Numera 24 - Iaai Bible 1901 (New Caledonia)

¹ KE e manen dut kö Balaama ae so kö Iehova he ka ohnahici Isaraela, me e ame ca he but he ka heleû bihihwakecin, helâji me ke je ûen, ke e ame hnyimakan hnyebuba at

² Ke Balaama ame bwele me wâ at Isaraela adre me ve laba hoton anyidra je tribu; me ame o but kâu hanon Khong.

³ Me e ame ha anyin ûhöûcû, ka habe, Ame ha Balaama nöku Beora, Waleji at a mok li emakan ame ha:

⁴ Haingen at ame löng je hofuc hwan Khong Kʼ ame wâ hna omanenâ ge Ataekhanahia, Ke e ame ta hnyikânâi, me bwela bi li emakan:

⁵ Jekob lö, e so umâm je uma mano, Ke je hnyabam Isaraela!

⁶ Adre avi ödra helâ me je hwatapkolu, Helâ me je hna belök hnyi baten wagewe, Helâ me je aloe a ta hnö Iehova, Helâ me je ûö arasi hnyi baten je an.

⁷ Ame he ka hingâlâ köiö ûnyi hnyi anyin li baket, Kʼ ame he ka hu je mâtrâniny hnyi je köiö ae se, Kʼ ame he ka gan hmâ thaniny hu Agaga, Kʼ adre me he ka oganâ dokhon dökhu.

⁸ Haba Khong ame hom e ûheny Aigupito E hwege helâ me bolok ae hiny: E ame he ka an je hnyei, a je iwahnaihmiony mē, Me thu omomonou je jeiödra Me sânʼ ödra ge anyin je fana.

⁹ E ame cibouca, helâ me man liona, Ke helâ me liona momo; ie at ame he ka bwebwelâ? Ame he ka hnahic at ame hahnahici u, Kʼ adre me he ka hangâ at ame hangö u.

¹⁰ Me ame ubâhlâ hmönyin anyi Balaka kö Balaama, me e ame khâukhâu li hnyamen: ke Balaka ame ha kö Balaama, ka habe, Oge hawo u he ka hangâ je iwahnaihmiony mönya, ke wâ bi u je okun hahnahici ödra.

¹¹ Ke walang ang kec dö ka hnyi em hnyei: oge me ûnykûme he ka oganö u, ke wâ bi, Iehova ame behânâ gam hna ogânâ.

¹² Ke Balaama ame ha kö Balaka, ka habe, Hawa, oge me ca ha ka ânyâm je ûthûmetu waleji u je kunâ könya, me ha, ka habe,

¹³ Ame ne he Balaka ka ham könya umen uma ae unöngöt ge sileva me gol, me ca khanö nya bi he ka onua hofuc ho Iehova, he ka ânyâ so me kong hoton wek; ke haka hofuc ame ha Iehova, me wale hofuc oge me he ka ha?

¹⁴ Ke walang ang oge me he but ka hnyi ik hnyei, ke aiö u me oge me he ka ha köu ke je unyi ame he tavat eang ka ânyâ ka lakem hnyi je bong a biliny.

¹⁵ Me e ame ha anyin ûhöûcû, ka habe, Ame ha Balaama nöku Beora, Waleji at a mok li emakan ame ha:

¹⁶ Haingen at ame löng je hofuc hwan Khong, At ae khana metâ anyin Beönua, At ame wâ hna omanenâ anyin Ataekhanahia, At ame ta hnyikânâi, me bwele bi li emakan:

¹⁷ Oge me wâ e, ke ca walang ang: Oge me wâ e, ke ca hakekeny bi: Ame he ka o okhû ûheny unyi Jekob, Kʼ ame he ka kû haten musi ûheny unyi Isaraela, Kʼ ame he ka kot je ke keihen Moaba Me okongoâ je laku Setha.

¹⁸ Haba Edoma me hwajekhon Kʼ ame he Seira minya ka hwajekhon, waleji iwahnaihmiony mē; Kʼ ame he Isaraela ka ton.

¹⁹ Ame he ka o ûheny unyi Jekob ke at musi, Ke e ame he ka ohia kolon ûnyi hnyi taun.

²⁰ Ke e ame bwele ka wâ Amaleka me e ame ha anyin ûhöûcû, ka habe, E beönua Amaleka ehac hnyi je hnyei; Ke haba obiny kâu me e ame he ka hia but.

²¹ Ke e ame bwele ka wâ at Keni, me e ame ha anyin ûhöûcû, ka habe, E hwege hnyabam Kʼ adre ip ânyâm hâûen hnyi kic.

²² Ke so bi adre me he ka oaûâ at Keni, Ke ne o bût Asura ame hum u ka hnyi bâ

²³ Ke e ame ha anyin ûhöûcû, ka habe, Ekölö, ie at ame he ka möt e ka ânyâ e hnen Khong?

²⁴ Ke ame he ka khöp je hu ûheny Kitim, Me adre me he ka oveci Asura, me oveci Heberu, Kʼ adre me he ka ohia e bi hnyi obiny

²⁵ Ke ame todrö Balaama me he hmetu ka hnyi hnyaban; kʼ ame he but minya Balaka.