Numera 35 - Iaai Bible 1901 (New Caledonia)

¹ KE haba Iehova ame ha kö Mose hnyi dok ae tha hon hnyi Moaba hnyi baten Joridano wale Jeriko, ka habe,

² Huna thö ka lakon Isaraela, mʼ adre me he ka ham ûnyi hnyi idra je taun he ka labā, ka at Levi; kʼ öbun e he ka ham minya ka at Levi je utkânâ igigilö je taun.

³ Me me he ka hu je taun gadra he ka labā; ke haba je utkânâ igigilö je taun, me hnân hobi kâu haledra je kau, me anyidra ta je omjeû, me haledra je meno hia.

⁴ Ke haba utkânâ igigilö je taun, wale öbun e he ka ham ka at Levi, me ame he ka hwân hnyi hna up hagin vetoiny taun ke ne o but ka hnyi khaca thauzan kubit igigilö.

⁵ Ke öbun e he ka tuluto hoton je taun, tu thauzan je kubit e deiö, ke tu thauzan je kubit ka hnyi hwaiöu, ke tu thauzan je kubit e jio, ke tu thauzan je kubit ka hnyi hwadrö, kʼ ame he ka mokut taun hnyi wanben. Wale je utkânâ hobi ködra igigilö je taun.

⁶ Ke haba je taun öbun e he ka ham ka at Levi, me wale je taun a siks hnân lubaduöng, wale öbun e he ka ip hobi kâu at ûhlingö hnân he ka kec ka hnyin: ke öbun e he ka ham minya ködra fâte tu ta je taun.

⁷ Ke haba je taun hia öbun e he ka ham ka at Levi, me ûsa fâte eit ta je taun: öbun e he ka ham e me utkânâ igigilö a

⁸ Ke öbun e he ka ham je taun ûnyi hnyi hnyei iny lakon Isaraela, kʼ öbun e he ka hom gânâ ûnyi hnyi hnyei ae gan; kʼ öbun e he ka hom ûhnyûkongo ûnyi hnyi hnyei ae ûhnyûkong: adre me he ka ve ham je taun ka at Levi hoton je idra ae hu gadra.

⁹ Ke Iehova ame ha kö Mose, ka habe,

¹⁰ Ha thö ka lakon Isaraela, ka habe, Öbun ka he ka hanyâûâ Joridano ka hnyi hnyei Kanana,

¹¹ me öbun e he ka kû ke je taun hnân je tauniny lubaduöng hobi köbun; me me he ka kec ka hnyin at ûhlingö wale at ame hlingâ at a utöteta.

¹² Haba je taun eling me hnân kec ka hnyin can at ame he ka bi hwaban; me me ca he ka mok at ûhlingö kʼ adre tiga ca lelö e ka hnyi hnyimakan ûkhacaköu he ka owisa e.

¹³ Ke haba je taun eling öbun e he ka ham, me wale siks ta tauniny lubaduöng hobi köbun.

¹⁴ Öbun e he ka ham kun ta taun hnyi hoton Joridano, ke öbun e he ka ham minya kun ta taun hnyi hnyei Kanana; wale je tauniny lubaduöng.

¹⁵ Ke hnân hobi kâu lakon Isaraela, me atkanyua, me tavat adre me tha laba medra, je taun eling a siks hnân lubaduöng hnyin; me me he ka kec ka hnyin tavat hia adre me hlingâ at a utöteta.

¹⁶ Ke ame ne hia but kot moko e ge ut fao, awe, at ûhlingö e; ke adre me he ka hlingâ at ûhlingö.

¹⁷ Ke ame ne kot moko e ge veto hnyi hnyamen, a ûnyi hnân I hlingâ at, kʼ ame ne mokcu, awe, at ûhlingö e: ke adre me he ka hlingâ at ûhlingö.

¹⁸ Ke ame ne kot e ge uto hnyi hnyamen, a ûnyi hnân hlingâ at, me ame mokcu, awe, at ûhlingö e; ke adre me he ka hlingâ at ûhlingö.

¹⁹ Ke hamen at bi hwaban komok he ka hlingâ at ûhlingö: e ka ûkhanö mê e ame he ka hlingâ.

²⁰ Ke ame ne dâ e hnyi hnen hna hûkötiâ, kʼ ame ne mokut iyâûâ me lûâ, me me mokcu;

²¹ kʼ ame ne kot e ge hnyamen hnyi hmönyin, me me mokcu: me adre he bi ka hlingâ at a ûkhulup; at ûhlingö e: kʼ ame he at a bi hwaban komok ka hlingâ at ûhlingö, e ka ûkhanö mē.

²² Ke ame ne ie dâ e ke ca hmönyin bi, kʼ ame ne lûâ ke a ca mokut iyâûâ,

²³ ame ne ge veto, a ne ûnyi hnân hlingâ at, ke a ca wâ bi e, kʼ ame khûâ me aat dö, kʼ ame mokcu at, ke ca iwahnaihmiony mē ehac, kʼ ame ca elâm he ka okongoâ:

²⁴ awe, ame he ûkhacaköu ka owisa gadru, a at hlingâ at, me at ame bi hwaban komok, hoton je hna owisa eang:

²⁵ ke ame he ûkhacaköu ka omelö at ame hlingâ at ûnyi hnyi hnyamen at ame bi hwaban komok, ke ame he ûkhacaköu he ka ohmeto e ka hnyi tauniny lubaduöng, waleji e ame kec ka hnyin: ke e ame he ka laba eling ke ne o but ame mokcu at bihut ae beönua, at adre hû ge wakaco ae kap.

²⁶ Ke ame ne he at ame hlingâ at ka dit hanyâûâ hnyigöulen tauniny lubaduöng, waleji e ame kec kâu;

²⁷ kʼ ame ne wâ e hnen at ame bi hwaban komok hnyi hoton hnyiʼ göulen tauniny lubaduöng, kʼ ame ne hlingâ at ûhlingö hnen at ame bi hwaban komok, awe, e ame ca he ka hulö ge dren:

²⁸ anyin ae ûcû kâu he ka laba hmâ hnyi tauniny lubaduöng, ke ne o but ame mokcu at bihut ae beönua: ke hwaban imekiny at bihut ae beönua, me ame he at ûhlingö ka hmetu ka hnyi iny hnyei.

²⁹ Haba ta je ûnyi e me wale hnanyibuiny owisa köbun hnyi anyibun ta je dö hnyi je hnyababun hia.

³⁰ Haba at ame hlingâ at, me adre me he ka hlingâ thibi at ûhlingö ge hofuc hwan hnyat ohnatho: kʼ ame ca he at a khaca ka ohnatho ge ke at mʼ adre me he ha hlingâ e.

³¹ Ke haba khaca, öbun e ca he ka kap hwaban möt anyin at ûhlingö ae ûcû he ha mok: e hnathu adre me he ka hlingâ.

³² Ke ca he öbun ka kap hwaban möt anyin at ame kec ka hnyi tauniny lubaduöng, me me laba hmetu bi hnyi iny hnyei, ke ne o but imekiny at bihut.

³³ Waleling mʼ öbun e ca he ka okongoâ hnyei öbun e labā: anyin a haba dra, me, wale ûnyi ame okongoâ hnyei: ke e ca khanʼ ödra he ka bi hwaban melen hnyei unyi hnyi dra adre hingölö hnyin, ke so bi ûnyi ge dren at ame hingâlâ.

³⁴ Ke ca he öbun ka okongoâ hnyei öbun e laba hnyin, ke inya oge me laba hynin: anyin a inya Iehova oge me laba hnyi wanben lakon Isaraela.