Numera 22 - Iaai Bible 1901 (New Caledonia)

¹ KE ame he lakon Isaraela, me hunuma hnyi dok ae tha hon hnyi Moaba, hoton Joridano cicö Jeriko.

² Ke haba Balaka nöku Zipora ame wâ i ta je ûnyi hia a ânyâ Isaraela ka at Amora.

³ Ke ame ot gan hmâ at Moaba ge tavat! anyin a ödra se hia: ke ame hlohlo at Moaba ge lakon Isaraela.

⁴ Ke haingö Moaba ka wahingatiny at Midiana, ka habe, Ame he tavat walang ang ka drem ta je ûnyi hia igigili ota helâ me bolok ame drem hna önyinginy hnei. Haba than Moaba hnyi ûen eling, me, Balaka nöku Zipora.

⁵ Me e ame kunâ je ûthûmetu ko Balaama nöku Beora hnyi Pethora, a e hnyi Wagewe, ka hnyi hnyei anyin lakon lakeiny, he ka hawâ e, me haingen, ka habe, Wâ bi a o thö tavat ûhedra Aigupito: ke wâ bi adre me avâ hnyei, kʼ adre me laba but ang cicö ik:

⁶ ö u he but jem me hangâ tavat eling hobi könya; anyin a ödra hwege huk: me ame ne khanö nya la he ka kuc ödra, me hnu ödra ûnyi hnyi hnyei: anyin ae khanö nya a haba at u me hahnahicâ me ame hnahic bi; ke haba at u me hangâ me ame hnaûhangö.

⁷ Me ame he wahingatiny Moaba me wahingatiny Midiana, kʼ ödrin e hom hwaban biobotkong hnyi je hnyamödrin; ke ödrin e o but unyi Balaama, me ha kâu hofuc ho Balaka.

⁸ Me haingen ködrin, ka habe, Me mokut ju eang, ke oge me he ka hmeto köbun hofuc ame he Iehova ka ha könya: me haba je than Moaba ödrin e laba unyi Balaama.

⁹ Ke ame o but Khong kö Balaama me ha ka habe, Ie hnyat û unyâm?

¹⁰ Ke Balaama ame thu ka Khong, ka habe, Hnö Balaka nöku Zipora than Moaba hna kunâ könya he ka ha, ka habe,

¹¹ Wâ bi, haba tavat adre o ûhedra Aigupito adre me avâ hnyei: ö u he but jem me hângʼ ödra hobi könya; me oge me ne he ka hwege hudra la, me hnu ödra.

¹² Ke haba Khong ame ha kö Balaama, ka habe, U me ca he ka tha he mödrin: u me ca he ka hangâ tavat eling: anyin adre hahnahici ödra.

¹³ Ke Balaama ame vesâkong, me ha ka je than ûhedrin unyi Balaka, ka habe, He thʼ öbun ka hnyi ibun hnyei, anyin ae höcö Iehova hnö nya he ka tha he möbun.

¹⁴ Ke ame köûö thö je than Moab, me he kö Balaka, me ha, ka habe, E höcö Balaama he ka tha he jem mö-hmun.

¹⁵ Ke haba Balaka ame kunâ hmetu ke je than ae se hia, a hnyat ae beönua hon hnyat a bân.

¹⁶ Ke ödrin e o but unyi Balaama, me ha kâu, ka habe, Walang hofuc ho Balaka nöku Zipora, ka habe, Ö u ca he ka bi ovhelâm he ka he jem könya:

¹⁷ anyin a oge me he ka ti oganö u, ke oge me he ka ânyâ ta je ûnyi hia u me he ka ha könya: anyin a wale ö u he but jem me hangâ tavat eang hobi könya,

¹⁸ Ke Balaama ame thu, me ba ka lathnyabai Balaka, ka habe, Ame ne he Balaka ka ham könya umen uma ae unöngöt ge sileva me gol, e ca khanö nya he ka hanyâûâ hofuc ho Iehova a Khonguk, he ka ânyâ ûhnyûkong me gan.

¹⁹ Anyin a wale mē mokut ju öbun eang, mʼ inye he ka vehlöng hofuc ame he Iehova ka ha hmetu könya.

²⁰ Ke haba Khong ame o but kö Balaama hnyi hnyinghet, me ha kâu, ka habe, Ame ne o tavat ka hawo u, me todrö, me tha he mödrin: ke so bi, haba thibi ûnyi oge me he ka ha köu, me wale ûnyi u ma he ka ânyâ.

²¹ Me haba Balaama ame vesâ, me hûkâlâ taben hon haleny asina, me tha he me je thaniny Moaba.

²² Ke ame ubâhlâ hmönyin anyi Iehova can e ame he: ke haba angela anyi Iehova ame tet metâ kâu eû hnyi gethen he ka ovhelâ e. Ke e ame tabâ haleny asina me he, ke tha e me li athnyabainy.

²³ Ke haba asina ame wâ angela anyi Iehova ame tot eû hnyi gethen, ke e hnyi hnyamen hele vat adre oc: me haba asina ame saû but ûheny hnyi gethen, me he ka hnyi hnyot: me Balaama ame kot asina he ka ohmeto e ka hnyi gethen.

²⁴ Me haba angela anyi Iehova ame tot hnyi thopiny gethen hnyi wanben je hnyei vine, ke e hu hak hnyi ke keihen e, me ke hak hnyi ke keihen ang.

²⁵ Ke haba asina ame wâ; angela anyi Iehova me ame hakekenyâ hak veto, me me hlec ca Balaama hnyi hak veto: me e ame kot hmetu.

²⁶ Ke haba angela anyi Iehova ame he e hele, me tot hnyi dok ae hnek, ke ba gethen he ka saû ka hnyin hnyi ke keihen metâ me me.

²⁷ Ke a wâ but asina hnen angela anyi Iehova, me e ame ta but me Balaama: me ame ubâhlâ thö hmönyin anyi Balaama me e ame kot asina ge anyin uci.

²⁸ Ke Iehova ame khong hnyimen asina me ame fuc kö Balaama, me ha, ka habe, Ieû oge ânyâ köu, mʼ u me okun kuʼ nya?

²⁹ Me Balaama ame thu ka asina, ka habe, Can hnâm hna hlumö nya: e na hu anyik hele vat, me oge me he bi nya ka hlingö u.

³⁰ Me asina ame ha kö Balaama, ka habe, Ca halem asina inya, at u je labö tabâ hnyi bongom ta je bong hia ke ne o but ang? hawa, hwakecik he ka ânyâ helâe ehac köu? Me e ame thu, ka habe, E ba.

³¹ Me Iehova ame obwela li emakö Balaama, me e ame wâ angela anyi Iehova ame tot hnyi gethen ke e hnyi hnyamen hele vat adre oc: me e ame nom me ta ju hnyikânâi.

³² Ke haba angela anyi Iehova ame ha kâu ka habe, Ieû gam u me okun kot halem asina? wâ bi, oge me he jem he ka ovheli u, anyin ae kong könya ûhem:

³³ ke ame ō nya asina, me ame okun saû gak, ke ame ne ca saû gak, me oge me hia but hlingö u, me omelö e bi.

³⁴ Haba Balaama ame ha ka angela anyû Iehova, ka habe, E kong hwakecik, anyin a oge me ca wâ a u me tot eû hnyi gethen he ka ovheli nya: ke haba walang ang ame ne kong köu ûnyi ang me oge me he ka hmetu.

³⁵ Ke haba angela anyi Iehova ame ha kö Balaama, ka habe, He thö u me tavat: ke so bi u me be ka ha thibi je ûnyi oge me he ka ha köu. Me Balaama ame tha he me je than ûhedrin unyi Balaka.

³⁶ Ke a löng ut Balaka a e but ang Balaama, me e ame he ka ûkhanö mē hnyi taun Moaba, hnyi hnyigöulen Arenona, wale hnyi obiny hnyigot.

³⁷ Ke Balaka ame ha kö Balaama, ka habe, Hawa, oge ca ûkhûnöng ûjengöâ he ka hao u? Ieû gam u je ca he jem könya? hawa e ca hnathu ang ae khanö nya he ka oganö u?

³⁸ Ke Balaama ame thu kö Balaka, ka habe, Wâ bi oge o but köu: hawa, ekhanö nya he ka ha ke hofuc? ke haba hofuc ame he Khong ka ip hnyi hnyimök, me oge me he ka ha eling.

³⁹ Ke Balaama ame tha he me Balaka, me o Kiriatha-uzoth.

⁴⁰ Ke Balaka ame hudo je bolok me je mamoe, me hawo Balaama me je than unyin.

⁴¹ Ke haba nyi Balaka ame hum Balaama, me hom e ka hnyi je dok ae gö-rany anyi Baala, ke e ame wâ ûheny e tavat ke ne o but obiny je bunyen.