Nehemia 2 - Iaai Bible 1901 (New Caledonia)

¹ KE haba hnyi tehi Nisan, hnyi huna a twentei Aretaseta than, ke e hnyi hnyimakan waina, ke oge me kât waina, me ham ka than. Ke ea bonguk ehac he ka hmak hnyi hnyimakan.

² Me haba than ame ha könya, ka habe, Ieû ame hmak gan hnyimâkâm, ke u me ca mok bi? wale ae hlöuhlöu hnyekom. Me oge me ot gan hmâ.

³ Me oge me ha ka than, ka habe, E na möt ju than nyiele balua: anyin a ieû ame ca he ka hmak hnyimakök, ke hnyot ut taun ae hnyin je hon lakamök, ke a an dö je homagouleny ge meic?

⁴ Me haba than ame ha könya, ka habe, Ieû wem? Me oge me hic ka Khongon drany.

⁵ Ke haingök ka than, ka habe, Ame ne so ka than, ke u je ne he ka betenge ge athnyabaem, me u me he ka kunö nya Juda ai, ka hnyi tanniny je hon lakamök, mʼ inye be ka op.

⁶ Haba than ame ha könya, (ke ame tha laba mē momo than,) ka habe, Ve ta bonginy ûhem? ke ie ûen u me he ka o hmetu? Ke so ka than he ka kunö nya; ke oge me thu bonguk kâu.

⁷ Ke haingök minya ka than, ka habe, Ame ne so ka than, e so he ka ham könya je tusi ka je gavena hnyi ke keihen hoton wagewe, mʼ ödrin e he ka hnö nya ka he ke ne o but oge me o hnyi Juda;

⁸ me ke tusi kö Asafa at ame tuö hnyot anyin than, me me he ka ham könya je ûö hnân je venyâiny je homagouleny uma, me hobi kâu haginy taun, me uma minya oge me he ka dit ka hnyin. Ke haba than ame ham könya, helâ me hnyamen Khong ae so könya.

⁹ Ke oge me o but ka je gavena hnyi ke keihen hoton wagewe, me ham ködrin je tusi anyin than. Ke haba than ame hia hut tha kunö nya me je taben vat me tavat tabô hors.

¹⁰ Ke a long ut Sanebalata at Horono, me Tobia a athnyaba, a at Amona, me ödru me vec gan hmâ anyin ame o but at he ka elâm so hobi kâu lakon Isaraela.

¹¹ Ke oge me o but hnyi Jerusalema me laba eling hnyi kun ta bong.

¹² Ke ohmun e todrö hnyi hnyinghet, tha inya me keihen; ke oge me ca thumeto ke at ge ûnyâ a ip Khong eû hnyekuk he ka ânyâ hobi kâu Jerusalema: ke ba meno unyik, ke so bi meno thibi oge me tabâ.

¹³ Ke oge me he but hnyi hnyinghet, kʼ oge me gethen hnyi homagouleny e hnyi hnyigöulen bucen cicö pupuainy köiö tanimo, me homagouleny ta tet, me wâ hna up veto hnyi Jerusalema adre kia, me je hlinginy homagouleny a aû but ge meic.

¹⁴ Ke oge me he ka hnyi homagouleny pupua me an belen than: ke ba gethen deny meno oge me tabâ.

¹⁵ Me oge me ölö hnyi hnyinghet hnyi wagewe, me wâ hna up hak; ke oge me hwio, me dit hnyi getheniny homagouleny e hnyi hnyigöulen bucen, me hmetu eling.

¹⁶ Ke ca khana tavat musi dok oge mwi hnyin, me Hnok hna ânyâ; ke oge me tiga ca thumeto at Juda me tavat bihut, me je than, me tavat musi, me je kolon tavat adre me huliwa.

¹⁷ Me oge me ha ködrin, ka habe, Öbun e wâ but anyitin hlöuhlöu, wale bi ang a hnyot ut Jerusalema, kʼ adre thong ge meic je hlinginy homagouleny: ai öbun, mʼ ate me he ka op haginy Jerusalema, mʼ adre me ca haikongu otin hmetu bi

¹⁸ Ke oge me thumetu ödrin ge hnyamen Khonguk ae so huk; helâe minya ge je hofuc hwan than waleji e ame ha könya. Me ödrin e ha, ka habe, Hʼ ötin ka op. Me ödrin e sihwegiâ je hnyamödrin ka hnyi huliwa eling ae so.

¹⁹ Ke a long ut Sanebalata at Horono, me Tobia a athnyaba, a at Amona, me Gesem, a at Arabia, me ödrin e hlumʼ ohmun, me hû-köti ohmun, me haingödrin, ka habe, Ie ûnyi ang öbun e ânyâ? hawa öbun e thu musi anyin than?

²⁰ Me oge me thu ködrin, me ha, ka habe, Ame he Khongon drany ka ohnahici ohmun; anyin a wale ohmun e he, a lathnyabainy, ka todrö me op: ke ba jekhöûbun, me musi, me hnân oûnykûmeâ hnyi Jerusalema.