Nehemia 13 - Iaai Bible 1901 (New Caledonia)

¹ KE haba hnyi bong e adre me aû hnyi tusi anyi Mose, ke haba tavat adre me long; ke adre me wâ hna sihnalimen hnyin, a ame ca he at Amona me Moaba ka hnyi dit hnyi ûkhacaköu anyin Khong nyiele balua;

² can ödrin e ca ûkhanö me lakon Isaraela me je areto me köiö, ke ödrin e ham bak kö Balaama me me he ka hângʼ ödrin: ke so bi haba Khongutin ame wia hna hangâ me me hnahic bi.

³ Ke ödrin e long ut hnanyibu, me ödrin e öûsâkâûöâ tavat ae se hia ae ve bongon bi ûnyi ge at Isaraela.

⁴ Ke haba ehac, Eliasiba at bihut wale adre me otilâ hon je hnyeuleny uma umen Khongutin, ke iatre Tobia mē,

⁵ me e ame hia but penapena hobi kâu hnyeule ae gan, waleji adre me ip hnyin je hudiny han, me libanu, me je kaia, me je ke keihen a libenyitainy hwit, me waina, me wakaco, waleji adre hunâ hobi kâu at Levi, me at khumöng, me at tuö hwanuma; me je hut adre kap goranyai, hobi kâu tavat bihut.

⁶ Ke haba hnyi ûen hia eling, me hiö nya hnyi Jerusalema: anyin a haba hnyi huna a thote tui Aretaseta than Babulona, me oge me he ka than, ke hwaban dö ke je bong oge me sumâtâ than:

⁷ me oge me o but hnyi Jerusalema, me wâ hulo a ânyâ Eliasiba ga Tobia, a e ame penapena hobi kâu hnyeule hnyi je hnyeuleny uma umen Khong.

⁸ Me gan hmâ anyik vec: waleling me oge me dedegec je thatûnyi anyi Tobia ûnyi hnyi hnyin hnyeule.

⁹ Me oge me hûna mʼ ödrin e ânyâwia je hnyeule: ke oge me odilâ hmetu kâe je kaiainy uma umen Khong, tha eling me je hudiny han, me libanu.

¹⁰ Ke oge me wâ but a gʼ adre me ca ham bi je jekhon at Levi; me haba at Levi, me tavat khumöng, a tavat ânyâ huliwa, adre me ve kec ka hnyi idrin je hnyei.

¹¹ Me oge me iwatretra me tavat musi me ha, ka habe, Anyin a ieû adre me hna degecâ uma umen Khong? Me oge me ûkhacaköu ödrin, me otilʼ ödrin hnyi hanymodrin.

¹² Me haba at Juda hia ödrin e hom ke keihen a libenyitainy hwit, me waina, me wakaco ka hnyi je uma omjeû.

¹³ Me oge me otilâ tavat tuö uma omjeû, wale Selemia at bihut, me Zadoka at sihnalimen, me Pedaia a hanen at Levi: ke ûtangköu mödrin Hanan nöku Zakuri, nöku Matania: anyin adre me haiwisai ödrin, ke hamödrin he ka khenâ ka je liamekeiny mödrin.

¹⁴ Khonguk lö, ûnykûmi nya ju hnyi ûnyi ang, ke ca he ka kot degecâ anyik je huliwa ae betenge waleji oge me ânyâ ka hnyi uma umen Khonguk, me je huliwainy.

¹⁵ Haba hnyi ûen eling oge me wâ hnyi Juda keihen adre me hlec wan vine hnyi sabath, me hok je bwiny hwit, me ohijenâ je asina; me waina minya, me je wan vine, me je wan meta, me je hok hia wale adre me sukhöûnâ Jerusalema ai hnyi bong sabath: ke oge me thawʼ ödrin hnyi bong ödrin e ûcû jeû hnyin.

¹⁶ Ke hu minya ke je at Turo adre me laba eling, hnyat adre me hom je wâ, me ta je ûnyi hia hnân ûcû, mʼ adre me ûco hnyi sabath me lakon Juda hnyi Jerusalema.

¹⁷ Meʼ oge me iwatretra me je taben hnyi Juda, me ha ködrin, ka habe, Ieû ang gabun, öbun e ânyâ ûnyi e ae kong, me okongoâ bong sabath?

¹⁸ Hawa a ca ânyâ helâe lakamöbun, me haba Khongutin ame oâ ta je ûnyi hia eang ae kong kötin, me hon taun ang? ke öbun e bi hanen hmonyin kö Isaraela hnyi hna okongoâ sabath.

¹⁹ Ke ame hauhaotreng ut hnyi je homagouleny Jerusalema ke tiga hia bi sabath, me oge me ûkhûnöng he ka hlöng je homagöule, ke oge me hûna a gʼ adre me ca he hmetu bi ka khong ke ne o but a um dö sabath: ke oge me otilâ ke lathnyabaik hnyi je homagöule, mʼ adre me ca he ka dit me je hok hnyi sabath.

²⁰ Ke ame mokut tavat tren omjeû me ûcû omjeû hnyi hoton Jerusalema, ame ne khaca ûen ame ne lo.

²¹ Ke oge me û ödrin, me ha ködrin, ka habe, Ieû ang gabun öbun e mokut hmelen hna up bak? öbun e ne helâe hmetu me oge me he ka kot öbun. Ke hwân e, ödrin e ca o hmetu bi hnyi sabath.

²² Me oge me kunâ at Levi he ka obosoi ödrin bi, mʼadre me he ka tuö je homagöule, me okabâ bong sabath. Khong lö, ûnykûmi nya ju hnyi ûnyi eang minya, me betenge gak helâ me ûganiny ânyâm ibetengiö.

²³ Ke hnyi ûen eling oge me wâ at Juda tavat adre me hok momo hnyi Asedoda, me Amona, me Moaba:

²⁴ ke haba je lakudrin adre me hom hanen hwen Asedoda, ke ca khanʼ ödrin fuc wia bi hwen Juda, ke hoton hwan ke hnyei me ke hnyei.

²⁵ Ke oge me û ödrin, me haikongu ödrin, me kot keihen me hnimö je bödrin, me kunʼ ödrin he ka hâiâ Khong, me ha, ka habe, Öbun e ca he ka ham lakubun wahlu ka lakudrin obaga, me hom lakudrin wahlu hobi kâu lakubun obaga, me hobi köbun bi

²⁶ Hawa, a ca monu Solomona tuhan Isaraela hnen ûnyi e? ke so bi e ba than a helâ mē hnyi je hnyei ae se biâ, ke haba Khongon ame betenge gan, ke Khong ame otilâ e he ka than hon at Isaraela hia; ke so bi je momo kanyua ödrin e omono e.

²⁷ Hawa, ohmun e he ka ling öbun he ka ânyâ hia hulo e ae gan, he ka hanyâûâ weny Khong wale he ka hoktamomo kanyua?

²⁸ Ke haba ke nöku Jehoiada, nöku Eliasiba at bihut ae beönua ame hom nöku Sanebalata at Horono: me oge me obâ e gak.

²⁹ Khonguk lö, ûnykûmi ödrin ju, anyin ödrin e okongoâ hanymen tavat bihut, me ûhihinyköu anyin tavat bihut, me at Levi.

³⁰ Helâe oge me obosoi ödrin ge je atkanyua hia, me owisa hanymen tavat bihut, me at Levi hnyi je ve hanymodrin:

³¹ me hobi kâu hudiny uto, hnyi ûen adre owisa, me wan a bân. Khonguk lö, ûnykûmi nya ju, me ohnahici nya.