Mataio 8 - Iaai Bible 1901 (New Caledonia)

¹ KE e ame ölö but ûheny hon bucen, me haba tavat ae se hia adre me he hoton.

² Me wâ bi, ame o but kâu ke lepera me khudrung ju kâu, me ha, ka habe, Taböny Than lö, u je ne bewem, me khatö u he ka osoi nya.

³ Me e ame inâ but hnyamen me kâlâ, me ha; ka habe, E bewek; u je so but. Me ame ie hia but hnân lepera.

⁴ Ke haba Iesu ame ha kâu, ka habe, Wâ eâu, ca ha ka ke at; ke he thö, omanenö u bi ka at bihut, me ham bwihlany a hûna Mose, hnân haten ohnathoâ ködrin.

⁵ Ke ame o but Iesu ka hnyi Kaperenauma, me ame o but kâu ke keneturio me khöû kâu,

⁶ me ha, ka habe, Taböny Than, haba athnyabaik ame mokulec mok a mat eiö hnyin uma, ke vec gan hmâ.

⁷ Ke e ame ha kâu, ka habe, Oge ma he, ka osoâ e.

⁸ Haba keneturio ame thu me ha kâu, ka habe, Taböny Than, iny ca ûcû mʼ u me he ka dit ka hnyi umök uma: ke so bi u me he ka ha thibi ke hofuc, me me he ka möt ut athnyabaik.

⁹ Anyin a inya bi at ame long musi, ke e hu gak ta je soja: ke inya oge me ha ka ke at, He thö, me, e ame he; me ka ke at, Aiö u, me, e ame he könya; me ka athnyabaik, Ânyâ thö e, me, e ame ânyâ.

¹⁰ A long ut Iesu, me e ame lâiâ, me ha ka tavat adre me he hoton, ka habe, E hnathu, inya oge me ha köbun, inya oge me ca wâ hnyi Isaraela labageju ae gan a helâe.

¹¹ Ke inya oge me ha köbun, ka habe, E se hia tavat adre me he ka he ûhedra jimeyö me jimeû he ka tha laba me Aberahama, me Isaaka, me Jekob, hnyi dökhu hnyi drany:

¹² ke haba lakon dökhu, me adre me he ka obʼ ödra ka hnyi menekholom hnyou ai: kʼ adre me he ka tenge sesebila eling me ûgiö ga nyudra.

¹³ Ke haba Iesu ame ha ka keneturio, ka habe, He thö, ke adre me he ka ânyâ hobi köu e ûcû me ânyâm labageju. Me ame so but athnyabainy hnyi ûen cici eling.

¹⁴ Ke ame o thö Iesu ka hnyi uma umo Peteru, kʼ ame wâ hinyen âiân ame mokulec mok ae kahwa.

¹⁵ Me e ame kâlâ hnyamen momo, me ame hia but kahwa; me ame todrö momo, kʼ ame bi huliwa kâu.

¹⁶ Ke hnyi sahac ödrin e hom kâu tavat ae se hia a dilic ödra demoni: me e ame obâ je hanu ge hwan hofuc, me osoâ ta je mok hia:

¹⁷ me me hwâdâ hna ha hnö Isaia perofeta, ka habe, E ame ka hom hnöta ta je sēnyin, kʼ ame vadren ta je mekita.

¹⁸ Ke haba Iesu ame wâ tavat ae se hia igigilö e, me e ame ûkhûnöng he ka he ka hnyi ke keihen.

¹⁹ Ke ame he ke at sihnalimen, me ha kâu, ka habe, At Ûne lö, oge me he ka he hotom ka hnyi dok u me he ka he ka hnyin.

²⁰ Ke haba Iesu ame ha kâu, ka habe, Haba ta je alope, me hu hnödra hnyi kânâ, ke haba ta je meno ame ga ethö, me hu haûödra; ke haba bi Nokon at, me ba hnân omokulec ban hnyin.

²¹ Ke haba ke aten ame ha kâu, ka habe, Taböny Than, me hnö nya but mʼ inye bök ka konim cica.

²² Ke haba Iesu ame ha kâu, ka habe, He hotuk, ke hamen ta je komok he ka konâm ta je kokidrin.

²³ Ke e ame ölö ka hnyi hon galu, me haba laten adre me he hoton.

²⁴ Ke wâ bi ame o but boûdet ae gan eû hnyi köiö, kʼ ame khutu takoû but hu hnen köiö: ke e ame mokut.

²⁵ Me ödrin e he me bwebwelâ e, me ha, ka habe, Taböny Than lö, omeli otin dö; otin e he but ang ka mok.

²⁶ Me e ame ha ködrin, ka habe, Ieû gabun öbun e ot hnyat labageju ûhnyûkong? Me e ame todrö, me thawâ ang me köiö; me ame ta but hau ae gan hmâ.

²⁷ Haba tavat ödrin e lâiâ me ha, ka habe, Ehö at ang, ame long kâu köiö me ang?

²⁸ Ke e ame khop dö hnyi ke keihen, hnyi hnyei iny at Gadara, me ame ûkhanö mē li at a dilic ödru demoni, ödru me he ûhedru hnyi je erkemok, ödru ti hwege monu, wale, me me ba at ame vheno gethen eling.

²⁹ Ke wâ bi ödru me kuku goranyai, me ha, ka habe, Ieû gam köhmu Iesu a Nokon Khong? u je o but ang he ka oveci ohmu, ke tiga ca ûen bi?

³⁰ Ke eling e sâkâû gadrin hna hat buaka ae se hia adre me han tot.

³¹ Haba je demoni adre me khöû kâu, me ha, ka habe, U je ne he ka obʼ ohmun, ö u hnʼ ohmun dut he ka delec hna hat buaka.

³² Ke e ame ha ködrin, ka habe, He thʼ öbun. Ke ödrin e dit ut, me delec hna hat buaka: ke wâ bi, haba hna hat buaka hia thithö adre me wadring ut jime thö ban hwatapkolu ka hnyi köiö, me adre me mokcu.

³³ Ke ame kec dö hnyat ödrin e tuö me he ka hnyi taun, me ûthumetu ge ta je ûnyi hia, me hna ânyâ ka li at a dilic ödru demoni.

³⁴ Me wâ bi, ame he but aten taun hia thithö he ka iouny me Iesu: ke adre me wâ ju, me adre me khöû kâu he ka hna but je hnyigöulödra.