Nahuma 1 - Iaai Bible 1901 (New Caledonia)

¹ HOK honen Nineve. Tusiny hna omanenâ kö Nahuma at Elekosi.

² Haba Iehova, me e Khong ame ciâ ke bi hwaban: Iehova ame bi hwaban, ke tren hmonyin; Iehova ame bi hwaban ka je iwahnaihmiony më, ke e ame ip hmonyin hobi kâu je iwahnaihmiony më.

³ E bec Iehova he ka hmonyin, ke gan hmâ maniny man, ke e ame ca he ka hna bâûâ at ame ânyâ hulö: haba gethen de Iehova wale hnyi höu me weneû, ke haba je ûlâ, me wale sesâ hnyi li can.

⁴ E ame thawâ köiö me omada e, me ohmö ta je wagewe hia: e sënyin thö Basana me Karemela, e meleca thö vongon hnyi Lebanona.

⁵ Ame öbubuny je bucen gan, ke ame köiö but je hut; ke ame khibi goranyai kânâ hnyi hnyimakan, eke, hmeledrany, me tavat adre me labâ e.

⁶ Ie at ame he ka tot hnyi hnyimakan anyin hmonyin? ke ie at ame he ka tot e ka ubâhlâ anyin wathethot? ame hingâlâ anyin hmonyin helâ me meic, ke e ame thö je kic.

⁷ E so Iehova, e hnabâ hnyi bong vec; ke e ame wâhmakhmeto tavat adre me labageju kâu.

⁸ E ame he ka ti ohia dok e ge di at ame aba, me hnu je iwahnaihmiony më ka hnyi menekholom.

⁹ Ieû hnobun hna si hnö Iehova? e ame he ka ti ohia: ame ca he ka olo o vec.

¹⁰ Eja ke ne adre ne vhet helâ me ûö ae ûdedö, me ti khubet hnyi hnödra hna ic, adre me he ka thung ödra helâ me thatûnyin hwit ae mada.

¹¹ Ame he but ûnyi gam ke at ame ûnykûme ûnyi ae kong kö Iehova, at ame ûhnenamö he ka ânyâ ûnyi ae monu.

¹² Walang hna ha hnö Iehova, ka habe, Eja ke ne ödrin e ne bekhöt me se hia, helâe minya adre me he ka subâ degeci ödrin, ke e ame he ka hia. Oge hia but oveci u, ke oge me ca he hmetu ka oveci u.

¹³ Ke walang ang oge me he ka thu anyin hna ûhûkâlâköuâ walethö hom, ke thamuâ je hna cö u.

¹⁴ Ke a hia but Iehova hûna gam a gʼ adre me ca he hmetu ka tā hnyat a iâm bi: ke oge me he ka subâ degecâ je khongom a je hnatheat adre me kave me oköiâ ûnyi hnyi umödrin je uma; ke oge me he ka ânyâ ânyâm erkemok; anyin a u kong ut.

¹⁵ Wâ bi, e hon je bucen li can at ame hom uthumetu ae so, at ame haimemenâ ûsoköu! Juda lö, tuö ju ânyâm je bijeû, ke thamuâ ânyâm je khöbi: anyin ame ca he hmetu at ae kong ka vhenu u; kʼ adre hia but subâ degecâ e.