Numera 25 - Iaai Bible 1901 (New Caledonia)

¹ KE haba at Isaraela adre me labā Sitima, ke ame hwân tavat he ka bi unyi monu me omomoiny Moaba:

² anyin adre hawâ tavat he ka hnyi bi hut ka anyidra je khong; ke haba tavat adre me hnyi han me khudrung ka anyidra je khong.

³ Ke haba at Isaraela adre me ûkhacaköu unyi Baala-peora: me ame ubâhlâ thö hmönyin anyi Iehova ka at Isaraela.

⁴ Ke haba Iehova ame ha kö Mose, ka habe, Hom dö je taben tavat hia, me uhno döi ödrin hnyi hnyimakö Iehova, me me hmetu je hmönyin ae gan anyi Iehova ûheny unyi at Isaraela.

⁵ Ke haba Mose ame ha ka tavat owisa unyin at Isaraela, ka habe, He thʼ öbun ka ve hlingâ tavat unyibun adre me tha ödra me Baala-peora.

⁶ Ke wa bi, haba ke at Isaraela ame hom ke momo Midiana ka je liamekeiny mē, hnyi hnyimakö Mose, me hnyi hnyimakan ûkhacaköu anyin lakon Isaraela hia, ödra adre me tenge hnyi hwanumen uma ûkhacaköu.

⁷ Ke a wâ e hnö Fineasa, nöku Eleazara, a nöku Arona at bihut, me e ame todrö hnyi ûkhacaköu, me hom ö hnyi hnyamen;

⁸ me e ame he hoton at Isaraela eling ka hnyi hak, me dâoâ li hnyekudru, wale at Isaraela me momo. Me ame todru mok ae cap unyin lakon Isaraela.

⁹ Ke haba tavat a mokcu ge mok ae cap, me ödra twente foa thauzan.

¹⁰ Ke Iehova ame bi kö Mose, ka habe,

¹¹ Haba Fineasa nöku Eleazara a nöku Arona at bihut ame hia but wia anyik hmönyin ûheny unyin lakon Isaraela, hnyi hnen hna ciâ gak hnyi wanbödra, mʼ oge me ca ohia lakon Isaraela hnyi hnok hna ciâ.

¹² Anyin a wale ha thö, ka habe, Wâ bi, inya oge me ham anyik ûhihinyköuiny ûsoköu:

¹³ kʼ ame he ka e bi unyin, me je mâtrâniny a hwaban, me me ûhihinyköu he ka at bihut nyiele balua; anyin a e ame ciâ ge Khongon, me bi hwaban möt anyin lakon Isaraela.

¹⁴ Ke haba ien at Isaraela adre hlingâ, wale at adre tha hlingâ me momo Midiana, me Zimeri, a nöku Salu, thaniny lap anyin ke kamen unyin at Simeona.

¹⁵ Ke haba ien momo Midiana adre hlingâ, me Kozebi, nöku Zura; ke haba baga eling, me taben ke lap anyin ke kamen hnyi hnyei Midiana.

¹⁶ Ke Iehova ame ha kö Mose, ka habe,

¹⁷ Ovecâ at Midiana, me kuc ödra:

¹⁸ anyin adre me oveci öbun hnyi hnödra hna bi joniny, waleji adre bi jönibun hnyi ûnyi anyi Peora me ûnyi anyi Kozebi, a nokon thaniny Midiana, a hanidra, waleji adre hlingâ hnyi bong bongon mok ae cap can ûnyi anyi Peora.