Numera 10 - Iaai Bible 1901 (New Caledonia)

¹ KE Iehova ame ha kö Mose, ka habe,

² U me he ka tibet li trutru sileva; u me be ka huliwan ge hama: ke wale li ûnyi hnân hawâ ûkhacaköu, me hnân he je bunyen.

³ Ke ödra ka he ka tûâ, me ame he ka ûkhacaköu köu tavat hia hnyi hwanumen uma ûkhacaköu.

⁴ Ke ödra ka he ka okhaca tûâ, me ame he ka ûkhacaköu köu ta je than, a je taben je thauzan unyin at Isaraela.

⁵ Ke öbun ka tûâ hnahna, me ame he ka he tavat adre me hunuma hnyi ke keihen e deiö.

⁶ Ke öbun ka olo tûâ hnahna, me ame he ka he tavat adre me hunuma hnyi ke keihen ka hnyi hwaiöu: ödra ka ke ka tûâ hnahna me hnân ohei ödra.

⁷ Ke ödra ka he ka ûkhacaköuâ tavat, me adre me he ka tûâ thibi, kʼ adre me ca he ka tûâ hnahna.

⁸ Ke hamen laku Arona hnyat bihut he ka tûö trutru, wale hnân hnanyibu köbun nyiele balua hnyi anyibun je dö.

⁹ Ke öbun ka he ka vat hnyi ibun hnyei me je iwahnaihmiony möbun, tavat adre me okongu öbun, me öbun e he ka tûâ hnahna wale li trutru; me adre me he ka ûnykûmi öbun hnyi hnyimakö Iehova Khongubun, kʼ adre me he ka omeli öbun ûnyi ge je iwahnaihmiony möbun.

¹⁰ Ke haba hnyi je bong öbun e senyin hnyin, me hnyi anyibun je bijeû adre thu, me hnyi hnyimakan je tehi, adre me he ka tûâ li trutru hon anyibun je hudiny leû, me anyibun je hudiny ole; mʼ adre me he ka ûnykûmi öbun hnyi hnyimakan Khongubun: Inya Iehova Khongubun.

¹¹ Ke haba hnyi huna a loiny, hnyi tehi a loiny, hnyi bong a twenteiny, me adre me hom goranyai ûlâ ûnyi hnyi hon uma mano uma ohnatho.

¹² Ke haba lakon Isaraela adre me he but ûheny hnyi hnyebuba Sinai; me ame tot u ûlâ hnyi hnyebuba Parana.

¹³ Ke adre me bân ka he ûnyi hnyi musi anyi Iehova, a deny Mose.

¹⁴ Ke ame he bân haten lap anyin laku Juda, hoton anyidra je utbavat: ke haba at ame musö anyin vat, me, Nasona, nöku Aminadaba.

¹⁵ Ke haba at ame musö vat anyin tribuiny laku Isakara, me, Nathaniela, nöku Zuara.

¹⁶ Ke haba at ame musö vat anyin tribuiny laku Zebulona, me, Eliaba, nöku Helona.

¹⁷ Ke adre me āi uma mano, kʼ ame hwân laku Geresoma me laku Merari hnyat sukhöûnâ uma mano ka he.

¹⁸ Ke ame hwân ka he haten lap anyi Reubena, hoton anyidra je utbavat: ke haba at ame musö anyin vat, me, Elizura, nöku Sedeura.

¹⁹ Ke haba at ame musö vat anyin tribuiny laku Simeona, me, Selumiela, nöku Zurisadai.

²⁰ Ke haba at ame musö vat anyin tribuiny laku Gada, me, Eliasafa, nöku Deuela.

²¹ Ke ame hwân at Kohatha ka he, ödrin e kap tilâ ûnyi ae kap: ke haba keihen ödrin e otilâ uma mano hobi kâu ödrin ka o thö.

²² Ke ame hwân haten lap anyin laku Eferaima ka he, hoton anyidra je utbavat, ke haba at ame musö anyin vat, me Elisama, nöku Amihuda.

²³ Ke haba at ame musö vat anyin tribuiny laku Manase, me, Gamaliela, nöku Pedazura.

²⁴ Ke haba at ame musö vat anyin tribuiny laku Beniamina, me Abidana, nöku Gideona.

²⁵ Ke ame hwân haten lap anyi Dana ka he, wale obiny je lap hia, hoton anyidra je utbavat, ke haba at ame musö anyin vat, me Ahiezera, nöku Amisadai.

²⁶ Ke haba at ame musö vat anyin tribuiny laku Asera, me, Pagiela, nöku Okerana.

²⁷ Ke haba at ame musö vat anyin tribuiny laku Nafatali, me Ahira, nöku Enan.

²⁸ Wale hwakecin ûheny lakon Isaraela hoton anyidra je utbavat; kʼ adre me hwân ka he.

²⁹ Ke haba Mose ame ha hö Hobaba, nöku Reuela, at Midiana, a ûngu Mose, ka habe, Ohmun e he ka hnyi hnyei waleji Iehova ame ha, ka habe, Oge me he ka ham köbun; aiö u ötin e tha he, ke ohmun e he ka ânyâ so köu, anyin a hia but Iehova ha so kö Isaraela.

³⁰ Ke e ame thu kâu, ka habe, Oge me ca he ka hnyi he, ke oge me he bi nya ka hnyi ik hnyei me anyik lap.

³¹ Ke haingen ka habe, Ö u ca he bi ka hnʼ ohmun; anyin a khanö u a ohmun e he ka hunuma hnyi hnyebuba, ke u me he ka emaköhmun.

³² Ke u je ne tha he möhmun, me haba so ame he Iehova ka ânyâ köhmun, me ohmun e he minya ka ânyâ helâe köu.

³³ Ke adre me he but ûhedra hnyi bucen anyi Iehova hnyi kun ta bong; ke haba tangen ûhihinyköu ame he bân hnyi kun ta bong, he ka elâm hna menâ hobi ködra.

³⁴ Ke ethö bi hudrin ûlâ anyi Iehova hnyi lany, hnyi ûen adre me he ûhedra hnyi hnödra hna hunuma hnyin.

³⁵ Ke haba hnyi ûen ame hwân tang ka he, haba Mose ame ha, ka habe, Iehova lö, todrö, me me ve se but je iwahnaihmiony mou; me kec gam tavat adre me hukötiö u.

³⁶ Ke hnyi ûen ame menâ, me e ame ha, ka habe, Iehova lö, hmetuhmetu ju ka ta je thauzaniny aten Isaraela.