Numera 32 - Iaai Bible 1901 (New Caledonia)

¹ KE haba laku Reubena, me laku Gada ödrin e tren omeno ae se hia: ke ödra adre me wâ hnyei Jazera, me hnyei Gileada, me wâ bi, hnyei ae so hobi kâu ta je meno;

² me ame he laku Gada me laku Reubena, me ha kö Mose me Eleazara at bihut, me je tuhan ûkhacaköu, ka habe,

³ Haba hnyei Atarotha, me Dibona, me Jazera, me Nimera, me Hesebona, me Eleala, me Sebama, me Nebo, me Beona,

⁴ wale hnyei Iehova ame kot hnyi hnyimakan ûkhacaköu anyin at Isaraela, me, wale hnyei ae ûcû hobi kâu omeno, ke ohmun tavat tren omeno a lathnyabaem.

⁵ Ke ödrin e ha, ka habe, U je ne betenge gahmun, ö u hna hnyei eling köhmun a lathnyabaem, me ihmun; ke ca hum ohmun bi he ka hanyâûâ Joridano.

⁶ Ke Mose ame thu ka laku Gada me laku Reubena, ka habe, Hawa, ame he je liamekeiny möbun ka vat e helë, ke öbun e he biju ka laba eang?

⁷ Ke ieû gabun öbun e ohluhluâ hnyekon lakon Isaraela, mʼ adre me ca he ka hanyâûâ ka hnyi hnyei waleji a ham ködra Iehova?

⁸ Ame ânyâ helâe lakamöbun waleji hnyi hnok hna kunʼ ödrin ûheny Kadesi-banea he ka ecmâkâ hnyei.

⁹ Anyin a ödrin e he but ka hnyi hnyigöulen bucen Esekolo, me wâ hnyei, me ödrin e ohluhluâ hnyekon lakon Isaraela, mʼ adre me ca he ka hnyi hnyei waleji a ham ködra Iehova.

¹⁰ Ke ame ubâhlâ thö hmönyin anyi Iehova hnyi bong eling, me e ame khemanyin, ka habe,

¹¹ Haba tavat adre he jem ûhedra Aigupito, hwân ge tavat a twente huna me gan hon e, me adre me ca he ka hnyi wâ hnyei waleji oge khemanyin kö Aberahama me Isaaka, me Jekob; anyin adre me ca hnu hotuk hnyi ta je ûnyi hia:

¹² ke ca ha bi Kaleba nöku Jefune at Kenaza, me Josua nöku Nuna: anyin a ödre hnu hotu Iehova hnyi ta je ûnyi hia.

¹³ Ke ame ubâhlâ thö hmönyin anyi Iehova ka at Isaraela, me e ame ohei ödra hnyi hnyebuba fâte je huna ke ne o but ame hia but tavat adre me ânyâ hulö hnyi hnyimakö Iehova.

¹⁴ Ke wâ bi, öbun e o biju hwaban lakamöbun, a hanen tavat ae kong, he ka ogânâ hmönyin ae gan anyi Iehova kö Isaraela.

¹⁵ Anyin a öbun e ne hmetu ûhebun unyin, me e ame he hmetu ka hna degeci öbun hnyi hnyebuba; ke öbun e he ka ohia tavat eang hia thithö.

¹⁶ Me ödrin e hakekeny kâu me ha, ka habe, Ohmun e he ka si hagin halehmun je meno eang, me bi hnyaban lakuhmun, can aten hnyei:

¹⁷ ke ohmun e he ka penapena me hnyimakan lakon Isaraela, ke ne o but ohmun e hum ödra ka hnyi idra: kʼ ame he lakuhmun bi ka labā je taun adre up haginy, can aten hnyei.

¹⁸ Ohmun e ca he ka hmetu ka hnyi umöhmun je uma ke ne o but ame ve hu iny lakon Isaraela hia.

¹⁹ Anyin a ohmun e ca he bi ka tha tren hnyei mödra hnyi ke keihen Joridano ke e jio, anyin adre kû köhmun ihmun hnyi ke keihen e deiö Joridano.

²⁰ Ke haba Mose ame thu ködrin, ka habe, Öbun e ne he ka ânyâ ûnyi e; wale öbun e ne he ka penapena he ka he hnyi hnyimakö Iehova he ka hnyi vat e helë,

²¹ kʼ ame ne he tavat penapena hia unyibun ka hanyâûâ Joridano hnyi hnyimakö Iehova, ke ne o but e ame obâ je iwahnaihmiony mē hnyi hnyimakan,

²² me hom ûhnyûkongo hnyei hnyi hnyimakö Iehova: awe, öbun e he ka hmetu hwaban e, kʼ ame he ka ba hulö gabun hnyi hnyimakö Iehova, me hnyi hnyimakan at Isaraela; ke haba hnyei eang, me ibun bi hnyei hnyi hnyimakö Iehova.

²³ Ke öbun e ne ca ânyâ e, me wâ bi, öbun tavat hulö kö Iehova: ke wâhmakhmeto ju öbun, a gʼ ame he ka omanenʼ öbun ge anyibun hulö.

²⁴ Otilâ ju je taun hobi kâu je lakubun, me bi haginy halebun je mamoe; ke he thʼ öbun ka ânyâ ûnyi ame o ûnyi hnyi je hnyimö-bun.

²⁵ Me ame ha laku Gada me laku Reubena kö Mose, ka habe, Ohmun e he a lathnyabaem ka ânyâ helâ me than ame ha.

²⁶ Ame he lakuhmun me laöiöhmun, me halehmun je hnahat mamoe, me halehmun je meno hia ka laba hnyi je taun e Gileada:

²⁷ kʼ ame he lathnyabaem ka hanyâûâ, a tavat gahmun hia adre me hom omjehen vat hnyi hnyimakö Iehova he ka hnyi vat, hoton hna ha hnen than.

²⁸ Me haba Mose ame hûn ödra kö Eleazara at bihut, me kö Josua nöku Nuna, me ka je taben ae beönua hnyi je tribuiny lakon Isaraela.

²⁹ Ke Mose ame ha ködra, ka habe, Ame ne tha he möbun laku Gada me laku Reubena ka hanyâûâ Joridano, a je hnyat hia adre hom omjehen vat, hnyi hnyimakö Iehova, me hom ûhnyûkongoâ hnyei hnyi hnyimaköbun; awe, öbun e he ka ham ködra hnyei Gileada me me idra bi:

³⁰ ke adre me ne ca hom omjehen vat me tha hanyâûâ unyibun, awe, adre me he ka tha hnyei unyibun hnyi hnyei Kanana.

³¹ Ke haba laku Gada me laku Reubena adre me thu, ka habe, Ohmun e he ka ânyâ helâ me Iehova ame ha köhmun a lathnyabaem.

³² Ohmun e he ka hom omjehen vat me hanyâûâ hnyi hnyimakö Iehova ka hnyi hnyei Kanana, me me he ka hu ihmun hnyei hnyi ke keihen e deiö Joridano.

³³ Me haba Mose ame ham ködra, a laku Gada, me laku Reubena, me hafiny tribu Manase a nöku Josefa, dökhu dökhu Sihona thaniny at Amora, me dökhu dökhu Oga thaniny Basana, wale hnyei me je tauniny, a je tauniny hngei igigilö.

³⁴ Ke haba laku Gada, adre me otilâ Dibona, me Atarotha, me Aroera;

³⁵ me Aterotha-sofana, me Jazera, me Jogebea,

³⁶ me Bethe-nimera, me Bethe-harana: a je taun adre up haginy, me je haginy mamoe.

³⁷ Ke haba laku Reubena, me adre me otilâ Hesebona, me Eleala, me Kiriathaima;

³⁸ me Nebo, me Baala-meon (kʼ adre wia li ien,) me Sibema: ke adre me ve hwenyi ien je taun adre otilâ.

³⁹ Ke haba laku Makir nöku Manase, me, adre me he Gileada ai, me hûgûnâ, me obâ at Amora ûnyi hnyin.

⁴⁰ Ke Mose ame ham Gileada kö Makir nöku Manase; mʼ adre me labā e.

⁴¹ Ke haba Jaira, nöku Manase, ame he me hûgûnâ je tauniny, me hwenyi ien Havoth-jaira.

⁴² Ke haba Noba ame he me hûgûnâ Kenatha me je tauniny, ae ûhnyûkong, me hwenyi ien e Noba hoton ien bi.