Nehemia 8 - Iaai Bible 1901 (New Caledonia)

¹ ME haba tavat hia thithö ödrin e ûkhacaköu helâ me at a khaca hnyi dok ae lau cicö homagouleny an; ke ödrin e ha kö Ezera at sihnalimen he ka hom tusiny hnanyibu anyi Mose, waleji a hûna Iehova ka at Isaraela.

² Me haba Ezera at bihut ame hom hnanyibu ka hnyi hnyimakan ûkhacaköu obaga me omomo, me tavat hia ae khanʼ ödra he ka lönghma-khmeto, hnyi bong a bâniny tehi a seveniny.

³ Me e ame aû tusi e, hnyi dok ae lau cicö homagouleny an, hwân hnyi haolany ke ne o but hnyi jebigö, hnyi hnyimakan obaga me omomo, me tavat ae khanʼ ödra he ka lönghmakhmeto; ke ame tevehlöng je hnyi-könyen tavat ka hnyi tusiny hnanyibu.

⁴ Ke haba Ezera at sihnalimen ame tot hon tap uto, waleji adre me tibet hobi kâu huliwa eling; ke haba Matathia ame tot unyin, me Sema, me Anaia, me Uria, me Hilekia, me Maseia, hnyi ke keihen a metân; ke ödrin bi hnyi ke keihen a meny, me Pedaia, me Misaela, me Malekia, me Hasum, me Hasebadana, me Zakaria, me Mesulama.

⁵ Ke haba Ezera ame ulolo tusi hnyi hnyimakan tavat hia; (anyin a e ethö hon tavat hia;) ke a hia but ulolo e, me ame tha todrö tavat hia:

⁶ ke Ezera ame haisoi Iehova Khong ae gan. Me haingen tavat hia, ka habe, Amen, Amen, me hai goranyai je hnyamödrin; ke ödrin e nom ju hnyikânâi me khudrung kö Iehova, me hnyimaködrin hnyikânâi.

⁷ Kʼ haba Jesua, me Bani, me Serebia, me Jaʼ mina, me Akub, me Sebethai, me Hodia, me Maseia, me Kelita, me Azaria, me Jozabada, me Hanan, me Pelaia, me at Levi, me ödrin e ometâ tavat hnyi hnanyibu: ke ame ve tot tavat hnyi je hnödrin.

⁸ Ke ödrin e aû manenâ tusi hnanyibu anyin Khong; me ödrin e ha bongon, mʼ adre me he ka wâ tremângâ hna aû.

⁹ Ke haba Nehemia a gavena, me Ezera at bihut ke at sihnalimen, me at Levi tavat adre me nâ tavat, me ödrin e ha ka tavat hia, ka habe, Bong ang me kap kö Iehova Khongubun; ca hmak me tenge. Anyin ame tenge tavat hnyi ûen adre me long hofucin hnanyibu.

¹⁰ Ke e ame ha ködrin, ka habe, He thʼ öbun, an ju pipikhenya me ijem ûnyi ae senem, me kunâ je jekhoû ka tavat adre me ca penapena hobi kâu: anyin ae kap ka Tuhötin bong ang: ke ca he öbun ka hmak; anyin a haba tang hwegiöbun me senyin kö Iehova.

¹¹ Me at Levi ödrin e otubwelâ tavat hia, me ha ködrin, ka habe, Laba hnyibû, anyin ae kap bong ang; ca hmak bi öbun.

¹² Ke ame he tavat hia he ka han me ic, me kunâ je jekhoû, me ti senyin, anyin a ödrin e wâhmakhmetoâ je hofuc adre me omanenâ ködrin.

¹³ Ke haba hnyi bong a loiny ame ûkhacaköu je kamen ae beönua ge tavat hia, me tavat bihut, me at Levi, kö Ezera at sihnalimen, mʼ adre me he ka tevehlöng hofucin hnanyibu.

¹⁴ Ke ödrin e wâ but hna sihnalimen hnyi hnanyibu waleji a hûna Iehova a deny Mose a gʼ ame he lakon Isaraela ka laba hunuma hnyi bijeû hnyi tehi a seveniny:

¹⁵ me hamödrin he ka omanenâ hnyi anyidrin je taun hia thithö, me Jerusalema, ka habe, He thö ka hnyi bucen, me hom je vheiny elaio, me je vheiny elaioiny hnyot, me je vheiny adasi, me je lan pama, me vheiny je uö ae gan, hnân he ka ânyâ je uma menâ, helâ me hna sihnalimen.

¹⁶ Me ame he but tavat, me hom, me ve ânyâ hobi ködrin bi je uma menâ ethö hon ban umödrin je uma, me hnyi je hnyabadrin, me je hnyaban uma umen Khong, me hnyi dok ae lau hnyi homagöuleny an, me hnyi dok ae lau hnyi homagöule Eferaima.

¹⁷ Haba ûkhacaköu hia tavat adre me hmetu ûheny hnyi hna bâ, adre me ânyâ je uma menâ, me labâ je uma menâ: anyin a lakon Isaraela ödrin e ca ânyâ helâe hwân hnyi bong bongu Josua nöku Nuna ke ne o but hnyi bong ang. Ke e ti gan senyin.

¹⁸ Me e ame aû tusi hnanyibu anyin Khong hnyi ke bong me ke bong, hwân hnyi bong a bân ke ne o but hnyi bong a biliny. Me ödrin e tuö bijeû hnyi je bong a seven; ke haba hnyi bong a eitiny e hu ûkhacaköu ae ûnyi hnathu, hoton hna hûna.