Numera 31 - Iaai Bible 1901 (New Caledonia)

¹ KE Iehova ame ha kö Mose, ka habe,

² U me he ka bi hwaban at Midiana can lakon Isaraela: ke hwaban e, me adre me he ka tha hum u ka lakâmâm.

³ Ke haba Mose ame ha ka tavat, ka habe, He thʼ öbun ka penapena keihen gabun he ka vat, mʼ adre me he ka vat at Midiana he ka bi hwaban at Midiana hobi kö Iehova.

⁴ Ke öbun e he ka kunâ ûsa khaca thauzan ûnyi hnyi je tribu Isaraela hia he ka vat.

⁵ Me adre me ham ûnyi hnyi je thauzaniny Isaraela, ûsa khaca thauzan ûnyi hnyi je tribu, a twelv thauzan adre penapena hnân vat.

⁶ Ke Mose ame kunʼ ödra, a ûsa khaca thauzan ûnyi hnyi je tribu, he ka vat, walödra me Fineasa, a nöku Eleazara at bihut he ka hnyi vat, tha e me je ûnyi ûnyi hnyi dok ae kap, ke lo li trutru hnyi hnyamen he ka tûâ.

⁷ Me adre me vat me at Midiana helâ me Iehova ame hûna kö Mose; ke adre me hlingâ obaga hia.

⁸ Ke adre me hlingâ je thaniny Midiana tha ödrin me tavat adre hlingâ; wale Evi, ke Rekem, ke Zura, ke Huro, ke Reba, ödrin je thaniny Midiana a thabûng: ke adre me hlingö Balaama nöku Beora ge hele vat.

⁹ Ke haba lakon Isaraela adre me hom hwenbâ omomoiny Midiana, me ta je ûhnyûkongidra; me hûgûnâ hia haledra je hnahat kau me mamoe, me je omjehedra

¹⁰ Ke adre me thong degecâ ge meic anyidra je taun hnyi je dok adre me laba hnyin.

¹¹ Ke adre me söh, me hûgûnâ ta je ûnyi hia, a at me meno.

¹² Ke adre me hom je bâ, me omeno, me hnödra hna hûgûnâ, kö Mose, me Eleazara at bihut, me ûkhacakoû anyin lakon Isaraela, ka hnyi hna hunuma hnyi je dok ae tha hon hnyi Moaba, i wale baten Joridano hnyi Jeriko.

¹³ Ke haba Mose, me Eleazara at bihut, thaödru me je thaniny ûkhacaköu, ödrin e he he ka ûkhanö mödra hoton hna hunuma.

¹⁴ Ke Mose ame hmönyin ka tavat musö vat, a je taben thauzan, me je taben haded, a je hnyat ödrin e hmetu ûhedrin hnyi vat.

¹⁵ Ke Mose ame ha ködrin, ka habe, Hawa, öbun e omelö hia omomo?

¹⁶ Wâ bi walödrin e hnyat ödrin e bijoniny lakon Isaraela, me me hna degeci Iehova hnyi ûnyi eji anyi Peora, hnen ûne anyi Balaama, me me o mok ae cap ka hnyi ûkhacaköu anyi Iehova.

¹⁷ Anyin a wale hlingâ but wainda hia unyin je wanakat, ke hlingâ but watamomo hia, tavat adre hia but tha mokut me baga.

¹⁸ Ke omelö ju hobi köbun bi wahlu a ca tha mokut me baga.

¹⁹ Ke öbun e he ka hunuma hoton hna hunuma hnyi seven ta bong; a je hnyat unyibun adre hia but hlingâ at, me hnyat unyibun adre hia but kâlâ komok, me obosoi öbun bi me anyibun je bâ hnyi bong a kuniny me bong a seveniny.

²⁰ Ke haba je ûkhaû hia, me ta je ûnyi hia adre tibet ûnyi hnyi unen meno, me leûnen got, me uto, me öbun e he ka obosoi öbun can ta je ûnyi eling.

²¹ Ke haba Eleazara at bihut ame ha ka tavat adre hnyi vat, ka habe, Walang hna owisa hnen hnanyibu waleji hnö Iehova hna hûna kö Mose;

²² haba gol, me sileva, me bras, me fao, me tin, me led,

²³ a ta je ûnyi hia a ca an ge meic, me öbun e he ka inâ ta je ûnyi e hnyin meic, me me bo so but; ke so bi adre me he ka obosoâ minya ge köien hake ip.

²⁴ Ke öbun e he ka hneû anyibun je ûkhaû hnyi bong a seveniny, mʼ öbun e bo so, ke hwaban e me öbun e he ka dit ka hnyi hna hunuma.

²⁵ Ke Iehova ame ha kö Mose, ka habe,

²⁶ U me he ka aû ûseiny ta je ûnyi adre hûgûnâ, wale at me meno, hamâm, me Eleazara at bihut, me lakamen ae beönua hnyi ûkhacaköu:

²⁷ me khenâ luâ but ta je hna hûgûnâ ka tavat vat ae metâ ûhedra hnyi vat, me ka ûkhacaköu hia:

²⁸ ke u me he ka hûna he ka bi fat kö Iehova hnen tavat adre hnyi vat: a ûsa khaca ûnyi hnyi je faiv haded, ame ne tavat, ame ne bolok, ame ne asina, ame ne mamoe:

²⁹ hom dö e ûnyi hnyi jekhoudra me ham kö Eleazara at bihut, hnân hudiny hajijing kö Iehova.

³⁰ Ke u me he ka hom ûnyi hnyi jekhon lakon Isaraela, ûsa khaca ûnyi hnyi je fifte, a tavat, me bolok, me asina, me mamoe, me omeno hia, me ham hia ka at Levi, tavat adre me ânyâ hanymen hnyi uma mano umö Iehova.

³¹ Me haba Mose me Eleazara at bihut ödru me ânyâ hoton hna hûna hnö Iehova kö Mose.

³² Ke haba ta je meno adre söh, ke ca ha ge ta je ûnyi adre hûgûnâ hnen aten vat, me siks haded ke sevente faiv thauzan ta je mamoe,

³³ ke sevente tu thauzan ta je bolok,

³⁴ ke sikste wan thauzan ta je asina,

³⁵ ke haba tavat hia, me, thöte tu thauzan a je hlu adre tiga ca tha mokut me baga.

³⁶ Ke haba ke haf, wale jekhon tavat adre hnyi vat, haba numerainy me theri haded ke thöte seven thauzan ke faiv haded je mamoe:

³⁷ ke haba fat kö Iehova ûnyi hnyi je mamoe, me, siks haded ke sevente faiv.

³⁸ Ke thöte siks thauzan je bolok, ke haba fatiny hobi kö Iehova, me, sevente tu.

³⁹ Ke thöte thauzan ke faiv haded je asina; ke haba fatiny hobi kö Iehova me sikste wan.

⁴⁰ Ke sikstin thauzan tavat; ke haba fat kö Iehova, me ödrin thöte tu.

⁴¹ Ke haba Mose ame ham fat, wale hudiny kap goranyai kö Iehova, kö Eleazara at bihut, hoton hna hûna hnö Iehova kö Mose.

⁴² Ke haba jekhon lakon Isaraela, wale hnö Mose hna khenâ ûnyi hnyi hna hûgûnâ hnen aten vat,

⁴³ (haba jekhon ûkhaca köu me, theri haded ke thöte seven thauzan ke faiv haded je mamoe,

⁴⁴ ke thöte siks thauzan je bolok,

⁴⁵ ke thöte thauzan ke faiv haded je asina,

⁴⁶ ke sikstin thauzan tavat:)

⁴⁷ ke Mose ame hom ûnyi hnyi jekhon lakon Isaraela ûsa khaca ûnyi hnyi je fifte, a tavat me omeno, me ham ka at Levi, tavat adre me ânyâ hanymen hnyi uma mano umö Iehova; hoton hna hûna hnö Iehova kö Mose.

⁴⁸ Ke ame o but kö Mose je taben thauzaniny je utbavat, a je taben je thauzan, me je taben je haded:

⁴⁹ ke ödrin e ha kö Mose, ka habe, Ohmun je lathnyabaem, ohmun e aû ûseiny tavat vat unyihmun, me ca hia ke at gahmun.

⁵⁰ Ke ohmun e hom jem hut kö Iehova, a je ûnyi ohmun e ve hûgûnâ, je hmanenanginy gol, je wen can, me je wen benyin, me je wen banyen, me je anen hnyikonyen, me ta je waen, hnân he ka bi hwaban anyihmun möt hnyi hnyimakö Iehova.

⁵¹ Ke haba Mose me Eleazara at bihut, ödru me hom ta je gol ûnyi gadrin, wale je hmanenanginy hia thithö adre huliwan.

⁵² Ke haba gol hia thithö wale hudiny kap goranyai ödrin e hudo kö Iehova, a ûnyi ge je taben je thauzan, me je taben je haded, me, sikstin thauzan ke seven haded ke fifte ta je sekel.

⁵³ (Anyin a haba aten vat, me adre me hia but ve hûgûnâ ta je ûnyi, wale ke at me ke at gadra.)

⁵⁴ Ke haba Mose me Eleazara at bihut ödru me hom gol ûnyi ge je taben je thauzan, me je taben je haded, me hom ka hnyi uma ûkhacaköu, hnân oûnykûmeâ ka lakon Isaraela hnyi hnyimakö Iehova.