Nehemia 1 - Iaai Bible 1901 (New Caledonia)

¹ HOFUC ho Nehemia nöku Hakalia. Haba hnyi tehi Kiselu, hnyi huna a twenteiny, ke inya hnyi Susani hnyaban than,

² me ame o könya Hanani ke liamekeiny mönya me ke je at Juda; me oge me hnei ödrin ge at Juda tavat ae möt je kolon a hoûbâ, me ge Jerusalema.

³ Ke haingödrin könya, ka habe, Haba je kolon adre me möt ûhedrin hnyi hna bâ hnyi ke keihen hnyei eling, me gan hmâ vec me hna haikongu ödrin: ke adre hia but kia hna up haginy Jerusalema, kʼ adre thong degecâ je hlinginy homagouleny.

⁴ Ke hnyi ûen oge me long hofuc e, me oge me laba but me tenge, me hmak hnyekuk hnyi ke je bong, me ca han, ke oge me hic hnyi hnyimakan Khongon drany,

⁵ me ha, ka habe, Inya oge me khöû köu, Iehova, Khongon drany, Khong ae gan hmâ me hnân outen, at ame tuö ûhihinyköu me ibetengiö ködrin tavat adre me hnyok kâu me tuö anyin je hnanyibu:

⁶ ö u tevehlöng ju ge li hnyikönyâm, me wâ ge li emâkâm, me long hic hijin athnyabaem, wale oge me hic köu hnyi ûen ang hnyi lany me lit, hobi kâu lakon Isaraela a lathnyabaem, ke oge me haimemenâ je hulo anyin lakon Isaraela, waleji ohmun e hia but ânyâ köu: eke, oge me hia but hnyi ânyâ hulo me lap anyi cica.

⁷ Ohmun e hia but ânyâ hwakecin ae kong hmonyin köu, me ca tuö je hnanyibu, me je hna hûna, me je hna owisa, waleji u je hûnakö Mose a athnyabaem.

⁸ Ö u ûnykûme thö hofuc waleji u je hûna kö Mose a athnyabaem, ka habe, Öbun, ka he ka ânyâ hwakecin ae kong, me oge me he bi nya ka ovesei öbun ka hnyi je hnyei:

⁹ ke öbun ka he ka hwio könya me tuö anyik je hnanyibu me ânyâ, eja ke ne adre ne obʼ öbun ka hnyi je can hmeledrany, me oge me he ka ûkhacaköu öbun ûhebun e, me hum öbun ka hnyi dok waleji oge me ûca he ka ip iök hnyin.

¹⁰ Ke walang ang lathnyabaem me lakem, waleji u je omelö ge manâm man ae gan, me hnyamâm ae hwege.

¹¹ Than lö, ö u tevehlöng ju ge li hnyikönyâm ka hic hijin athnyabaem, me je hic hijin lathnyabaem, tavat adre me wedrin he ka outen iâm: ke ö u ohnahicâ but athnyabaem hnyi bong ang, me ham kâu me me betenge gan at ang. (Ke inya ke ji at ame khop utköiö belen than.)