Numera 13 - Iaai Bible 1901 (New Caledonia)

¹ KE Iehova ame ha kö Mose, ka habe,

² Kunâ ke je hnyat he ka ecmâkâ hnyei Kanana, wale oge ham ka lakon, Isaraela: öbun a he ka kunâ ûsa khaca ûnyi hnyi je tribu hia anyin lakamödrin, a je than hia.

³ Ke Mose ame kunʼ ödrin ûnyi hnyi hnyebuba Parana, helâ me Iehova ame ha: haba ödrin hia ödrin je taben lakon Isaraela.

⁴ Ke walang je iödrin; Samua, nöku Zakuri, ûnyi hnyi tribu Reubena.

⁵ Ke haba ûnyi hnyi tribu Simeona, Safata nöku Hori.

⁶ Ke ûnyi hnyi tribu Juda, Kaleba, nöku Jefune.

⁷ Ke ûnyi hnyi tribu Isakara, Igala, nöku Josefa.

⁸ Ke ûnyi hnyi tribu Eferaima, Hosea, nöku Nuna.

⁹ Ke ûnyi hnyi tribu Beniamina, Paleti nöku Rafu.

¹⁰ Ke ûnyi hnyi tribu Zebulona, Gadiela, nöku Sodi.

¹¹ Ke ûnyi hnyi tribu Josefa, a wale tribu Manase, Gadi, nöku Susi.

¹² Ke ûnyi hnyi tribu Dana, Amiela, nöku Gemali.

¹³ Ke ûnyi hnyi tribu Asera, Setura, nöku Mikaela.

¹⁴ Ke ûnyi hnyi tribu Nafatali, Nahebi, nöku Vofesi.

¹⁵ Ke ûnyi hnyi tribu Gada, Geuela, nöku Maki.

¹⁶ Wale ien hnyat Mose ame kunâ he ka ecmâkâ hnyei. Ke Mose ame hwenyi iö Hosea, a nöku Nuna, me, Josua.

¹⁷ Ke Mose ame kunʼ ödrin he ka ecmâkâ hnyei Kanana, me ha ködrin, ka habe, Öbun e he ka ölö hnyi Hwaiöu, ke öliâ thö je bucen:

¹⁸ me wâ hnyei habe ehö; ke tavat adre labā, hawa ödra tavat ae hwege, ame ne tavat ae ngâ, ame ne tavat ae se hia ame ne wakhalet thibi;

¹⁹ ke ehö hnyei adre me labā, ame ne so, ame ne kong; ke ehö je taun adre me labā, ame ne je hna hunuma, kʼ ame ne je hnabâ ae hwege;

²⁰ ke ehö kânâ, ame ne pipikhenya ame ne delâ, ame ne hu je ûö, ame ne ba. Ke hwege thʼ öbun, ke öbun e he ka hom jem hanen jeûiny kânâ. Haba ûen eling, me ûen wan vine a bân.

²¹ Ke ödrin e ölö thö me ecmâkâ hnyei hwân hnyi hnyebuba Zine ke ne o but Rehoba, ke ne o but hnyi gethen ûheny Hamath.

²² Ke ödrin e ölö hnyi Hwaiöu, me o hnyi Heberona; wale Ahiman, me Sesai, me Talemai, a laku Anaka. (Ke haba Heberona, me adre bödra ka op e ehac seven ta huna e tiga ca op Zoana hnyi Aigupito.)

²³ Ke ödrin e o but hnyi Esekolo a hnyigöulen bucen, me sö but eling ke vheiny me thi wan vine a khaca, me vadren hnyi venyâ hnen li at a lo; ke ödrin e hom minya je wan rimona, me je wan ometâ.

²⁴ Ke adre hwenyi ien dok eling Esekolo hnyi hnyigöulen bucen, can thi vine a sö lakon Isaraela eling.

²⁵ Ke ödrin e hmetu ûhedrin hnyi hna ecmâkâ hnyei hwaban je bong a fâte.

²⁶ Ke ödrin e hmetu but me o kö Mose me Arona, me ûkhacaköu hia anyin lakon Isaraela, ka hnyi hnyebuba Parana, wale Kadesi; me oâ ûthumetu ködru, me ûkhacaköu hia anyin lakon Isaraela, me omanenâ ködra waniny kânâ.

²⁷ Ke ödrin e thumeto e, ka habe, Ohmun e o but ka hnyi hnyei u je kunʼ ohmun ka hnyin, ke e hnathu ame di ge debai me hani; ke walang waniny.

²⁸ Ke so bi e hwege tavat a idra hnyei, ke adre up haginy je taun, ke e ti gan: ka ohmun e wâ eling je laku Anaka.

²⁹ Kʼ ame laba Amaleka hnyi ke keihen ka hnyi Hwaiöu: ke haba hnyi je bucen ame laba hnyat Heth, me Jebusi, me Amora: kʼ ame laba at Kanana hnyi hobat köiö me hnyi baten Joridano.

³⁰ Me haba Kaleba ame thawâ tavat hnyi hnyimakö Mose, me ha, ka habe, E so ötin e ie he me hûgûnâ; anyin ae khanʼ ötin he ka hwege hon.

³¹ Ke haingen tavat ödrin e tha ölö mē, ka habe, E ca khanʼ ota he ka ölö thö ka tavat eling, anyin a ödra hwege huta.

³² Ke ödrin e haikongoâ hnyei ödrin e ecmâkâ ka lakon Isaraela, me ha, ka habe, Haba hnyei ohmun e vheno me ecmâkâ, me hnyei ame ohia aten, ke haba tavat hia ohmun e wâ eling, me tavat ae beû.

³³ Ke ohmun e wâ eling ta je hmai ae beû hmâ, a je laku Anaka, a mâtrâniny je hmai ae beû, ke ohmun helâ me je wahamon hnyi hnyimaköhmun, ke helâe minya hnyi hnyimaködrin.