Nahuma 2 - Iaai Bible 1901 (New Caledonia)

¹ AME o but hnyi hnyimâkâm at ame sa omomono: hmâkâ ju hnabâ, tuö thö gethen, ca ju hnyâm, ti ohwegiâ thö tang hwegiâm,

² Anyin a Iehova ame ohmeto hmanenangi Jekob, helâ me hmanenangi Isaraela: anyin a hingâlâ degeci ödra hnen tavat hingâlâ degecâ, me okongoâ anyidra je anginy.

³ Haba je taben unyin, me dra anyidrin je bec, kʼ ame khavâ ûkhaû ae dra ge tavat hwege: kʼ ame hadröngöc je kariota ge fao hnyi je bong e ame penapena hnyin, kʼ adre me hmejijingâ je ö.

⁴ Ame he monoâ je kariota eû hnyi je gethen, ke ûöhnekiköu hnyi je hna cit gethen: me manen helâ me uthmeic, me gâ monu helâ me hucuce.

⁵ E ame ûnykûme anyin je homakan: adre me haû hnyi ûhedra; kʼ adre me logot ka hnyi hna up hak, ke adre hia but penapena ûnyi hnân tubi ödra.

⁶ Adre me khong ut je homagouleny je wagewe, kʼ ame aû but uma umen than.

⁷ Ke adre me öba khaûö Huzaba, adre me lelö momo e, me ame tenge lathnyabainy a wahlu helâ me je biny, kʼ ödrin e khaû je ûlaidra.

⁸ Ke hwân kâû adrem me helâ me ong an Nineve: ke so bi adre me kec; haingödra, ka habe, Todru, todru öbun, ke ba at ame bwele hoton ai.

⁹ Söh thö sileva, söh thö gol: ke ca hnân bi aû je omjeû, wale soiny ta je ûnyi ae hmanenang.

¹⁰ E ba onyen e, adre me öba onyen, iny jut wau: ke ame köiö but hnyok, kʼ ame öbubuny je boucadra, ke vec hia thö je hnyidra, ke löhau but ta je hnyimakodra hia.

¹¹ Ewa uma umen liona, ke dok ame an hnyin je nak liona, wale ame vheno hnen liona ke liona momo, ke nokon liona, ke ba at ame ooti ödra?

¹² Haba liona ame oloû kia, ka oûco je lakon, me hlingâ hobi kâu laâiân, me öunöngötâ umen je op ge haniny, me umen je uma ge je hna hlingâ.

¹³ Wâ bi, e ve inya möu haingö Iehova tuhan sabaoth, ke oge me he ka thong anyin je kariota hnyi hai, kʼ ame he hele vat ka an halem je nak liona: ke oge me he ka subâ degecâ hanem ûnyi eang hmeledrany, ke adre me ca he hmetu ka long ifucin ânyâm je ûthumetu.