Numera 16 - Iaai Bible 1901 (New Caledonia)

¹ KE haba Kora nöku Izara, a nöku Kohatha, a nöku Levi, tha e me Dathana me Abirama a li laku Eliaba, ke Ona nöku Peleth, a kun ta laku Reubena, ödrin e hokhien:

² ke ödrin e todrö kö Mose, ke tha e mödrin ke je lakon Isaraela, a ödrin tu haded ke fifte je tuhan ûkhacaköu, tavat adre ûca hnyi ûkhacaköu, tavat ae lung:

³ ke ödrin e ûkhacaköu kö Mose me Arona, me ha ködru, ka habe, Öbu me bi gan, anyin ae tha kap ûkhacaköu hia a ke at me ke at, ke e unyidra Iehova: anyin a wale ieû gabu öbu me ogöranyi öbu bi hon ûkhacaköu hia anyi Iehova?

⁴ Ke a löng ut Mose, me e ame ta ju hnyimakan hnyikânâi:

⁵ ke e ame ha kö Kora mödrin hia a tha e mē, ka habe, Nyi ame he Iehova ka omanenâ lahien, me tavat ae i kap, me ohakekenyâ kâu: eke, haba at e ame ûca me e ame he ka ohakekenyâ kâu.

⁶ Ânyâ thö ang; e so Kora me lahien hia ame hom je taben meic;

⁷ me ip meic hnyin, me aoc je ûnyi ae bo so ka hnyin hnyi hnyimakö Iehova nyi: ke haba at a ûca hnö Iehova, me wale at ae kap: ke öbun e bi gan, öbun laku Levi.

⁸ Ke Mose ame ha kö Kora, ka habe, Öbun na löng ju öbun laku Levi:

⁹ hawa, ûnyi ae ûhnyûkong köbun a gʼ ame hake ip öbun ûnyi hnyi ûkhacaköu anyin at Isaraela hnen Khongon at Isaraela, me ohakekenyi öbun kâu he ka ânyâ huliwa hnyi uma mano anyi Iehova, me tot hnyi hnyimakan ûkhacaköu he ka huliwa ködra;

¹⁰ ke e ame! hia but ohakekenyi u me je liamekeiny mou a je laku Levi? ke öbun e behom minya hanymen at bihut?

¹¹ Anyin a wale haba u me je lahiâm, öbun e tot kö Iehova: ke ie Arona mʼ öbun e ulidrö?

¹² Me haba Mose ame ûkhûnöng he ka hao Dathana me Abirama, a li laku Eliaba; ke haingödru, ka habe, Ohmu me ca he ka he:

¹³ hawa unyi a ûhnyûkong a u je hum ohmun jem ûnyi hnyi hnyei ame di hnyin debai me hani, he ka hlingʼ ohmun hnyi hnyebuba, ke u je wem minya he ka bi than humun?

¹⁴ Ke haba khaca, u je ca hia but hum ohmun ka hnyi hnyei ame di hnyin debai me hani, kʼ u me ca ham köhmun hwajekon a ihmun me ihmun hnyei vine: hawa, u me he ka owadruâ tavat eang? awe ohmu me ca he ka he.

¹⁵ Me ame ubâhlâ hmönyin anyi Mose, me e ame ha kö Iehova, ka habe, U me ca he ka wâ anyidrin hut: ke ba haledrin asina oge hom, ke oge ca okongo ke at a khaca gadrin.

¹⁶ Ke haingö Mose kö Kora, ka habe, He but nyi me je lahiâm hnyi hnyimakö Iehova, a u, mödrin, me Arona:

¹⁷ ke öbun e he ka ve hom anyibun je taben meic, me auk ûnyi ae bo so ka hnyin, ke öbun e he ka ve hom jem hnyi hnyimakö Iehova anyibun je taben meic, a tu haded ke fifte je taben meic; haba u me Arona öbu me he ka ve hom anyibu li taben meic.

¹⁸ Ke ödrin e ve hom anyidrin je taben meic, me ip meic hnyin, me auk ûnyi ae bo so ka hnyin, me ûtitilen hnyi hwanumen uma ûkhacaköu, a tha ödrin me Mose me Arona.

¹⁹ Ke haba Kora ame hawâ ûkhacaköu hia ûcûdru ka hnyi hwanumen uma ûkhacaköu: ke amo manen dut hmanenangi Iehova ka ûkhacaköu hia.

²⁰ Ke Iehova ame ha kö Mose me Arona, ka habe,

²¹ Ûsâkâûö but öbun me ûkhacaköu eang, mʼ inya he ka ohiʼ ödrin hnyi thuthubademak.

²² Ke ödru me ta ju hnyikânâi, me ha, ka habe, Khong lö, Khongon hanon tavat hia, ame ne kong hwakecin at a khaca, me hawa u me he ka hmönyin ka ûkhacaköu hia?

²³ Ke Iehova ame ha kö Mose, ka habe,

²⁴ Ha thö ka ûkhacaköu, ka habe, Ve kec ut ûnyi hnyi uma umo Kora, me Dathana, me Abirama.

²⁵ Ke Mose ame köûö thö, me he kö Dathana me Abirama; kʼ ame he hoton wahingatiny at Isaraela.

²⁶ Ke e ame ha ka ûkhacaköu, ka habe, Öbun na vese but ûnyi hnyi je uma mano umen hnyat eang ae kong, ke ca kâlâ ke ûnyi gadrin, wâ öbun nye tha mok ge anyidrin je hulö.

²⁷ Me adre me kec me vese but ûnyi hnyi uma mano umo Kora, me Dathana, me Abirama, hnyi je ke keihen hia: me haba Dathana, me Abirama ödru me didrut me tot hnyi hwanumen umödru li uma mano, tha ödru me laöiödru me lakudru obaga, me lakudru ae ûhnyûkong.

²⁸ Ke Mose ame ha, ka habe, Walang haten mʼ öbun e he ka wâhmakhmeto a gʼ ame kunö nya Iehova he ka ânyâ ta je huliwa hia eang; anyin a ca ûnyi gak.

²⁹ Ame ne he ka mokcu tavat eang helâ me man imekiny tavat hia, kʼ ame ne he ka o ke ûnyi ka tavat eang helâ me ioiny ka tavat hia; awe a ca kunö nya Iehova.

³⁰ Ke ame ne he Iehova ka ânyâ ke ûnyi a teb ûnyi, kʼ ame ne memang ut kânâ me utʼ ödrin, me ta je ûnyi hia unyidrin, ke ödrin e ne dit ke möt hedis ai; awe, öbun e he ka wâhmakhmeto a gʼ ame hûkötiö Iehova hnen hnyat eang.

³¹ Ke e ame um dö ha ta je hofuc hia eling, me ame khekhe but kânâ hmelidrin:

³² me ame memang ut kânâ me utʼ ödrin me umödrin je uma, me tavat hia a tha ödrin me Kora, me anyidrin ta je ûnyi hia.

³³ Ke haba ödrin me tavat unyidrin hia ödrin e tha dit ke tiga möt bi hedis ai; ke ame buhlum hmetu ju kânâ hudrin, me hiʼ ödrin ûnyi hnyi ûkhacaköu.

³⁴ Ke haba at Isaraela hia ödrin e ûtitilen, me, ödrin e kec ge hwatenge a ödrin: anyin a haingödrin, Wâ e nye utʼ ötin minya but ge kânâ.

³⁵ Ke ame o but meic ûnyi ga Iehova me le degeci ödrin a tu haded ke fifte, hnyat ödrin e hudo ûnyi ae bo so.

³⁶ Ke Iehova ame ha kö Mose, ka habe,

³⁷ Ha thö kö Eliazara nöku Arona at bihut, me me hom je taben meic ûnyi hnyi hna hiâ, kʼ u ma he ka kot degecâ meic e helē; anyin a wale ûnyi ae kap;

³⁸ a je taben meic anyin hnyat ae hulö ang ödrin e bi joniny anyidrin möt: ke e so adre me kot lauâ ta je ûnyi e ge hama, me hnân tube taben hut: anyin a ödrin e hudo hnyi ta je ûnyi e hnyi hnyimakö Iehova, anyin a wale e kap: me me hnân haten ka lakon Isaraela.

³⁹ Me haba Eleazara at bihut ame hom je taben meic bras wale a hudo hnyin tavat adre thong degecâ; me adre me olauâ ta je ûnyi e hnân tube taben hut:

⁴⁰ me hnân oûnykûmeâ ka lakon Isaraela, me me ca he ka hakekenyâ ge atkanyua a ca hanen je mâtrâni Arona, he ka hudo ûnyi ae bo so kö Iehova; me me ca he ka helâ me Kora me lahien, hoton hofuc ho Iehova kâu a deny Mose.

⁴¹ Ke haba nyi ame ulidri Mose me Arona hnen ûkhacaköu hia, me habe, Öbe hlingâ je atö Iehova.

⁴² Ke hnyi ûen ame ûkhacaköu tavat ûcû Mose me Arona, me adre me bwele ka hnyi uma ûkhacaköu: ke wâ bi ûlâ ame tube e, ke ame manen Jut hmanenangi Iehova.

⁴³ Ke haba Mose me Arona ödru me he ka hnyi hnyimakan uma ûkhacaköu.

⁴⁴ Ke haba Iehova ame ha kö Mose, ka habe,

⁴⁵ He thʼ öbu ûnyi hnyi ûkhacaköu eang, mʼ inye he ka ohiʼ ödra hnyi thuthubademak. Me ödru me ta ju hnyimaködru hnyikânâi.

⁴⁶ Ke haba Mose ame ha kö Arona, ka habe, Hom dö ânyâm taben meic ûnyi hnyi hon taben hut, me auk ûnyi ae bo so, me ie wadring dö ka ûkhacaköu, me bi hwaban anyidra möt: anyin ame o hmönyin ûnyi ga Iehova; ke ame hwân dö mok ae gan.

⁴⁷ Ke haba Arona ame hom helâ me hnö Mose hna ha, me ame wadringâ ka hnyi wanben ûkhacaköu; ke wâ bi ame hia but kû thö mok ae gan unyin tavat: me e ame bi ûnyi ae bo so ka hnyin, me bi hwaban möt anyin tavat.

⁴⁸ Ke e ame tot hnyi ke dok a wanben tavat ae mok me tavat ae möt; kʼ ame so ju mok ae gan.

⁴⁹ Ke haba tavat a mokcu hnen mok ae gan me ödra fotin thauzan ke seven haded, ke ca ba bi tavat a mok can bongu Kora.

⁵⁰ Ke Arona ame hmetu kö Mose hnyi hwanumen uma ûkhacaköu: ke hia but mok ae gan.