Numera 19 - Iaai Bible 1901 (New Caledonia)

¹ KE Iehova ame ha kö Mose me Arona, ka habe,

² Walang bongon hnanyibu a hûna Iehova, ka habe, Ha thö ka lakon Isaraela, mʼ adre me he ka hom köu ke kau ae dra hia me ba hnyikongon, at adre tiga ca ip hon ûnyi hnân ûhûkâlaköuâ:

³ ke öbun e he ka ham e kö Eleazara at bihut, me hamen he ka lelö e ka hnyi hoton hnyaba, ke hamen ke at he ka hlingâ e hnyi hnyimakan:

⁴ ke hamö Eleazara at bihut he ka hom ûnyi hnyi dren ge banyen, me oseven dukâiâ ge dren hnyi hnyimakan uma ûkhacaköu:

⁵ ke ame he ke at ka thong kau eling hnyi hnyimakan, adre me he ka thong unen, me utioiny, me dren, me tiny:

⁶ ke ame he at bihut ka hom uto arasi, me thi hisop, me ûnyi ae dra, me khûâ ka hnyi hna thong kau.

⁷ Me ame he at bihut ka hneû anyin je ûkhaû, me osûâ unyin hnyi köiö, ke hwaban e ame he ka he ka hnyi hnyaba, kʼ ame he at bihut ka bo kong ke ne o but sahac.

⁸ Ke ame he at a thong e ka hneû anyin je ûkhaû hnyi köiö, me osûâ unyin hnyi köiö, kʼ ame he ka bo kong ke ne o but sahac.

⁹ Ke hamen ke at ae bo so he ka aoc hnabadröuiny kau, me ip hoton hnyaba hnyi dok ae so, kʼ adre me he ka tuö ûnyi eling hnân hobi kâu ûkhacaköu anyin lakon Isaraela me hnân köien okabâ: wale hudiny hulö.

¹⁰ Ke haba at a aoc, hnabadröuiny kau ame he ka hneû anyin je ûkhaû, ke e ame he ka bo kong ke ne o but sahac: ke wale hnanyibu nyiele balua ka lakon Isaraela, me atkanyua ame tha laba unyidra.

¹¹ Haba at ame kâlâ komok, me e ame he ka bo kong hnyi seven ta bong:

¹² ke ame he at eling ka obosoâ e hnyi bong a kuniny ge ûnyi e, ke e ame he ka bo so, hnyi bong a seveniny: ke ame ne ca obosoâ e bi hnyi bong a kuniny, me e ame ca he ka bo so hnyi bong a seveniny.

¹³ Ke haba at ame kâlâ komok, kʼ ame ca obosoâ e bi, me e ame okongoâ uma mano umo Iehova; kʼ adre me he ka subâ degecâ at eling unyin at Isaraela: anyin adre ca dukâiâ e hnen köien okabâ, e bo kong ut e; ke e bi unyin anyin bo kong.

¹⁴ Ke walang hnanyibu e, ka mokcu ke at eiö hnyin ke uma mano: haba hnyat hia ödrin e dit ka hnyin uma, me hnyat hia eiö hnyin uma, me ödrin e he ka bo kong hnyi seven ta bong.

¹⁵ Ke haba ta je utkaia ae memang, kʼ adre ca ohmâ ge hlinginy, me ame bo kong ut.

¹⁶ Ke haba at hnyöuai ame kâlâ at adre hlingâ ge hele vat, ke ame ne ke komok, kʼ ame ne jeien at, kʼ ame ne erkemok, me e ame he ka bo kong hnyi seven ta bong.

¹⁷ Ke adre me he ka hom hobi kâu at ae bo kong, ûnyi hnyi dröuiny adre thong a hudiny hulö, me hû e ge köiö ame hingölö hnyi hnyin utkaia:

¹⁸ kʼ ame he ke at ae bo so ka hom thi hisop, me hneû hnyi köiö eling, me dukâiâ uma, me je utkaia hia, me hnyat hia eiö hnyin, me at minya a kâlâ jeien at, ame ne at adre hlingâ, ame ne komok, ame ne erkemok:

¹⁹ ke ame he at ae bo so ka dukâiâ at ae bo kong hnyi bong a kuniny me bong a seveniny: kʼ ame he ka obosoâ e hnyi bong a seveniny: ke e ame be ka hneû anyin je ûkhaû, me soû hnyi köiö, kʼ ame he ka bo so hnyi sahac.

²⁰ Ke haba at ae bo kong, kʼ ame ca he ka obosoâ e bi, me adre me he ka subâ de gecâ at eling ûnyi hnyi ûkhacaköu, anyin a e ame hia but okongoâ dok a kabi Iehova: ke adre ca hia but dukâiâ e ge köien okabâ; e bo kong ut e.

²¹ Ke wale hnân hnanyibu ködra nyiele: ke haba at ame dukâiâ köien okabâ ame he ka hneû anyin je ûkhaû; ke haba at ame kâlâ köien okabâ, me, ame he ka bo kong ke ne o but sahac.

²² Ke ame he ka bo kong ta je ûnyi hia a kâlâ hnen at ae bo kong; ke haba at ame kâlâ ta je ûnyi e, me e ame he ka bo kong ke ne o but sahac.