ke ame ne o thö jubeli anyin lakon Isaraela, me ame he ka khaca ihmun me iny tribu waleji ödrin e tha ödrin mê: me adre me he ka hom iny tribuiny lakamöhmun.

⁵ Ke haba Mose ame hûna ka lakon Isaraela, hoton hofuc ho Iehova, ka habe, E hnathu hna ha hnen tribuiny laku Josefa.

⁶ Walang hofuc a hûna Iehova ge je hlu laku Zelofeada, ka habe, Odrin e he ka lâiân hnödrin je hna weny, ke so bi ödrin e he ka lâiân je lapiny tribu anyin kamödrin.

⁷ Me helâe adre me ca he ka ûhomköuâ je iny lakon Isaraela ûnyi hnyi ke tribu ka hnyi ke tribu; anyin ame he lakon Isaraela ka ve kece hmâ ka hnyi je iny je tribu anyin lakamödrin.

⁸ Ke haba wahlu hia a ödrin tren hnyei hnyi je tribu anyin lakon Isaraela, me ödrin e he ka lâiân tavat a hanen lap anyin tribuiny lakamödrin, me me he bala bi lakon Isaraela ka ve labā iny lakamödra.

⁹ Ke ca he bi ka ûhomköuâ je hnyei ûnyi hnyi ke tribu ka hnyi ke tribu; anyin ame he je tribuiny lakon Isaraela ka ve kece hmâ ka hnyi je idra.

¹⁰ Ke haba je hlu a laku Zelofeada, me ödrin e ânyâ helâ me hna hûna hnö Iehova kö Mose:

¹¹ me haba Mala, me Tireza, me Hogela, me Mileka, me Noa, a je hlu laku Zelofeada, me ödrin e lâiân je hidröuiny lakon je liamekeiny me kamödrin.

¹² Ke ödrin e lâiân je lap anyin je laku Manase, nöku Josefa, ke e bala bi idrin hnyei tribuiny lap anyin kamödrin.

¹³ Wale je hna hûna me je hna owisa, waleji Iehova ame ha ka lakon Isaraela a deny Mose, hnyi dok ae tha hon hnyi Moaba wale baten Joridano hnyi Jeriko.