Numera 23 - Iaai Bible 1901 (New Caledonia)

¹ KE Balaama ame ha kö Balaka, ka habe, Ânyâ thö je taben hut a seven eang, ke penapena thö eang seven ta bolok, ke seven ta mamoe baga.

² Me Balaka ame ânyâ helâ me hna ha hnö Balaama; ke haba Balaka me Balaama ödru me hudo hon je taben hut a ûsa khaca bolok me ûsa khaca mamoe baga.

³ Ke haba Balaama ame ha kö Balaka, ka habe, U me he ka tot hnyi ânyâm hut, ke oge me he ka he but; me ame ne he la Iehova he ka ûkhanö mönya: ke haba hofuc e ame he ka omanenâ könya me oge me he bi nya ka thumeta u. Ke e ame he ka hnyi dok ae görany.

⁴ Ke Khong ame ûkhanö me Balaama, me e ame ha kâu, ka habe, Oge hia but penapena je taben hut a seven, me ve hudo hon je taben ûsa khaca bolok me khaca mamoe baga.

⁵ Ke Iehova ame bi hofuc ka hnyi hnyimö Balaama, me ha, ka habe, Hmetu thö kö Balaka, ke u me he ka ha kâu helâe.

⁶ Ke e ame hmetu kâu, ke wâ bi, e ame tot hnyi anyin hut, e me je thaniny Moaba hia.

⁷ Me e ame ha anyin ûhöûcû, ka habe, Balaka ame hum nya ûhek Arama, Wale than Moaba ûnyi hnyi je bucen e Deiö: Aiö u, hangö Jekob hobi könya, Ke aiö u, me û Isaraela.

⁸ Oge ma kâmâu ka hangâ at a ca hangâ hnen Khong? Ke oge ma kâmâu ka oû at a ca oû hnö Iehova?

⁹ Oge me wâ e ûnyi hnyi hon kic, Oge bwele kâu ûnyi hnyi dok ae görany: Wâ bi, wale tavat adre me he ka hake laba, Kʼ adre me ca he ka tha öû ödra me ta je hnyei.

¹⁰ Ia ae khana he ka aû sesâi Jekob, Me ha ûseiny ke keihen a vakiny Isaraela? E na he ju mekik ka helâ me mekiny at ae wisa, Me obiny melik helâ me obiny melen.

¹¹ Ke Balaka ame ha kö Balaama, ka habe, Ieû e u je ânyâ könya? oge hawo u he ka hangâ je iwahnaihmiony mönya, ke wâ bi, u je hia but hahnahici ödra bi.

¹² Ke e ame thu, ka habe, Hawa, oge me ca he ka wâ wia he ka ha hofuc Iehova ame ip hnyi hnyimök?

¹³ Ke Balaka ame ha kâu, ka habe, Ö u me tha he mönya ka hnyi ke dok, mʼ u me he ka ö ödra hnyin; u me he ka wâ ke keihen tavat thibi, ke u me ca he ka wâ hia: ke u me be ka hangâ ling hobi könya.

¹⁴ Me e ame hom e ka hnyi utkânâ iny Zofim, hnyi ban Pisega, kʼ ame otilâ je taben hut a seven, me ame hudo hon je taben ûsa khaca bolok ke khaca mamoe baga.

¹⁵ Ke e ame ha kö Balaka, ka habe, U me he ka tot eang hnyi ânyâm hut, ke oge me he ka ûkhanö me Iehova e helē.

¹⁶ Ke Iehova ame ûkhanö me Balaama, me bi hofuc ka hnyi hnyimen, ka habe, Hmetu thö kö Balaka me ha je hofuc eling.

¹⁷ Me e ame o but, ke wâ bi, e ame tot hnyi anyin hut, ke tha e me je thaniny Moaba. Ke Balaka ame ha kâu, ka habe, Ieû a ha Iehova?

¹⁸ Me e ame ha anyin ûhöûcû, ka habe, Höhöi thö, Balaka, me löng ju; Tevehlöng ju könya u nöku Zipora:

¹⁹ Haba Khong me ca at bi, me me he ka thoi; Ke ca nokon at bi, me me he ka ietra: Hawa e ame fuc kʼ ame ca he ka ânyâ? Ame ha hofuc, kʼ adre me ca he ka owhâdâ?

²⁰ Wâ bi, adre kunö nya he ka hahnahicâ: Ke e ame hia but ohnahicâ, ke e ca khanö nya he ka wia e.

²¹ E ame ca wâ hulö unyi Jekob, Kʼ ame ca wâ monu ga Isaraela: E unyin Iehova a Khongon, Ke e hnyi wanbödra ûhongötiny than.

²² Khong ame hum ödra ûhedra Aigupito; Ke e hu but gan helâke tang hwegeiny bolok ae hiny.

²³ E hnathu, e ba bihihwakecin kö Jekob, Ke ba biobotkong kö Isaraela: Ke adre me he ka ha ga Jekob me Isaraela, ka habe, Ieû a ânyâ Khong!

²⁴ Wa bi, ame tot tavat helâ me liona momo, Kʼ ame höihöi thö helâ me liona baga: Kʼ ame ca he ka mokut ke ne o but e ame an haniny, Me ijem dren at adre hlingâ.

²⁵ Me Balaka ame ha kö Balaama, ka habe, Ca he ka hângʼ ödra, ke ca he ka hahnahici ödra.

²⁶ Ke haba Balaama ame thu me ha kö Balaka, ka habe, Oge me ca ha köu, ka habe, Hamök he ka ânyâ ta je ûnyi hia ame he Iehova ka ha könya?

²⁷ Ke Balaka ame ha kö Balaama, ka habe, Aiö u, mʼ inye he ka hum u ka hnyi ke dok; kʼ ame ne so ka Khong, me u ma he ka hângʼ ödra eling hobi könya.

²⁸ Me Balaka ame hum Balaama ka hnyi hon Peora, wale cicö hnyebuba.

²⁹ Ke haingö Balaama ka habe, Otilâ thö je taben hut eang a seven, ke penapena thö eang seven ta bolok, ke seven ta mamoe baga.

³⁰ Ke Balaka ame ânyâ hoton hna ha hnö Balaama, me hudo hon je taben hut ûsa khaca bolok, me khaca mamoe baga.