Numera 30 - Iaai Bible 1901 (New Caledonia)

¹ KE haba Mose ame ha ka je taben je tribuiny lakon Isaraela, ka habe, Walang ûnyi a hûna Iehova.

² Ame ne he ke at ka bi khöbi kö Iehova, ame ne khemanyin he ka ca hnyekon ge hwan hofuc, me e ame ca he ka hanyâûâ hnen hna ha; ke e ame he ka ânyâ hia hoton hna he but ûuyi hnyi hnyimen.

³ Helâe minya ke momo ame ne bi khöbi kö Iehova, me ca hnyekon ge hwan hofuc, ke tiga e bi hnyi hnyaban kamen, ke tiga ca at hnathu;

⁴ ke ame ne löng anyin khöbi hnen kamen, me hofuc ame ca hnyekon kâu, kʼ ame ne laba hnyibi kamen; awe ame he ka tethmâ hia anyin khöbi, ke haba khaca ame he ka tethmâ hofuc hia ame ca hnyekon kâu.

⁵ Ke ame ne thawâ e hnen kamen, hnyi bong e ame löng hwan hnyin; awe, ame ca he ka tethmâ anyin khöbi, me hofuc a ca kâu hnyekon; kʼ ame he Iehova ka hna e, anyin a thawâ e hnen kamen.

⁶ Ke ame ne hu âiân, ke ka e bi anyin khöbi, ame ne ke hofuc ae ûhlöhlök ame he ûnyi hnyi li esongodiny, wale ame hia but ca hnyekon kâu;

⁷ ke e ka löng ut e hnen âiân baga, kʼ ame ca fuc kâu hnyi bong e ame löng hnyin; awe, ame he ka tethmâ anyin khöbi, me hofuc e ame ha, waleji a ca hnyekon kâu.

⁸ Ke ame ne thawâ momo hnen âiân hnyi bong e ame löng hnyin; awe, e ame he ka oûnyibâûâ anyin khöbi, me hofuc ae ûhlöhlök unyi hnyi li esongodiny, waleji e ame ca hnyekon gan: ke Iehova ame he ka hna but e.

⁹ Ke haba khöbiny safac, ame ne momo adre degec, me ame he ka tethmâ hia unyin hofuc hia e ame ca e gan.

¹⁰ Ke ame bi khöbi hnyi uma umen âiân a baga, kʼ ame ne ca hnyekon ge hofuc adre khemanyin,

¹¹ ke a löng ut hnen âiân, kʼ ame ne laba hnyibi, kʼ ame ca thawâ, awe, ame he ka tethmâ hia anyin je khöbi hia, kʼ ame he ka tethmâ hofuc hia waleji e ame ca hnyekon kâu.

¹² Ke ame ne hia but oûnyibâûâ hnen âiân a baga hnyi bong e ame löng hnyin, awe, ame ca he ka tethmâ je hofuc ûnyi hnyi li esongodiny hnyi anyin je khöbi, me hofuc ame ca hnyekon gan: anyin a hia but oûnyibâûâ je ûnyi e hnen baga; ke ame he Iehova ka hna e bi.

¹³ E khana âiân a baga he ka ohmâ, ke e khana âiân a baga he ka oûnyibâûâ je khöbi hia me je hna khemanyin hia a hnân ca hnyok.

¹⁴ Ke ame ne ba hofuc hwan baga ka momo a âiân hnyi ke bong me ke bong; awe, e ame ohmâ ta je khöbi hia anyin âiân a momo, me hofuc hia e ame ca hnyekon gan: haba e ame otilâ hmâ e, anyin ae ba hnen hna ha kâu hnyi bong e ame löng hnyin.

¹⁵ Ke ame ne he baga ka oûnyibâûâ, hnyi ûen e ame löng, awe, ame he ka takoû e hulö anyin momo.

¹⁶ Wale je hnanyibu a hûna Iehova kö Mose ge baga me âiân, me kamen me nokon hlu e ka tiga ca at hnathu bi hnyi hnyaban kamen.