Numera 14 - Iaai Bible 1901 (New Caledonia)

¹ KE ame tenge hwege ûkhacaköu hia, kʼ ame tenge thungaû tavat hnyi lit eling.

² Ke ame haiö Mose me Arona hnen lakon Isaraela hia: ke ame ha ködru hnen ûkhacaköu hia, ka habe, Ohmun na mokcu hnyi hnyei Aigupito! ke ohmun na mokcu hnyi hnyebuba eang!

³ Ke ieû e ga Iehova a hum ohmun ka hnyi hnyei eang he ka mok ge hele vat? Adre me he ka hûgûnâ laöiöhmun me lakuhmun je wanakat: hawa e ca so kohmun he ka hmetu Aigupito ai?

⁴ Ke adre me uhaköuâ, ka habe, E so ötin e ûca at me me than, kʼ ate me he ka hmetu Aigupito ai.

⁵ Me haba Mose me Arona ödru me ta ju hnyimaködru hnyikânâi hnyi hnyimakan tavat hia, wale ûkhacaköu anyin lakon Isaraela.

⁶ Ke haba Josua nöku Nuna, me Kaleba nöku Jefuna, ödre hnyi ecmâkâ hnyei, me, ödru me kia but anyidru je ûkhaû:

⁷ ke ödre ha ka ûkhacaköu hia anyin lakon Isaraela, ka habe, Haba hnyei ohmun e vheno me ecmâkâ me hnyei ae so hmönyin.

⁸ Ame ne senyin köta Iehova, me e ame he ka hum ota ka hnyi hnyei, me ham köta; a hnyei ame di hnyin debai me hani.

⁹ Ke so bi ca he öbun ke ivinö me Iehova, ke ca he öbun ka outen tavat a idra hnyei; anyin a ödra areto bi hobi köhmun: kʼ adre hia but hom unyidra ûnyi hnân tuʼ ödra bi, ke e unyita Iehova: ca oûtʼ ödra.

¹⁰ Ke haba ûkhacakoû hia adre me ha he ka luʼ ödru ge veto. Me ame manen hmanenangi Iehova hnyi uma ûkhacaköu ka lakon Isaraela hia.

¹¹ Ke Iehova ame ha kö Mose, ka habe, Ame he tavat eang ka hûkötiö nya ke ne o but kehö? adre me ca he ka labageju könya ke ne o but kehö, ge ta je ûöman hia waleji oge ânyâ unyidra?

¹² Oge me he ka kuc ödra ge mok me ohia hwajeköûdra, ke oge me he ka wiö u hnân hnyei ae gan me man hudra.

¹³ Ke haba Mose ame ha kö Iehova, ka habe, Me ame he ka löng hnen at Aigupito; anyin a u je hom tavat eang ûnyi gadra ge manâm man;

¹⁴ ke adre me he ka thumeto tavat a gadra hnyei ang: ke adre löng a u Iehova unyin tavat eang; anyin a u Iehova u me ûhnyimaköu mödra, ke ame tot hudra ânyâm ûlâ, ke haba u hnyimakan anyidra bunyen, hnyi ûlâ ame tot wisa hnyi lany, me meic ame tot wisa hnyi lit.

¹⁵ Ke walang ang u ka hlingâ tavat eang helâ me at a khaca, awe, ame he ka ha hnen je hnyei adre me löng ânyam lung, ka habe,

¹⁶ Anyin ae ca khanö Iehova he ka hom tavat eang ka hnyi hnyei e ame khemanyin ködra, me wale e ame hlingʼ ödra hnyi hnyebuba.

¹⁷ Ke walang ang, ö e gan dut man manin Than, hoton hnâm hna kû, ka habe,

¹⁸ At ae bec he ka hmönyin Iehova, ke gan hmâ anyin ibetengiö, kʼ ame degecâ hulö, me monu, kʼ ame ca he ka ha ae ba kongon at ae kong; ke e ame bi hwaban monu anyin je kamen ka je lakon, ke ne o but ka hnyi dö a kuniny me vakiny.

¹⁹ Ö u degec ut konginy tavat eang hoton ûganiny ânyâm ibetengiö, ke hoton hnâm hna thang monu anyin tavat eang, waleji hwân hnyi Aigupito ke ne o but hnyi bong ang.

²⁰ Me haba Iehova ame thu, ka habe, Awe oge me hna degecâ hoton hwâm hofuc.

²¹ Ke kia inya inya a g ame he ka unöngöt hmeledrany hia ge hmanengi Iehova;

²² ke can anyin a olibenyita cubic nya hnen tavat hia eang adre me wâ hmanenangik me anyik je ûöman, waleji oge ânyâ hnyi Aigupito, me hnyi hnyebuba, kʼ adre ca löng hok hofuc;

²³ awe, adre me ca he ka wâ hnyei waleji oge khemanyin ka lakamödra, kʼ ame ca he ka wâ e hnen tavat adre me hûkötiö nya:

²⁴ ke haba athnyabaik a Kaleba, anyin a e at ae ke hnyekon, ke e ame tha löng hotuk, awe oge me he ka hom e ka hnyi hnyei wale a mwi hnyin; kʼ ame he je mâtrâniny ka hu e.

²⁵ Haba at Amaleka me Kanana adre me laba hnyi hnyigöulen bucen: ke haba nyi öbun e he ka hwiö me he ka hnyi hnyebuba, gethen ka hnyi Köiö ae Dra.

²⁶ Ke Iehova ame ha kö Mose me Arona, ka habe,

²⁷ Oge me he ka hokhnyokâ ke ne o but kehö ûkhacaköu eang ae kong, tavat adre me ulidri nya? oge löng ut ulit anyin lakon Isaraela wale adre me ulidri nya.

²⁸ Ha thö ködra, ka habe, Haingö Iehova, kia inya inya oge me he ka ânyâ köbun helâ me hnöbun hna ha hnyi li hnyikönyök:

²⁹ kʼ ame he ka mok ta je unyibun hnyi hnyebuba eang; ke öbun hia wale tavat adre aû, hoton hna sihnalimibun hia, hwân ge tavat a twente huna me gan hon e, a tavat adre ulidri nya,

³⁰ e hnathu öbun e ca he ka o ka hnyi hnyei waleji oge hai hnyamok he ka olabʼ öbun hnyin, ke so thibi Kaleba nöku Jefune, me Josua nöku Nuna.

³¹ Ke haba lakubun je wanakat wale öbun e ha a gʼ ame he ka hûgûnâ hnen vat, me oge me he ka hum ödrin bi, ke adre me he ka wâ hnyei öbun e hûkötiâ.

³² Ke haba öbun, me ame he ka mok je unyibun hnyi hnyebuba eang.

³³ Kʼ ame he lakubun ka he monumonu hnyi hnyebuba hnyi je huna a fâte, kʼ ödrin e he ka hijen tilâ hnöbun je hna bi ûnyi monu, ke ne o but ame aû degecâ je unyibun hnyi hnyebuba.

³⁴ Helâ me ûseiny je bong öbun e ecmâkâ hnyin hnyei, a fâte je bong, me haba khaca bong ame he ka khaca huna, kʼ öbun e he ka hijen tilâ anyibun hulö, hnyi je huna a fâte, ke öbun e he ka wâhmakhmetoâ hnok hna hwio.

³⁵ Inya Iehova oge me fuc, kʼ oge me he ka ânyâ eling ka ûkhacaköu hia ae kong eang, adre tot meta könya: adre me he ka ohiʼ ödra hnyi hnyebuba eang, kʼ adre me he ka mok eling.

³⁶ Ke haba tavat a kunâ Mose he ka ecmâkâ hnyei, wale hnyat ödrin e hmetu me oâ ulidro ûkhacaköu hia gan, ke ödrin e haikongoâ hnyei,

³⁷ haba hnyat eling ödrin e hom ûthumeto ae kong ge hnyei, me ödrin e mok hia hnyi hnyimakö Iehova hnen mok ae gan.

³⁸ Ke haba Josua nöku Nuna, me Kaleba nöku Jefune a li at ödre hnyi ecmâkâ hnyei, me ödre möt biju.

³⁹ Ke Mose ame thumetu lakon Isaraela hofuc eling: me ame tenge hwege tavat.

⁴⁰ Ke adre me vesâkong, me öliâ bucen, me ha, ka habe, Walʼ ohmun ang, ke ohmun e he ka he ka hnyi hnyei ame ha Iehova, anyin ae kong hwakecihmun.

⁴¹ Ke Mose ame ha, ka habe, Ieû gabun öbun e hanyâûâ hnanyibu anyi Iehova, kʼ ame ca he bi ka hwâdâ?

⁴² Ca ölʼ öbun, anyin a ca e unyibun Iehova, wâ e nye kuc öbun hnen je iwahnaihmiony möbun.

⁴³ Ke wala at Amaleka me at Kanana hnyi hnyimaköbun, kʼ öbun e he ka ta ge hele vat; anyin a öbun e hmetu ûnyi ga Iehova, me waleling ame ca he Iehova ka tha e möbun.

⁴⁴ Ke hwege hnyimaködra he ka i öliâ bucen: ke so bi ame ca he ûnyi hnyi hna hunuma tangen ûhihinyköu anyi Iehova, me Mose.

⁴⁵ Ke ame utut at Amaleka me at Kanana, a wale tavat adre me laba hnyi bucen eling, me adre me kuc ödra me hnu ödra hmetu ke ne o but Horema.