Numera 11 - Iaai Bible 1901 (New Caledonia)

¹ KE haba tavat helâke adre me ûhaiö, ke e kong e kö Iehova; ke Iehova ame löng, me gan hmâ anyin hmönyin; me ame ubâhlâ hmönyin anyi Iehova unyidra, me an ke ne o but ka hnyi obiny hna hunuma

² Ke haba tavat adre me tengiâ kö Mose; me Mose ame khawe kö Iehova, me ame mok hmetu ju meic.

³ Ke adre hwenyi ien dok eling Tabera: anyin ame ubâhlâ meic anyi Iehova unyidra.

⁴ Ke haba tavat ae ve bongon unyidra adre me hwân ka behnyekon: kʼ ame tenge hmetu lakon Isaraela me ha, ka habe, Ia ame he ka ha ötin ge meno?

⁵ Ötin e ûnykûme je wâ waleji ötin e an baûâ hnyi hnyei Aigupito; me ta je kokuma, me je wajem, me je liki, me je önyen, me je galika:

⁶ ke meleca thö walang je unyitin; e ba but ta je ûnyi hia; ke ba ke ûnyi ötin e wâ ke mana thibi.

⁷ Haba mana me wale ke ûnyi helâ me onyen gada, ke haba bongon, at ka wâ, me helâ me bedola.

⁸ Ke haba tavat adre me ngenu me aoc, me oamamâ hnyi li veto, ame ne kokot e hnyin kumete, kʼ adre me thân hnyi öt, me up aretoiny, ke haba bunen me helâ me wakaco ae teb ûnyi, at ka drem.

⁹ Ke ame ta hau hon je hnyaba hnyi lit, me ame ta minya mana.

¹⁰ Ke Mose ame löng hwan tavat adre me tenge hnyi je hwanumen umödra je uma mano: me ame ubâhlâ hmönyin anyi Iehova, ke e kong ut minya kö Mose.

¹¹ Ke haba Mose ame ha kö Iehova, ka habe, Ieû gam u me okongo athnyabaem? ke ieû gam u me ca betenge gak, ke u je ip huk hmakiny tavat eang?

¹² Hawa oge erkinâ tavat hia ang? hawa oge hnöku ödra, mʼ u me he ka ha könya, ka habe, Kop ödra ka hnyi ûlâiâm, helâ me kamen wale at ame tuö wanakat adre asen, ka hnyi hnyei u je khemanyin ka lakamödra?

¹³ Ûnyi ua utiö, mʼ inye he ka ham ka je hnyat hia eang? anyin adre me tenge könya, me ha, ka habe, Ha ohmun ge utiö.

¹⁴ E ca khanö nya he ka hake kap tavat eang, anyin ae ti hmak könya.

¹⁵ Ke u je ne ânyâ helâe könya, me ö u hlingö nya but u je ne betenge gak; mʼ oge me ca he ka wâ anyik hlöuhlöu.

¹⁶ Haba Iehova ame ha kö Mose, ka habe, Ûkhacaköuâ thö könya je hnyat a sevente, a wahingatiny at Isaraela, wale u me wâhmakhmeto a wahingatiny hnyei, me homakan hnyei; ke hum ödrin ka hnyi uma ûkhacaköu, mʼ ödrin e he ka tha tot mou eling.

¹⁷ Ke oge me he ka utut me ûhnenamö eling mou: ke oge me he ka hom ke keihen hanu unyâm me ip hudrin; mʼ ödrin e he ka tha vadren mou tavat a ûnyi ae hmak, me u me ca he ka hake vadren.

¹⁸ Ke u me he ka ha ka tavat, ka habe, Okabi öbun dö hobi kâu nyi, mʼ öbun e he ka han utiö: anyin a öbun e hia but tenge ka hnyi li hnyikönyö Iehova, me ha, ka habe, Ia ame he ka ha ohmun ge utiö? anyin ae so köhmun ehac hnyi hnyei Aigupito: waleling me me he Iehova ka ha öbun ge utiö.

¹⁹ Öbun e he ka han utiö, ca hnyi khaca thibi bong, ke ca lo li bong, ke ca thabûng ta bong, ke ca libenyita ta bong, ke ca twente ta bong;

²⁰ ke so bi ama khaca tehi, ke ne o but e ka o but e hnyi je hnyingöibun, ke öbun e he ka ikikiâ e: anyin a öbun e hûkötiö Iehova at ame tha e möbun, me tenge hnyi hnyimakan, ka habe, Ötin e he jem geû ûheta Aigupito?

²¹ Ke Mose ame ha, ka habe, Haba tavat unyik ödra siks haded thauzan tavat vat; ke u je ba, ka habe, Oge me he ka ha ödra ge utiö, mʼ adre me he ka han hnyi khaca tehi.

²² Hawa, adre me he ka hlingâ hobi ködra je hnahat mamoe me kau, me me sekudra? ke adre me ne he ka ûkhacaköuâ ta je wâ hia eû hnyi köiö hobi ködra, me me sekudra?

²³ Ke Iehova ame ha kö Mose, ka habe, Hawa, ame hwân ka okhulit hnyamö Iehova? u me he ka wâ walang ang, ame ne he ka āt, ame ne ca he ka āt hok hofuc.

²⁴ Ke Mose ame didrut me ha ka tavat hofuc ho Iehova: me e ame ûkhacaköuâ wahingatiny hnyei a sevente me otilʼ ödrin igigilö Uma.

²⁵ Ke ame utut Iehova hnyin ûlâ, me fuc kâu, me hom ke keihen hanu unyin me ip hon wahingat a sevente: ke a mokut hanu hudrin, me ödrin e perofeta, ke ödrin e ca ânyâ hmetu helâe.

²⁶ Ke ame laba hnyi hna hunuma ke li at, Eledada ien ke at, ke Medada ien ke at: ke ame mokut hudru hanu; haba ödru ke li at adre sihnalimidru, kʼ ödre ca hnyi he ka hnyi Uma: ke ödru me perofeta hnyi hna hunuma.

²⁷ Ke ame wadring ke hidröu me thumetu Mose, ka habe, Haba Eledada me Medada ödru me perofeta hnyi hna hunuma.

²⁸ Ke haba Josua nöku Nuna athnyabai Mose, a hanen hnyat e ame ûca, ame thu me ha, ka habe, Than Mose lö, thawʼ ödru ju,

²⁹ Ke Mose ame ha kâu, ka habe, U me vec gak? e na je perefota hia je lakei Iehova, me me he Iehova ka ip hanon hudrin!

³⁰ Ke Mose me wahingatiny Isaraela ödrin e he ka hnyi hna hunuma.

³¹ Ke ame o thö ang ûnyi ga Iehova, me ame oâ je jûö ûnyi hnyi köiö, me ota but hnyi hna hunuma, ame ne helâ me khaca bong ka he ka hnyi ke keihen, kʼ ame ne helâ me khaca bong ka he ka hnyi ke keihen, igigilö hnyaba; ke ame ne lo li kubit goranyai hon kânâ.

³² Me ame todrö tavat hnyi bong eling hia me lit hia, me bong nyi hia, me hlo ta je jûö: ke haba at ame hlo ûhnyûkongo, ame hlo ten je homer; ke adre me ve ip monoâ hobi ködra igigilö hna hunuma.

³³ Ke tiga e bi utiö hnyi wanben je nyudra, kʼ adre tiga ca um hoc, me ame ubâhlâ thö hmönyin anyi Iehova ka tavat, ke Iehova ame kot tavat ge mok ae gan hmâ.

³⁴ Ke adre me hwenyi ien dok eling, me Kiberoth-atava; anyin adre konâm eling tavat behnyekon.

³⁵ Ke haba tavat adre me he Hazeroth ai, ûhedra Kiberoth-atava, me laba hnyi Hazeroth.