Mika 2 - Iaai Bible 1901 (New Caledonia)1 EKÖLÖ ge tavat adre me ûnykûme monu, me ânyâ hulo hon hnödra je hna mokut, adre me ânyâ e hnyi haolany anyin ae metâ kodra. 2 Ke adre me behnyekudra ta hnyei me hûgûnâ; ke ta je uma, me hom bi: ke adre me ovecâ at me anyin lap, wale at me iny hnyei. 3 Anyin a wale walang hna ha hnö Iehova, ka habe, Wâ bi, oge me ûnykûme ûnyi ae kong ka lap ang, mʼ öbun e ca he ka thang je nyibun ûnyi hnyin, ke öbun e ca he ka he kököm; anyin a ûen ang ae kong. 4 Hnyi ûen eling adre me he ka hai ûhoûcû gabun me tenge thungaû gan hmâ me ha, ka habe, Adre ti öba wan gata; e a hia but wia jekhon lakeik: ekölö ge hnen hna hom e ûnyi gak! e ame khenâ ita ta hnyei ka tavat ûkhin fuc. 5 Anyin a wale, ame he ka ba at gam ame he ka khûâ tulut ge ugleköp hnyi ûkhacaköu anyi Iehova. 6 Haingodra ka habe, Ca perofeta thö. Adre me ca he ka perofeta ka hnyat eling; ame ca he ka hia bi ta je hna haikongoâ. 7 Lap anyi Jekob lö, hawa, adre me he ka ha, ka habe, Hawa, e sënyin dut hanu Iehova? hawa, e ame ânyâ je ûnyi ang? Hawa ame ca he hok hofuc ka osoâ at ame vheno wisa? 8 Ke hwân hnyi je bong ang haba lakeik adre me tot helâ me iwahnaihmiöny: öbun e uny ûkhaû ûnyi hnyi hon khaûen tavat adre me he sot helâ me tavat ûhedra hnyi vat. 9 Ke öbun e obâ omomoiny ik hnyei hnyi umödra je uma ae hmanenang; öbun e hûgûnâ anyik hmanenang ge lakudra nyiele balua. 10 Todrʼ öbun, ke he thö; anyin ae ba hna menâ köbun eang: can ûnyi ae kong, at ame ohia, wale at ame ti ohia. 11 Ame ne he ke at wale ame vheno ang me iyawo ka ha thoi, ka habe, Oge me he ka perofeta köu ge waina me grâg; awe, hamen bi he ka perofeta ka tavat ang. 12 Jekob lö, oge me he ka ûkhacaköuö u hia; e hnathu oge me he ka ûkhöûnâ je kolon Isaraela; oge me he ka tha ip ödra helâ me je mamoe hnyi Bozera; helâ me hnahat meno hnyi idra utkânâ, adre me he ka mede, anyin ae se hia tavat. 13 Ame he at thö hnyi hnyimakodra: adre me hia but utut me be thö ka hnyi homagoule, me didrut hnyin: ke haba tuhödra ame he hnyi hnyimakodra, ke Iehova a hnyimakan kodra. |
maintained by the British and Foreign Bible Society
Bible Society of the South Pacific