Numera 28 - Iaai Bible 1901 (New Caledonia)

¹ KE haba Iehova ame ha kö Mose, ki habe,

² Hûna thö ka lakon Isaraela me ha ködra, ka habe, Haba hut könya, wale jeû hobi kâu je hut a an hnen meic me me bo so könya, me wale ûnyi öbun e he ka tuö he ka hudo könya hnyi je ûen adre thu.

³ Ke u me he ka ha ködra, ka habe, Walang hut a an ge meic öbun e he ka hudo kö Iehova; a je lakon mamoe baga a khaca hunainy ae ba hnyikongon, ûse lo hnyi ke bong me ke bong, hnân hudiny leû hnyi ta ogo bong hia.

⁴ U me he ka hudo ke nokon mamoe hnyi hnyomakatu, ke u me he ka hudo ke nokon mamoe hnyi sahac;

⁵ ke khaca omer salawa adre ûhaniken me wakaco adre kokot a ke keihen a vakiny hin, me hnân hudiny han.

⁶ Wale hudiny leû hnyi ta ogo bong hia, waleji adre hûna hnyi bucen Sinai me me bo so, a hut a an ge meic kö Iehova.

⁷ Ke haba hudiny ic, me ke keihen a vakiny hin hnân bi hanen nokon mamoe a khaca: u me he ka hingâlâ but waina ae hwege kö Iehova hnyi dok ae kap hnân hudiny ic.

⁸ Ke haba nokon mamoe a loiny me u me he ka hudo hnyi sahac: helâ me hudiny han hnyi hnyomakatu u me he ka hudo e, ke helâe hudiny ic, me hut a an ge meic ae bo so kö Iehova.

⁹ Ke haba hnyi bong sabath, me lo li nokon mamoe baga ae ba hnyikongon a khaca hunainy, ke lo li omer salawa hnân hudiny han adre ûhaniken me wakaco, me hudiny ic a hanen:

¹⁰ haba ûnyi e me hudiny leû hnyi ta je sabath hia, ke ca ha bi hudiny leû hnyi ta ogo bong, ke hudiny ic a hanen.

¹¹ Ke haba hnyi hnyimakan anyibun je tehi me öbun e he ka hudo hudiny leû kö Iehova: a lo li nak bolok, ke khaca mamoe baga, ke seven ta lakon mamoe baga ae ba hnyikongon, a khaca hunainy;

¹² ke kun ta omer salawa adre ûhaniken me wakaco hnân hudiny han hnân bi hanen ke bolok me ke bolok; ke lo li omer salawa adre ûhaniken me wakaco hnân hudiny han, a hanen mamoe baga a khaca;

¹³ ke khaca omer salawa adre ûhaniken me wakaco hnân hudiny han, a hanen nokon mamoe a khaca; hnân hudiny leû ae bo so, hut a an ge meic kö Iehova.

¹⁴ Ke haba je hudiny ic gadra, me hafiny hin waina hnân bi hanen ke bolok, ke ke keihen a kuniny hin hnân bi hanen mamoe baga, ke ke keihen a vakiny hin hnân bi hanen mamoe: wale hudiny leû hnyi je tehi hnyi huna.

¹⁵ Ke khaca got baga hnân hudiny hulö, he ka hudo kö Iehova; ke ca ha bi hudiny leû adre hudo bala, me hudiny ic a hanen e.

¹⁶ Ke haba hnyi tehi a bân hnyi bong a fortininy, me adre me he ka ânyâ paseka kö Iehova.

¹⁷ Ke hnyi bong a fiftininy tehi eling, me adre me he ka bijeû: adre me he ka han areto adre ca levenâ hnyi je bong a seven.

¹⁸ Ke haba hnyi bong a bân, me ame he ka hu ûkhacaköu ae kap; kʼ öbun e ca he ka ânyâ huliwa ae hmak:

¹⁹ ke öbun e he ka hudo hut a an ge meic, a hudiny leû kö Iehova; wale lo li nak bolok, ke khaca mamoe baga, ke seven je lakon mamoe a khaca hunainy: a je meno ae ba hnyikongudrin:

²⁰ ke haba je hudiny han a hanen, me, salawa adre ûhaniken me wakaco: öbun e he ka hudo kun ta omer hnân bi hanen ke bolok, ke lo li omer hnân mamoe baga;

²¹ u me he ka hudo ûsa khaca omer he ka ve bi hanen je lakon mamoe a seven;

²² ke khaca got baga hnân hudiny hulö, me me bi hwaban anyibun möt.

²³ Öbun e he ka hudo e, a tha e me hudiny leû adre hudo hnyi hnyomakatu a hudiny leû ae hmâ bala.

²⁴ Ke öbun e be ka hudo helâe hnyi je bong a seven, wale han he ka bi hanen hut a an ge meic kʼ ame bo so kö Iehova: adre me he ka hudo e a tha e me hudiny leû ae hmâ, me hudiny ic a hanen.

²⁵ Ke haba hnyi bong a seveniny öbun e he ka hu ûkhacaköu ae kap; ke öbun e ca he ka ânyâ huliwa ae hmak.

²⁶ Helâe minya hnyi bong bongon je wan a bân, öbun ka he ka hudo hudiny han ae teb ûnyi kö Iehova, hnyi anyibun bijeuâ je wik, me öbun e he ka hu ûkhacaköu ae kap; kʼ öbun e ca he ka ânyâ huliwa ae hmak:

²⁷ ke öbun e he ka hudo hudiny leû ae bo so kö Iehova; a lo li nak bolok, ke khaca mamoe baga, ke seven lakon mamoe baga a khaca hunainy;

²⁸ me hudiny han a hanen e, wale salawa adre ûhaniken me wakaco, kun ta omer hanen bolok a khaca, ke lo li omer hanen mamoe baga a khaca,

²⁹ a ûsa khaca omer he ka ve bi hanen lakon mamoe a seven;

³⁰ ke khaca got baga, hnân bi hwaban anyibun möt.

³¹ Öbun e he ka hudo e a tha e me hudiny leû ae hmâ, me hudiny han a hanen (a je meno ae ba hnyikongon) tha e me je hudiny ic a hanen e.