Numera 18 - Iaai Bible 1901 (New Caledonia)

¹ KE Iehova ame ha kö Arona, ka habe, Hâmâm me lakom, me hnyaban lakâmâm a tha e mou he ka vadren hulöiny dok ae kap: ke hâmâm me lakom a tha ödrin mou he ka vadren hulöiny hanymen bi hut.

² Ke u me he ka tha oûhakekenyâ je liamekeiny mou, a tribu Levi, a tribuiny lakâmâm, me me tha e bala mou, me huliwa köu: ke hâmâm me lakom a tha ödrin mou he ka huliwa cicö uma ohnatho.

³ Ke ödrin e he ka tuö hanymâm, me hanymen hia hnyi Uma: ke so bi adre me ca he ka hakekenyâ je utkaiainy dok ae kap, me taben hut, mʼ adre me ca mok, mʼ öbun minya.

⁴ Ke adre me he ka tha ödra mou, me tuö hanymen hnyi uma ûkhacaköu, hobi kâu huliwainy Uma: kʼ ame ca he atkanyua ka hakekenyi öbun.

⁵ Ke öbun e he ka tuö hanymen hnyi dok ae kap, me hanymen hnyi taben hut: me me ba hmetu bi hmönyin ka lakon Isaraela.

⁶ Ke wâ bi, inya oge hia but hom je liamekeiny mou a at Levi ûnyi hnyi wanben lakon Isaraela; adre ham ödra hnân bwihlany kö Iehova hnyi hnyimaköbun, he ka ânyâ huliwa hnyi uma ûkhacaköu.

⁷ Ke u ma he me lakom a tha ödrin mou ka tuö hanymen a hnöbun hna bi hut ta je ûnyi hia hnyi taben hut, me ta je ûnyi eiö hnyin singiny; ke! öbun e he ka huliwa: Inya oge me ham köbun hanymen at bihut helâ me huliwa adre ham: kʼ adre me he ka hlingâ atkanyua at ame hakekenyâ.

⁸ Ke Iehova ame ha kö Arona, ka habe, Wâ bi, inya oge hia but ham köu hanymen hudiny kap goranyai könya, a wale je ûnyi ae kap hia ge lakon Isaraela, oge hia but ham köu ta je ûnyi e can hnödra hna hû, me hobi kâu lakom hnân hwajekhon nyiele balua.

⁹ Walang ânyâm ûnyi hnyi ta je ûnyi ae kap hmönyin, ûnyi hnyi meic: a anyidra je hut hia, me je hudiny hia anyidra han, me je hudiny hia anyidra, hulö, me je hudiny hia anyidra monu, adre me he ka ham könya, wale ae ti kap hobi köu me lakom.

¹⁰ U me he ka an je ûnyi e helâ me ta je ûnyi ae ti kap; ame he obaga hia ka an je ûnyi e; e kap e hobi köu.

¹¹ Ke walang ânyâm; a hudiny kap goranyai adre ham, wale je hudiny hajijing hia anyin lakon Isaraela: oge hia but ham ta je ûnyi e köu me lakom obaga me wahlu a tha ödrin mou, hnân hwajekhoû nyiele balua: haba tavat hia ae bo so hnyi hnyabam adre me he ka an je ûnyi e.

¹² Haba soiny wakaco hia, me soiny waina hia me hwit, a je wan a bân adre me ham kö Iehova, haba ta je ûnyi e oge me ham köu.

¹³ Haba je wan hia a bân ae mat hnyi hnyei adre me ham kö Iehova, me wale âm; kʼ ame he tavat hia ae bo so hnyi hnyabam ka an je ûnyi e

¹⁴ Haba ta je ûnyi hia adre okâbâ hnyi Isaraela me wale hnân hobi köu.

¹⁵ Haba ta je ûnyi adre hnokoâ a bân, a ta je ûnyi hia adre ham kö Iehova, ame ne at ame ne meno, me wale hobi köu: ke so bi u me he ka bi hnen je wanakat a bân, ke u me he ka bi hnen je nokon meno a bân ae bo kong.

¹⁶ Ke haba ta je ûnyi adre me he ka bi hnen, hwân ge at a khaca tehi, me u me he ka bi hnen hoton ûnyi ae ûcû köu, a thabûng ta sekel, hoton sekeliny dok ae kap, (wale twente je gera).

¹⁷ Ke haba nokon kau a bân, me nokan mamoe a bân, me nokon got a bân, me u me ca he ka bi hnen; ödra kap: ke u me he ka dukâiâ taben hut ge drödrin, me le pipikhenyaidrin hnân hut a an ge meic, me hnân bo so kö Iehova.

¹⁸ Ke haba utiöidrin me ânyâm, helâ me ûlainy hajijing, me helâ me jevan a metâ, a hnân hobi köu.

¹⁹ Haba je hut hia adre kap goranyai ûnyi hnyi ta je ûnyi ae kap ame he lakon Isaraela ka hudo kö Iehova, me wale oge me ham köu, me lakom obaga me wahlu unyâm, helâ me hwajekhoû nyiele balua: ke wale ûhihinyköuiny sâlt nyiele balua hnyi hnyimakö Iehova, hnân hobi köu, me je mâtrânâm unyâm.

²⁰ Ke Iehova ame ha kö Arona, ka habe, U me ca he ka hu em hnyi idra hnyei, ke u me ca he ka hu hwajekhom unyidra: inya bi a hwajekhom me em unyin lakon Isaraela.

²¹ Ke wâ bi oge me ham ka laku Levi ke keihen a libenyitainy ta je ûnyi hia hnyi Isaraela hnân idra, me hwaban anyidrin huliwa ödrin e ânyâ, wale huliwainy uma ûkhacaköu.

²² Ke hwân ang me ame ca he bala lakon Isaraela ka hakekenyâ uma ûkhacaköu, wâ e nye takû ödra ge hulö, mʼ adre me mokcu.

²³ Ke ame he at Levi ka ânyâ huliwa hnyi uma ûkhacaköu, kʼ ödrin e he ka vadren anyidrin hulö: wale hnanyibu nyiele balua hnyi anyibun ta je dö, kʼ ödrin e ca he ka hu idrin unyin lakon Isaraela.

²⁴ Anyin a haba ta je ke keiʼ hen a libenyitainy ûnyi ge lakon Isaraela, wale ödrin e hudo kö Iehova hnân hudiny kap goranyai, me wale hnok hna ham ka at Levi hnân hwajekhöûdrin: waleling mʼ oge me hia but ha ködrin, ka habe, Ame ca he ka hu hwajekhöûdrin unyin lakon Isaraela.

²⁵ Ke Iehova ame ha kö Mose, ka habe,

²⁶ U me he ka ha ka at Levi, me ha ködrin, ka habe, Öbun ka he ka hom ûnyi ge lakon Isaraela ke keihen e libenyitainy wale oge ham köbun ûnyi gadra hnân hwajekhoû, me öbun e he ka hudo ûnyi gan hudiny kap goranyai kö Iehova, wale ke keihen a libenyitainy ûnyi hnyi libenyitainy.

²⁷ Ke adre me he ka ûnykûme köbun hudiny anyibun kap goranyai, me me tha ûcû me hwit ûnyi hnyi hna huje hwit, ke helâ me hna hlec wan vine ae ûnöngöt.

²⁸ Ke helâe öbun e he ka hudo hudiny kap goranyai kö Iehova, ûnyi hnyi anyibun je ke keihen a libenyitainy hia, wale öbun e kap ûnyi ge lakon Isaraela; me ham ûnyi gan kö Arona at bihut hnân hudiny kap goranyai kö Iehova.

²⁹ Öbun e he ka hudo kö Iehova je hudiny kap goranyai ûnyi hnyi je bwihlany hia, a unyi hnyi soiny hia, wale hanen ae kap.

³⁰ Anyin a wale u me he ka ha ködra, ka habe, Öbun ka kap goranyai soiny ûnyi gan, me adre me he ka ûnykûme e ka at Levi helâ me trobaniny hna huje hwit, ke helâ me trobaniny hna hlec wan vine.

³¹ Ke öbun e he ka han e hnyi ta je dok hia, a öbun me anyibun je lap: anyin a wale me hnân bi hwaban anyibun huliwa hnyi uma ûkhacaköu.

³² Ke ame ca he ka takû öbun hnen hulö can e, öbun ka hia but kap goranyai soiny: ke ca he öbun ka okongoâ je ûnyi ae kap anyin lakon Isaraela, wâ öbun nye mokcu.