Nehemia 5 - Iaai Bible 1901 (New Caledonia)

¹ KE ame kû gan hmâ ûtengien tavat, me je laöiödrin ge je liamekeiny mödrin a at Juda.

² Anyin ae hu gadrin tavat ödrin e ha, ka habe, Ohmun se hia ohmun me je lakuhmun obaga me wahlu, hnʼ ohmun ju he ka hom hwit, mʼ ohmun e han me möt.

³ Ke haingen keihen, ka habe, Ohmun e tiga böhmun ka ûco je ihmun, me ihmun je hnyei vine, me umöhmun je uma: e so ohmun e hom hwit, can hmiâ.

⁴ Ke haingen keihen, ka habe, Ohmun e hia but mē sumâtâ mone hnân bi fat ka than hwaban ihmun je utkânâ me ihmun je hnyei vine.

⁵ Ke walang ang haba je unyihmun e ûcû me unyin je liamekeiny möhmun, me je lakuhmun e ûcû me je lakudrin: ke wâ bi öhmun e ham lakuhmun obaga me wahlu hnân lathnyaba, ke adre hia but hom keihen lakuhmun je hlu hnân bi athnyaba: ke ba manihmun he ka thawâ; anyin ae unyin keihen bi ihmun je utkânâ, me ihmun je hnyei vine.

⁶ Ke e gan hmâ anyik hmonyin, hnyi ûen oge me long ûtengiödrin me hofuc eling.

⁷ Me oge me ûsabö eû hnyi hnyekuk, me oû je than, me tavat musi, me ha ködrin, ka habe, Öbun e mē ve ham ûnyi ka je liamekeiny möbun hnân heleû troban. Ke oge me otilâ ûkhacaköu ae gan hmâ ködrin.

⁸ Me oge me ha ködrin, ka habe, Öhmun e ûco hmetu je liamekeiny möhmun a at Juda, tavat adre ûco ka aten ke je hnyei, hoton hnöhmun hna hu; hawa, öbun e ka he bi ka ûco je liamekeiny möbun, ke adre me he ka ûcû ödrin kohmun? Me ödrin e laba hnyibû, me ca wâ ke ûnyi hnân thu.

⁹ Haingök minya, ka habe, E ca so ûnyi e öbun e ânyâ; hawa, öbun e ca he ka he me outen Khongutin, wâ e nye haikongoâ hnen je wanaithila a je iwahnaihmiony mötin?

¹⁰ Ke inya minya, me je liamekeiny mönya me lathnyabaik, ohmun e mē ham ködrin mone me hwit hnân heleû troban, Ö otin a degec ut ling he ka mē ham hnân heleû troban.

¹¹ Öbun na ham hmeto ködrin hnyi bong ang idrin je utkânâ, me idrin je hnyei vine, me idrin je hnyei elaio, me umödrin je uma, me ke keihen a hadediny mone, me hwit, me waina, me wakaco, waleji öbun e hom gadrin.

¹² Me ödrin e ha, ka habe, Öhmun e he ka ham hmetu ke adre me ca he ka hnei hwaban gadrin; öhmun e he ka ânyâ helâ me hnâm hna ha. Me oge me hawâ tavat bihut, me kunʼ ödrin he ha khemanyin a ödrin e he ka ânyâ helâ me hofuc eling.

¹³ Ke oge me jijingâ manoiny ûkhaûk, me ha, ka habe, Ame he Khong ka jijingâ degecâ tavat hia adre me ca ohwâdâ hofuc ang, ûnyi hnyi umödrin je uma, me anyidrin je huliwa; e so adre me he ka jijingʼ ödrin helâe, me otheduocâ. Me ame ha ûkhacaköu hia, ka habe, Amen, kʼ adre me oganö Iehova. Me haba tavat ödrin e ânyâ hoton hofuc eling.

¹⁴ Ke haba khaca, hwân hnyi ûen adre me otilö nya he ka gavena ködrin hnyi hnyei Juda, hwân hnyi huna a twente ke ne o but hnyi huna a thote tui Aretaseta than, wale twelv je huna, me haba inya me je liamekeiny mönya öhmun e ca an an gavena.

¹⁵ Ke haba je gavena ehac, ödrin e ohmakâ tavat, kʼ ödrin e hom ûnyi gadrin jeû me waina, me fâte je sekel sileva; eke, ke lathnyabaidrin minya ödrin e muso tavat: ke oge me ca ânyâ helâe, anyin a iny outen Khong;

¹⁶ Eke, oge me hnyi hanen huliwan hak veto ang, ke öhmun e ca ûcû hnyei: kʼ ame ûkhacaköu eling lathnyabaik hia ka hnyi huliwa.

¹⁷ Ke haba khaca ame labö han hnyi anyik laulau at Juda me hnyat musi a wan haded ke fifte, ke ca ha bi ge aten ke je hnyei adre me he kohmun ûhedrin hnyi je hnyei igigili öhmun.

¹⁸ Ke haba ta je ûnyi adre me penapena hnyi ke bong me ke bong, me, khaca bolok, ke siks ta mamoe adre me ûca; ke adre me penapena hobi könya minya je meno ame gâ, ke haba hnyi je bong a ten adre me hip waina ae ve bongon; ke so bi hnyi ta je ûnyi hia eling oge me ca ûkhûnöng he ka hom an gavena, anyin adre me ohmakâ tavat ang ge huliwa.

¹⁹ Khonguk lo, ûnykûmi nya ju mʼ inya hnahic, e ûcû me ta je ûnyi hia wale oge me ânyâ ka tavat ang.