Nehemia 6 - Iaai Bible 1901 (New Caledonia)

¹ KE a long ut Sanebalata, me Tobia, me Gesem, at Arabia, me je kolon a je iwahnaihmiony a oge hia but op hak, ke ba hmetu dok ae hmouca hnyin; (ke haba hnyi ûen eling iny tiga ca otilâ le hlinginy hnyi je homagöule;)

² haba Sanebalata me Gesem ödru me ûkhûnöng könya me ha, ka habe, Otin e he ka iouny hnyi ke taun hnyi hnyigöulen bucen Ono. Ke ödrin e ûnykûme he ka okongu nya.

³ Me oge me kunâ ködrin ûthumetu he ka ha, ka habe, Inya oge me ânyâ huliwa ae gan hmâ, ke ca khanö nya he ka he: anyin a ieû adre me he ka ip huliwa, me hna degecâ, me inye he but köbun?

⁴ Ke ödrin e ovak ûkhûnöng könya helâe; ke oge me thu bala ködrin helâe.

⁵ Me ame othabûng Sanebalata kunâ bala könya helâe lathnyabainy, me tusi adre ca ohmâ hnyi hnyamen;

⁶ adre sihnalimen hnyin, ka kabe, Adre me long ut hnyi ta je hnyei, ke haba khaca ame ha Gesem a u me ûnykûme me at Juda he ka thu musi; anyin a wale u me op hak: ke u me bewem he ka tuhödrin helâ me hna ha.

⁷ Ke u je hia but otilâ je perofeta he ka khetâ hofuc gam hnyi Jerusalema, me ha, ka habe, E hu than dut hnyi Juda: ke walang adre me he ka thumeto than helâ me hna ha. Ke walang aiö u me otin e he ka ühnenamö.

⁸ Me oge me ûkhûnöng kâu me ha, ka habe, E ba ûnyi helâ me hnâm hna ha, ke u je sit hofuc ûnyi hnyi hnyekom bi.

⁹ Anyin a ödrin hia thithö ödrin e beöti ohmun haingödrin ka habe, Ame he ka mat je hnyamödrin hnyi huliwa, mʼ adre me ca ânyâ bi. Ke walang Khong lö, owhegiâ thö li hnyamok.

¹⁰ Ke o ge me he ka hnyi uma umo Semaia, nöku Delaia, nöku Mehetabela, wale at adre thelöng hwanumen; me e ame ha, ka habe, Otu he ka ûkhacaköu hnyi uma umen Khong, hnyin uma kap, me hlöng je hwanumen uma kap: anyin a ödrin e he ka he jem he ka hlingö u; eke, hnyi hnyinget ödrin e he ka he jem he ka hlingö u.

¹¹ Ke haingök, ka habe, Ame he at a helâ mönya ka kec? ke ewa at ae ûcû mönya ame he ka kec ka hnyin uma kap he ka omelö e bi? Oge me ca he ka kec ka hnyin.

¹² Ke wâ bi, oge me wâhmakhmetoâ a ga ca kunâ e Khong: ke e ame ha baûâ hofuc hwan perofeta e gak: anyin a Tobia, me Sanebalata Ödru me bi hwaban kâu.

¹³ Anyin a wale adre me bi hwaban kâu me inye ot ju, me ânyâ helâe, me inye kong dö, me me hu gadrin ûnyi hnân haikongu nya, mʼ adre me he ka oûhnyûkongu nya.

¹⁴ Khong lö, ûnykûme ju kö Tobia, me Sanebalata helâ me anyidru je huliwa ang, me kö Noadia perofeta momo, me je kolon je perofeta hnyat ödrin e besoti nya.

¹⁵ Ke adre me umo up haginy hnyi bong a twente faiviny tehi Elul, hnyi je bong a fifte tu.

¹⁶ Ke a long ut je iwahnaihmiony möhmun hia, haba ta je hnyei hia igigili ohmun adre me ot me hmak hmonyin: anyin adre me wâhmakhmeto a gʼ adre ânyâ huliwa e ge Khongutin.

¹⁷ Ke hnyi ûen e haba je than Juda ödrin e kunâ anyidrin je tusi ae se kö Tobia, ke haba Tobia ame kunâ je tusi ae se ködrin.

¹⁸ Anyin ae se hia tavat hnyi Juda adre me khemanyin kâu, anyin a e ûngu Sekania nöku Ara; ke haba Johanana a nokon ame hom hlu nöku Mesulama nöku Berekia.

¹⁹ Ke haba hnyi hnyimakök me ödrin e ha hwakecin ae so, me hom kâu hok je hofuc. Ke haba Tobia ame kunâ je tusi he ka ooti nya.