Numera 27 - Iaai Bible 1901 (New Caledonia)

¹ KE ame o but je hlu laku Zelofeada, nöku Hefera, nöku Gileada, nöku Makir, nöku Manase, a je lap anyi Manase nöku Josefa: ke walang ien lakon je hlu, jia Mala, me Noa, me Hogela, me Mileka, me Tireza.

² Ke ödrin e tot hnyi hnyimakö Mose me Eleazara at bihut, me hnyi hnyimakan je than me ûkhacaköu hia hnyi hwanumen uma ûkhacaköu, me ha, ka habe,

³ A mokcu kamöhmun hnyi hnyebuba, ke e ame ca tha tot me tavat adre me bi tot kö Iehova unyin lahiö Kora: ke so bi e ame moko anyin hulö bi, ke ba nokon baga.

⁴ Geû adre me he ka ohia ien kamöhmun hnyi wanben anyin lap, anyin ae ba nokon baga? Ha ihmun bi unyin je liamekeiny me cica.

⁵ Ke Mose ame hom hodrin hofuc kö Iehova.

⁶ Ke Iehova ame ha kö Mose, ka habe,

⁷ E wisa hofuc hwan je hlu laku Zelofeada: e hnathu u me he ka ha idrin unyin je liamekeiny me kamödrin; ke u me he ka hna ködrin iny kamödrin.

⁸ Ke u me he ka ha ka lakon Isaraela, ka habe, A ne mokcu ke at ke ba nokon baga, me öbun e he ka hna iny ka nokon hlu.

⁹ Ke ame ne ba nokon hlu, me öbun e he ka ham iny hnyei ka je liamekeiny mē.

¹⁰ Ke ame ne ba liamekeiny mē, me öbun e he ka ham iny hnyei ka je liamekeiny me kamen.

¹¹ Ke ame ne ba liamekeiny me kamen, me öbun e he ka ham iny hnyei ka je ûtangköu mē, a iny biju: ke wale hnanyibu adre owisa hobi kâu lakon Isaraela, hoton hna hûna hnö Iehova kö Mose.

¹² Ke Iehova ame ha kö Mose, ka habe, Öliâ thö bucen eang a Abarima, me u me wâ hnyei waleji oge ham ka lakon Isaraela.

¹³ Ke u ka hia but wâ e, me u me he ka he minya ka tha mokut me lakâmâm, helâ me Arona a tuhâm:

¹⁴ anyin a obe hanyâûâ hok hofuc hnyi hnyebuba Zin, waleji hnyi hna iwatretra hnen ûkhacaköu, he ka okabi nya hnyi an hnyi hnyimaködra. (Wale an Meriba e Kadesi, hnyi hnyebuba Zin.)

¹⁵ Ke Mose ame ha kö Iehova, ka habe,

¹⁶ E na he Iehova Khongon je hanon tavat hia, ka otilâ ke at hon ûkhacaköu,

¹⁷ me me didrut hnyi hnyimaködra me dit hmetu hnyi hnyimaködra, me lili ödra e helē, me ohmetu ödra, me me ca he ûkhacaköu anyi Iehova ka helâ me hnahat mamoe ae ba at ame tuö.

¹⁸ Ke Iehova ame ha kö Mose, ka habe, U me he ka hum Josua nöku Nuna, at ae so hanon, ke ip hnyamâm hon;

¹⁹ me otilâ e hnyi hnyimakö Eleazara at bihut, me ûkhacaköu hia; me hûna kâu hnyi hnyimaködra.

²⁰ Ke u me he ka ip hon e hanen ânyâm hmanenang, me me löng hoton hnen ûkhacaköu hia a lakon Isaraela.

²¹ Ke e ame he ka tot hnyi hnyimakö Eleazara at bihut, ke hamen he ka hnö hobi kâu hnyi hna owisa hnen Urim hnyi hnyimakö Iehova: ke adre me he ka he hoton hnen hna ha, kʼ adre me he ka hmetu hoton hnen hna ha, a e me lakon Isaraela hia a tha ödra mē, wale ûkhacaköu hia.

²² Ke Mose ame ânyâ helâ me hna hûna hnö Iehova; me e ame hum Josua me otilâ e hnyi hnyimakö Eleazara at bihut me ûkhacaköu hia:

²³ me e ame ip li hnyamen hon, me hûna kâu, helâ ma hna ha hnö Iehova a deny Mose.